《趁iau2日时》

 | | | 转寄

相揽真情

作者 林俊育 2008.08.03

五月十四日母亲节，双连教会举办“相揽真情音乐会”，由台裔德籍ê音乐家韩义明 ( DANIEL HEINRICH )kap伊ê德籍未婚妻依芙兰 ( FRANZISKA EBER ) kap西罗亚盲人合唱团共同演出，身为筹办ê我有无限ê感触。

「真情难得，难得真情。」是现实社会siōng好ê写照，尤其是物欲纵横、人心不古ê工商社会，人人tī各自ê心坎顶筑起高高ê墙，对墙外ê弱势团体邻居视若无睹，真理之神ê爱tī人心中kah-ná已秉烛难求，如海底捞针一般难了。

无怪乎现代人常埋怨讲，圣经裏记载hiah-ni̍h chē耶稣行神迹ê故事，如今怎样lóng看bē-tio̍h神迹？现代真chē人沉溺tī物质ê追求，心中已容纳不了「真理、生命、道路」ê真神耶稣基督，boeh看tio̍h或tú-tio̍h神迹当然比骆驼穿针iáu难。

M̄-koh，韩义明ê故事证明现代iáu是有神迹，只要心中有真神耶稣基督ê存在，以行动表现出真情，那真情所在ê所在就一定有神迹。神透过韩义明ê养父母kap未婚妻，彰显神ê大能，mā就是大家所渴求ê神迹。

人所遗弃ê，神拣选伊。二十七年前出生就无眼球而被生母抛弃tī义光育幼院ê韩义明，由当时德国惠明盲人基金会派来台中辅导惠明盲校ê韩牧师夫妇 ( CHRISTIAN & BRUNHILDE HEINRICH ) 领养，并带tńg来德国苦心教养。二年前韩义明tùi Herford音乐学院毕业后，养父母就带伊tńg来台湾寻根，并应邀tī国家音乐演奏厅演出小提琴、钢琴kap管风琴。Che应验了约翰福音第九章第三节，耶稣回答门徒讲：「伊瞎眼kap伊家己或伊父母ê罪lóng无关系，而是beh tī伊身上彰显上帝ê能力。」韩义明有今á日ê成就，m̄是真明显ê神迹mah？

二年前tī双连教会举办ê「爱hō͘咱聚集做一伙」ê音乐见证会，由韩义明kap西罗亚盲人合唱团联合演出，韩义明ê养母kap伊本身ê见证，流露出神ê大爱所产生ê真情，感动真chē现场观众目屎流落来。

今年应视障音乐基金会邀请来台做「关怀视障慈善音乐会」巡回演出ê韩义明，由伊ê未婚妻伴行。韩义明二年前受西罗亚盲人合唱团ê感动而决定学声乐，tńg去德国后就筹组四重唱，伊唱男低音，无久就kap唱女高音ê依芙兰同谱恋曲，进一步koh订婚。

接受大众传播访问时，伊常被问道：「你生做chiah-ni̍h súi，身裁mā比韩义明高出半个头，歌koh唱得chiah-ni̍h好，什么力量促成hō͘你决定kap伊订定终身大事？」依芙兰lóng是面带微微á笑lóng无做作地回答讲：「韩义明kap一般人无什么无仝款，阮有真chē仝款ê所在，真谈得来，对未来有美好ê规画，愿神带领阮。」

有ê人问伊父母是m̄是反对，伊讲：「我ê父母tī未正式认bat kap了解韩义明chìn前，当然反对我kap一个盲人结婚。M̄-koh，in知影韩义明是一个有教养ê乖gín-á，koh tī音乐上有超过常人ê造诣，反对就变成认同kap接纳。但是，我母亲iáu是担心我tī生活上会为照顾一个失明ê人而koh-khah辛劳。Ē-sái讲是韩义明是一个真独立ê大男人，目前一个人tī伊服务ê教会附近租屋，无忧无虑地独居生活，所以我不挂虑chit件事。阮真情ê相爱，tī神ê带领下，一定有美满ê生活。

五月十六日到高雄“关怀视障慈善音乐会”演出时，阮一落飞机就先去探访陈博文牧师，伊是视障音乐基金会ê发起人之一，基金会成立了后就被聘为顾问，伊虽然破病tī眠床，iáu时时刻刻关心阮，支持阮ê事工计画。伊一再叮咛我boeh继续推动“百万残障福音布道巡回演唱”，安排西罗亚盲人合唱团kap高雄手语教会诗班共同演出，由身体残障者tùi心灵唱出福音歌曲，来拯救hiah-ê心灵残障ê灵魂。陈牧师ê每句话，深深刻tī我ê心中，愿神赐我有智慧kap力量来追随陈牧师ê“残障福音”脚步。

认bat陈牧师了后，我就对hit位推动“轮椅牧师”四界宣讲“残障福音”ê陈牧师娘林秀卿女士敬佩无停，tī神ê恩典裏相揽真情真爱。看了“跨越藩篱――陈博文牧师光kap盐ê见证”了后，我感动得禁bē-tiâu目屎流落来，he是陈牧师娘ê“相揽真情”hō͘我流目屎。伊欣然接纳陈牧师ê肢障而kap伊厮守终生，m̄-nā照顾差不多bē-tàng动 ê陈牧师生活起居，教养二个cha-bó͘-kiáⁿ，iáu推动“轮椅牧师”，tī四界lóng是障碍ê台湾环境中，以爱化解碍，m̄惊辛苦为“残障福音”而奔忙，hō͘咱chiah-ê身体健全ê人感觉惭愧无停。

Tùi以上亲身接触tio̍h ê“相揽真情”，我深深体会到只有神ê恩典kap爱chiah ē-tàng产生chit股真情，mā只有相揽真情chiah ē-tàng实践神ê爱。愿神是爱ê福音ē-tàng hō͘每一个人tī家己扮演ê角色上相揽真情，神ê国度早日来到咱人间。

［台湾教会公报2259期1995.6.18］