《趁iau2日时》

 | | | 转寄

敬畏生命・关怀视障

作者 林俊育 2008.09.14

自一九九三年八月担任视障者福利协会顾问后，kap本身弱视ê执行秘书吴敏惠接触渐多，知影伊欢喜写作，我举「失明hō͘我ê挑战」一书作者程文辉为例来勉励伊――以一个全盲者tùi封建ê中国广州到美国波金斯盲校求学时，透过点字机ê对话，受tio̍h海伦凯勒ê鼓励而写落来家己ê奋斗故事出版成册(该册《ONE OF LUCKY ONES》现已译成德、日、韩、丹麦文等版本)，学成后，to̍h是返港开创视障者福利事工，现今则赖该册版税贴补其退休生活。程文辉ê突破激励了敏惠，阮koh进一步请到现任志文出版社总编辑ê人道主义者曹永洋老师来视障协会开「视障写作班」，一方面鼓励视障朋友透过写作来分享生命ê光辉，mā希望ē-tàng提供视障者一条写作ê生涯路。Tī敏惠ê兴奋kap热情催生落来，「视障写作班」真紧成立了，我mā飞到美国波斯顿ê波金斯盲校研究图书馆搜集了六本盲人作家ê作品带tńg来台湾，phah算译成中文hō͘ koh-khah chē人了解盲人ê心灵世界是如何一番ê友情天地。

投入关怀视障事工七年gōa来，我发现有真chē视障朋友lóng真独立自主，若有人助in一臂之力，hō͘ in一点发展ê空间，肯定in ê潜能，其成就往往并无输明眼人。神点to̍h视障朋友生命之火，我只是为in添点油罢了，我ê生命之火亦因此而koh-khah光辉，我灵性上ê收成远比有限ê付出koh-khah chē。耶稣mā讲「当爱你ê邻舍」，我一直认为周遭ê弱势族群lóng是咱ê邻舍，而视障者koh-khah是弱势中ê弱势，多用点时间kap精力tī关怀视障事工上，kám m̄是tī体现「爱就是tī别人ê需要上看tio̍h家己ê责任」ê精义mah？

《旷野》素来关怀弱势有年，当南洲兄邀我请陈五福医师担任总策画，同齐编辑出版「慕光丛书」系列，有计画地推动视障文学，亦同时tī《旷野》开辟慕光天地专栏，耕耘一亩视障者kap视障关怀者ê园地，我随时chhōe来视障写作班班长廖惠文女士谈chit项计画，伊讲「今á日是我siōng快乐ê一工，我kap真chē kah意写作ê视障者，终其尾有了发表ê园地........」，陈五福医师则常tùi宜兰khà电话来提供真chē构想，伊mā心动了。我想tī陈五福医师ê总策画kap鼓励支持下，「敬畏生命 关怀视障」ê慕光精神应thang久长传承落去，而明眼人kap视障者之间ê高墙倒下之日应该mā bōe太远了。