《趁iau2日时》

 | | | 转寄

「失明hō͘我ê挑战」读后感

作者 林俊育 2008.09.21

每到洛杉矶拜访tī南湾台湾基督长老教会牧会ê陈宏文牧师，阮lóng欢喜谈论教会kap盲人事工。今年元月三日koh再拜访伊时，伊hō͘我一本「失明hō͘我ê挑战」，讲是伊教会ê邱嘉雄长老送伊ê；伊iáu讲邱嘉雄长老mā真关心盲人事工，下次koh再到洛杉矶时，一定安排绍介阮熟识。

今年元月十二日特别koh再访陈牧师，m̄-nā见了邱嘉雄长老，伊iáu chhōa我去拜访该册ê作者程文辉女士。程女士是邱长老牙科诊所ê病人，程女士送伊一本「失明hō͘我ê挑战」，伊读后深受作者见证神ê大爱而感动，结果订购三十本送hō͘会友kap朋友共享。

目前程女士kap伊ê大恩人mā是终身保姆列和女士［作者称伊「和姐」］同tòa tī洛杉矶ê一栋公寓，二人相依为命。一个多钟头ê晤谈，伊那充满神ê大爱kap感恩ê生命力，敦促我赶快kā chit本见证神无条件大爱ê好册绍介hō͘台湾ê读者。程女士kā我讲伊原先是用英文写ê“ONE OF THE LUCKY ONES”，一九八○年tī香港出版，粤语中文译本册名改为「失明hō͘我ê挑战」，tī一九八九年tī香港出版，为避免有kóa人ê误会而稍作修改。所以伊建议我直接tùi英文版译成中文版。

从事盲人事工五年gōa来，kap视障人常有接触，对in mā jōa-chē有所了解，我尽力kā我所知影ê视障人kā周围ê朋友讲，但范围推展真慢，最近我当teh计画编写台湾一kóa视障人ê心路历程kap奋斗史，希望透过chit本册ê出版，ē-tàng hō͘社会大众了解视障人kap明眼人除了视力差异之外，其他完全仝款。In用手触摸kap心灵ê目睭来看，有真chē地方「看」得比明眼人koh-khah清楚，咱tio̍h了解in，进一步koh接纳in，koh-khah beh为in创造一个公平ê生活、教育kap就业ê大环境。程女士ê真实经历，thang作为台湾盲人事工ê一面镜子。我听tio̍h有关台湾盲朋友ê身世见证，真chē kap程女士ê殊无二致。人类「歧视弱势团体」ê共同弱点，处处可见，失明人tio̍h效法程女士，kā亲身ê遭遇kap感受写出来，hō͘明眼人有所了解而ē-tàng接纳in。

读完「失明hō͘我ê挑战」，koh再读“ONE OF THE LUCKY ONES”，我感受良深，作者程文辉女士将伊个人ê真实经历，以平易生动而感动人ê文字，hō͘读者体会出一个失明ê查某gín-á，tī当时中国社会kap家庭对失明人有偏见kap严重歧视ê恶劣环境下，伊怀tio̍h虔诚ê基督教信仰，m̄-nā勇敢而有智慧地接受失明生活ê挑战，伊koh-khah深切地体会到失明人当时所面临ê厄运，tùi án-ne努力克服万难去求学，并立志奉献家己为香港视障人福利工作，直到一九八九年tùi香港政府社会福利署退休为止。程女士描写每位帮助伊kap鼓励伊ê人，lóng是神彰显大爱而遣送来hō͘伊ê，而伊tī感恩之外mā信守对神ê承诺，忍痛别离家人kap伊siōng亲爱ê「和姐」，一个人离乡背井到美国波士顿ê“PERKINS INSTITUTION FOR THE BLIND”［Che是海伦凯勒ê母校，一九五五年起改名为“PERKINS SCHOOL FOR THE BLIND”］就读二年，了后koh再到德州窝斯堡ê浸信会短期专修班攻读教会音乐二年半。

学成后，真chē亲朋好友lóng劝伊留tī美国thang过khah好ê日子。但是伊忘不了幼年tī广州市所见所闻有关失明人ê悲惨运命，尤其有位街头卖唱行乞ê失明小女乞丐bat对伊讲：「你tio̍h努力学习，有可能有一工你ē-tàng教阮/咱失明人用手去读册bat字，阮就m̄免tī街上卖唱行乞，甚至hō͘人轻蔑地称做『盲妹』了。」伊答应讲会尽力而为，了后伊常祈求天父赐伊求学ê机会，伊并对天父认真地承诺：愿意kā所学ê kap失明ê众Gín-á分享。经过真长时间痛苦ê挣扎kap祈祷，伊顺服神ê带领，tī一九五九年二月tńg来到香港从事盲人福利事工。

一九四五年，第二pái世界大战后ê广州kap台湾有淡薄á类似，同是深受儒家kap佛教影响ê封建而迷信ê社会，失明孩童ê父母得bē-tio̍h帮助或同情，为tio̍h避免亲友ê嘲讽kap追问，往往kā失明ê子女藏匿起来，不hō͘ in外出或受教育，tùi án-ne bōe-sái独立谋生，变成家人ê重担。有kóa失明ê孩童被出卖为奴，甚者koh-khah沦为乞丐或娼妓，过tio̍h暗无天日ê生活。迷信tú-tio̍h失明人ê手杖会有三年ê厄运，hō͘真chē人m̄敢接近或帮助失明人，因此in tī社会中ê地位无法度得tio̍h改善。程女士ê英文原作册名译成中文便是「好字运中ê一位」，伊ê父母虽经祖母ê要求，iáu是无kā伊卖出去。伊siōng感恩ê是认bat真正爱世人ê神，引领伊克服一切难关，行过坎坷ê人生旅途，就会领受神ê喜乐。

当时广州kap台湾ê盲人福利事工机构，仝款lóng是外来基督教传教士开设ê，广州有「慕光院」kap「明心盲人学校」，台湾有「新庄盲人重建院」kap「台中惠明盲校」。Che是因为新约圣经约翰福音第九章阐明：「瞎眼m̄是伊本人或伊ê父母有罪，却是神ài tī伊ê身上彰显神ê大能力。」程女士koh-khah时时刻刻向伊ê失明朋友传扬「神爱世人，包括失明ê人」ê福音，真chē人受tio̍h鼓舞而建立一个积极上进ê人生观。

台湾比广州koh-khah好字运，虔诚ê基督徒陈五福医师受史怀哲博士「尊重生命」ê感召，以家己眼科病院ê收入，tī一九五九年tī宜兰县罗东镇开设「慕光盲人习艺所」，一九七四年扩大而改名为「慕光盲人重建中心」，盲生接受二年免费ê教育kap按摩职业训练，到taⁿ有三百gōa位毕业生从事按摩工作，独立谋生而且成家立业，进一步koh回馈社会，如双连教会西罗亚合唱团ê男团员lóng是「慕光中心」ê毕业生。台湾mā因日据时代重视并保障盲人ê按摩工作，hō͘失明人有好ê就业空间。国民政府迁台后，法律明订：「非视觉障碍者bē-tàng从事按摩工作」，但政府执法不严，明眼按摩尤其是色情按摩已严重为害威胁tio̍h失明人ê职业生机，实在hō͘人扼腕叹息。希望「失明hō͘我ê挑战」一书ē-tàng激励国人正视失明人ê就业问题，为失明人开创koh-khah大ê就业空间。

程女士叙述伊受tio̍h歧视kap不公平待遇时，lóng用高度包容ê情操，以轻松而幽默ê笔法来表现。明眼人读了bē恼羞成怒，而会因了解包容，进一步koh改变对失明人ê态度。失明人透过点字书籍或有声卡带读了，会得tio̍h极大ê安慰kap激励，tùi-án-ne迈向koh-khah积极、koh-khah光明ê人生。愿神赐我够额ê智慧kap力量，来完成chit份我生来第一pái ê翻译工作，将一切荣耀归hō͘神。

［台湾教会公报 2201 期1994.5.8］