《趁iau2日时》

 | | | 转寄

视障音乐基金会成立酒会致词

作者 林俊育 2008.07.27

各位贵宾：

事(tāi)先我谨代表视障音乐基金会，多谢各位百忙中拨空来参加本基金会ê成立酒会，共同分享chit份喜乐。

今á日应该先请台湾ê盲人ê父陈五福博士，mā是本基金会ê名誉董事长来勉励咱，但伊去日本接受身体检查而bōe-sái来，ài我代伊向各位致意。本基金会第一pái发起人会议，承蒙陈五福博士亲临指导，hō͘咱真大ê鼓励，本基金会chiah ē-tàng如期顺利成立，真该多谢伊ê精神领导。

视障音乐m̄是咱开创ê，tī台湾早就有啄木鸟乐团、西罗亚合唱团、喜乐四重唱kap乌门乐团等享誉国内外ê视障音乐团体。Koh-khah有二十七年前出生tī台湾，生落来就无眼球ê韩义明，被德国惠明盲人基金会派来台湾辅导台中惠明盲校ê韩牧师［CHRISTIAN HEINRICH］夫妇领养tńg去，tī德国ê大环境造就下，韩义明已成做管风琴、小提琴kap钢琴ê音乐家，二年前头pái回台tī国家音乐厅演出，今年五月中，本基金会将邀请伊来台kap国内视障音乐家同齐巡回演出。Chiah-ê lóng是视障音乐基金会成立ê催生剂，本基金会只是将in ê“视障音乐”理念整合起来，koh-khah希望ē-tàng tī各位热心人士ê支持kap赞助之下，将“视障音乐”ê理念发扬光大，造福koh-khah chē ê视障朋友。

我个人从事盲人事工七年来，深深体会到，盲人ê障碍m̄是看bē-tio̍h，却是社会大众对in ê不了解而产生ê歧视心态。我接触tio̍h ê真chē盲朋友kā我讲，伊ê失明m̄是残障，只是比较无方便而已。所以遇tio̍h盲朋友时，用你ê手臂hō͘伊扶tio̍h而引chhōa到伊beh去ê所在，mài牵tio̍h伊行，因为伊家己有脚ē-tàng行。Kā失明人ê无方便变成方便，是咱明眼人ê责任。视障音乐基金会就是beh tī台湾为视障朋友，开创一个教育、就业kap生活机会平等ê大环境。

有一种比肉体残障koh-khah悲惨ê心灵残障，台湾工商发达了后，社会风气败坏，心灵残障koh-khah严重，只有爱心ê实践，chiah ē-tàng化解心灵ê障碍。静宜大学李家同校长最近拜访印度德蕾莎修女后，写落来一篇大作「hō͘高墙倒下pah」，iáu有台湾目前siōng畅销ê册，林清玄名作家ê「phah开心内ê门窗」，lóng是tī强调以爱化解碍ê实践。视障音乐基金会mā是beh透过音乐，来实践以爱化解碍ê社会运动，愿大家共襄盛举，hō͘咱ē-tàng做得koh-khah真、koh-khah善、khah súi。

有关视障音乐基金会ê宗旨kap boeh办ê业务，请「视障音乐」理念ê开创者张育豪执行长来做koh-khah详细ê报告。最后敬祝各位身心健康，万事如意。多谢。
1995.1.5