《趁iau2日时》

 | | | 转寄

「生命tī我手指尖」译序

作者 林俊育 2008.09.28

中华民国视觉障碍人福利协会ê吴敏惠执行册秘书筹画开设视障写作班时，伊ài我tī美国chhōe些盲人作家ê作品，绍介hō͘国内kah意写作ê视障朋友。我到波士顿ê佳乐盲人重建中心图书馆chhōe-tio̍h六本，其中罗勃・史密斯达司［ROBERT J. SMITHDAS］所撰写ê自传式作品〈LIFE AT MY FINGERTIPS〉是一本siōng具励志性ê好册，我就先将「生命tī我手指尖」译成中文，kap国内读者分享罗勃靠神ê宏恩去克服并跨越盲聋哑ê多重身躯障碍，靠手指尖来触摸神所创造ê浩瀚世界，灵命会得thang升华而缔造卓越ê成就，来荣耀神ê大能。

罗勃五岁时因龙骨脑膜炎而致使盲聋哑，但受tio̍h比伊早五十年ê海伦凯勒ê杰出成就所鼓舞，伊进波金斯盲校，老师们帮忙伊证明伊ē-tàng超越伊ê身躯ê残障。结果，伊成做第二个完成大学教育ê盲聋哑人。读圣若望大学时，伊面对比其他明眼学生koh-khah chē ê困难，但tī神ê美妙带领下，伊最后以优异ê成绩毕业。了后，伊koh取得纽约大学ê硕士学位。

罗勃完成学业后，应邀到各所在演讲见证神ê大能，siōng chē ê时chūn一年gōa达二百五十三场，场场得tio̍h热烈ê掌声，当然mā鼓舞真chē人力争上游，koh-khah hō͘明眼人ē-tàng了解残障人士ê潜能，只要提供公平ê环境，in lóng ē-tàng成做社会ê生产力，而m̄是无用ê依赖者。

罗勃mā结婚成家，tī家己ê厝中招待亲友，过tio̍h充实而有趣味ê生活。目前担任美国海伦凯勒中心［HELEN KELLER NATIONAL CENTER］ê执行长，从事盲聋哑多重障碍ê教育kap重建，享誉美国kap全世界。

罗勃是一个诗人，伊ê诗集〈心城〉［CITY OF THE HEART］kap〈美ê分享〉(SHARED BEAUTY)陈列tī波金斯盲校ê社工研究图书馆［明眼字］ê橱窗，可见波金斯盲校确实真以chit位杰出ê校友为荣，我希望ē-tàng早日译成中文，hō͘国内ê视障朋友kap明眼人lóng ē-tàng分享到chiah-ê发自心灵ê作品。

一九九一年起，我每年暑假lóng参加美国盲人事工考察，行程包括美国海伦凯勒中心。旧年始知罗勃是一位杰出ê基督徒作家，伊ê作品充满tio̍h对神ê o-ló。我趁访问该中心之便，问伊是m̄是thang将伊ê册译成中文tī台湾出版，伊讲m̄-nā ē-tàng，而且欢迎，koh-khah无用付着作权费，伊一屑á to无迟疑地马上kā伊ê亲笔授权册hō͘我。我讲中译本出版时，会邀请伊来台湾现身见证，伊讲真欢喜ē-tàng到台湾一游。

感谢神ê恩典，我已tī百忙中抽空完成chit本译作，希望ē-tàng早日kap读者见面。罗勃来台kap国人见面ê日子mā指日可待了，想必伊ê见证一定ē-tàng hō͘国人对视听障者ê态度有所改变，进一步koh对陈博文牧师一再强调ê残障福音kā伊重视并实践出来。

台湾工商发达了后，物质欲望造成惊人ê心灵残障，比身躯ê残障koh-khah可悲，人人心中筑起高高ê墙，对墙外ê弱势团体视若无睹，希望chit本译作加上基督教ê福音ē-tàng hō͘每一个人ê心坎高墙倒落来，phah开心内ê门窗，共同将台湾创造成做神所喜爱ê国度，che是我翻译chit本册ê siōng大目的，愿神亲自带领以上计画ê完成。

承蒙中华民国残障人协会首任理事长陈博文牧师tī病床上为tio̍h这书写序，曹永洋老师ê指导kap王志弘先生kap许翠华小姐ê认真校稿，tī 此一并致谢。