《趁iau2日时》

 | | | 转寄

雇用残障人士做什么?

作者 林俊育 2008.10.19

有一pái kap一位长老tī谈论残障福利法规定私人企业员工应雇用百分之一以上残障人士ê问题，伊一再质问「雇用残障人士做什么?」

约翰福音第九章中阐述盲人m̄是伊本身有罪，mā m̄是伊父母有罪，tùi án-ne是上帝boeh藉tio̍h伊来显明上帝ê作为。而上帝ê作为kap旨意是beh透过咱基督徒来实践上帝ê爱。基督徒m̄是「将一切交托hō͘上帝」就好了。咱mài bē记得做基督徒ê角色，是beh hō͘上帝差用ê。Che章经节ê重点tī强调「奉差遣」，去爱hiah-ê需要帮助ê邻居。

路加福音第十五章第一到七节中，耶稣强调tio̍h重视hit百只羊中被遗弃而迷失ê一只。残障人士tī现今ê社会上被歧视甚至被遗弃，tùi án-ne心理上常有障碍，所以容易迷失，耶稣ài咱放落那好好á ê九十九只而去chhōe并关怀那迷失ê一只。咱基督徒beh为残障人士创造一个无障碍ê就业环境，以上帝ê来爱化解一切ê障碍。嘉义北荣教会ê无障碍礼拜堂kap台北双连教会雇用盲人干事是真好ê见证。

残障人士mā是上帝ê子女，是咱肢体ê一部分，咱bē-tàng歧视in。陈五福博士常勉励大家:中国字「人」是一长一短合tī同齐，互相支持chiah是「人」，长ê代表恩赐khah-chē ê，短ê代表恩赐khah少ê。人kap动物siōng大ê无仝是:残障ê动物无法度活落去，而残障ê人tī人类互相帮助下thang继续活落去。一般讲，文明社会ê标准是看该社会对残障人士ê关怀程度。

英文字典将 CHRISTIAN 解释为 (1) 基督徒 (2) 文明人。可见大家kā实践上帝之爱ê基督徒看做文明人，基督徒tio̍h背起「人类文明」ê十字架。

我个人开始从事盲人事工以后，有真chē机会去参观国内外盲人重建机构，in一再加强对盲人ê心灵重建、生活重建kap就业重建等事工。我发现美国ê社会现在非常重视残障人士ê工作机会平等，我去参加国际盲人事工交换计画ê主办机构叫做佳乐盲人中心 ( THE CARROLL CENTER FOR THE BLIND) 入门ê接待员是盲人，我一入门伊对我微微á笑讲:「我ē-tàng为你效劳mah?」我讲beh chhōe院长，伊随时用电话内线kā院长讲外chhōe，便请我坐落来等。我看伊真熟练地接电话，电话有五线，电话铃一响，伊用检视器(SCANER)chhōe出电话入来线ê按钮，如被chhōe ê人无tī-teh，伊to̍h是刻透过盲用电脑键入来电话人ê留言，并转印出文字来， khǹg tī固定ê位，外出tńg来ê人tī该固定位顶chhōe家己所属ê留言。一切井然有序，做得真好。

最近tī美国看tio̍h片长只有十分钟ê录影片“ I work with a guy who is blind and deaf”，叙述一位既盲koh聋ê残障人士tī LOTUS 电脑公司就业ê情况。Chit位盲聋青年六年前tùi印度来美国，进入海伦凯勒ê母校――波金斯盲人学校 (Perkins School For The Blind) ，伊是海伦凯勒了后hit间学校siōng引以为荣ê杰出学生。Tī高科技电脑ê辅助下，伊ē-tàng kap一般人仝款工作，tī某一kóa地方iáu超越明眼人。

Tī美国受过重建训练ê盲聋人ē-tàng独立生活，tī厝内，伊手腕带一个振荡器，thang分辨敲门声kap电话铃响，以判断去接电话或开门。其电话上装一个点字ê发话kap受话器，以前tī盲聋人kap盲聋人中间lóng购chit种点字发话受话器chiah ē-tàng通电话。现在美国ê电话公司设有中继站，透过中继站thang kap一般人通电话。独居ê盲聋人腹肚饿了，thang khà电话到中继站，请其代订麦当劳或其他任何伊想beh kap明眼人仝款享受ê食品。

大家lóng知影phah高尔夫球是有「差一点á」 (to̍h是优者hō͘先) ê比赛，英文叫「HANDICAP」，kap残障ê「HANDICAP」同字。咱明眼人如承认是受上帝特别祝福ê优者，就应该hō͘伊残障人士hō͘先差一点á，为in创造平等ê就业环境，hō͘咱ê社会早日成做文明人 (CHRISTIAN) ê社会，mā就是求上帝国早日临到咱世间。

阮教会有真chē奉上帝ê名而设立ê事业机构，tī上帝ê爱里，就应该多规划些残障ê就业机会，多花点钱来补足残障人士ê「差一点á」，花chit种钱对事业机构来讲m̄是浪费，mā m̄是赔钱，koh-khah m̄是划算不划算ê问题，却是对上帝国siōng有意义ê投资，mā是偿咱iáu欠上帝传福音ê债。如无án-ni做，hiah-ê事业机构就无应该挂「财团法人台湾基督长老教会附设」ê招牌。咱千万m̄-thang bē记得第三诫kā咱讲「bē-tàng滥称耶和华你ê上帝ê名，因为滥称伊ê名ê，耶和华的确无用伊为无罪」，而tio̍h时时刻刻谨慎为上帝作好ê见证。Koh-khah mài hō͘教会投资ê事业机构成做传福音ê障碍。

［台湾教会公报 2159 期 1993.7.18］