《趁iau2日时》

 | | | 转寄

「光tī隧道hit端」译序

作者 林俊育 2008.10.05

从事盲人事工七年gōa来，我一直感觉到盲人ê生活世界裏，siōng大ê障碍m̄是缺乏视力，却是社会大众对盲人ê不了解kap歧视。海伦凯勒bat讲：「社会siōng难背负ê重担，m̄是失明本身，却是社会大众看待盲人ê心态。」

所以我常把握机会宣导盲人事工ê意义，尤其是将心得写成文章发表，将盲人生命力ê优异表现hō͘ koh-khah chē人知影。Chiah-ê如果由盲人本身写出in心灵ê感受，会感动koh-khah chē人。

视障协会开办视障写作班时，我就到美国波士顿ê佳乐盲人重建中心ê图书馆，chhōe出六本盲人着作ê册，我mā下定决心boeh陆续译成中文，以飨国内读者。视障协会吴敏惠秘书离职后，iáu继续编辑「爱盲系列丛书」，伊ài我先译由盲人雷纳・罗宾逊［LEONARD ROBINSON］所写ê「光tī隧道hit端」［LIGHT AT THE TUNNEL END］。He是记述美国三○年代到七○年代之间，雷纳・罗宾逊本人透过国会为盲人福利立法ê奋斗历史，其不屈不挠ê精神，值得国内盲人、盲人事工人员kap立法委员们ê参考，我唯一ê希望是：chit本册ē-tàng带动台湾盲人福利事工ê省思kap进步。

Che是我第一pái tam试翻译外国书籍，那实在m̄是一件容易ê工作，尤其是国情ê无仝、政府社会体制ê无仝kap时代背景ê差异。我用出浑身解数来尽力使用国人思路容易bat ê译法，但未尽完美ê所在一定iáu真chē，若蒙专家学者ê匡正kap指导，是为无上之荣幸。

Mā请读者ē-tàng耐心地注意无仝ê国情、体制kap时代背景，但仝款是盲人福利事工，一定有真chē值得参考kap学习ê所在，至少咱ē-tàng tùi chit本册体会到：改进盲人kap其他残障ê福利，tio̍h先tùi国会立法着手，愿大家读完chit本册了后，共同来为台湾立一个koh-khah完善ê残障福利法而努力奋斗。

承蒙我ê盲人事工导师、台湾盲人ê父、大家所尊称做台湾史怀哲ê陈五福博士为chit本书写序，曹永洋老师ê指导，陈徇如律师kap行政院法规会黄英霓小姐对附录之法案部份做专业ê校正，吴敏惠小姐、王志弘先生kap许翠华小姐ê认真校稿kap编辑，hō͘ chit本册ē-tàng顺利地呈献hō͘国人，谨tī-chia特别致谢。
1995.2.23