《趁iau2日时》

 | | | 转寄

爱hō͘咱聚集作一伙

作者 林俊育 2008.07.20

上帝ê爱常hō͘不可能ê代志变成可能，mā只有上帝ê爱ē-tàng hō͘咱聚集作伙，彼此分享而成长。

今年4月25日，双连教会盲朋友联谊会主办一场「爱hō͘咱聚集作一伙」音乐见证会，由一位杰出ê台裔德籍盲人音乐家――――韩义明［DANIELHEINRICH)演奏钢琴、小提琴kap管风琴ê名曲kap宗教音乐，西罗亚合唱团mā参与演出，因团员tī惠明盲校时期kap韩义明三岁前有一段难忘ê童年回忆。

Hit暗四百gōa位听众m̄-nā聆赏一场优美动人ê音乐会，mā领受了一场由韩义明本人、伊ê养母(BRUNHILDE HEINRICH，大家叫伊韩太太)kap惠明盲校陈淑静校长娓娓道出「爱hō͘咱聚集作一伙」ê美好而感动人ê见证，那mā是韩义明ê故事。

韩义明1968年tī台北出生，生母见伊生落来就无眼球，心生惊惶he是上天ê责罚，tùi án-ne将伊放sak tī台北义光育幼院门口，义光育幼院无收养盲人孤儿ê经验，当时德国惠明盲人福利会(HILDESHEIMER BLINDENMISSION］派来台湾从事盲人福利事业ê韩牧师(REV.CHRISTIAN HEINRICH)kap韩太太知影chit件事，上帝ê爱hō͘ in夫妇一屑á to无迟疑地将韩义明接tńg去厝里照顾。三年后完成领养手续取名DANIELHEINRICH，tī 1972年tòe父母回德国定居。

1973年开始学习小提琴，1978年学习钢琴，1984年学习管风，1988年进入HERFORD音乐学院主修教会音乐。旧年毕业，今年四月一日韩牧师kap韩太太带韩义明tńg来到伊ê出生地。

西罗亚合唱团tāi先演唱「上帝是爱」kap「创世纪选曲」phah开音乐晚会ê序幕，当西罗亚团员手牵手慢慢行落台阶，韩义明mā tī到维也纳主修钢琴现任西罗亚合唱团伴奏ê卢惠慈老师引领下，慢条斯理地行到钢琴位子坐落来，观众凝神注目身穿燕尾服ê盲音乐家。Chit时全场鸦雀无声，大家以怀疑ê眼神等待伊ê第一个琴音。因为chit位二十五岁ê盲人青年音乐家对大家来讲，实在新鲜得hō͘人有点á m̄敢相信，tú亲像彭德贵牧师tī开场致词时讲ê「咱明眼人boeh学一种乐器lóng无简单，生落来就双眼失明ê韩义明却ē-tàng以二十五岁ê年纪，演奏高难度ê钢琴、小提琴kap管风琴ê世界名曲，che就是约翰福音第九章第三节耶稣回答门徒讲：「伊眼盲kap伊家己或伊父母ê罪lóng无关系，而是beh tī伊身上彰显神ê大能力。」

一阵鸦雀无声了后，韩义明ê双手tī琴键上悠然地动起来，ARAM CHATSCHATURIAN 作曲ê TOCCATA 钢琴曲带hō͘听众无限ê感动kap由衷ê赞赏。当伊离开钢琴座位，the̍h起小提琴行到面向观众ê台顶，一位观众问我：「伊目睭hiah-ni̍h明亮，为何讲无眼球?」我回答讲：「he是 ARTIFICIAL (人造ê)。」伊终其尾心服地静落来。

韩义明chit时正手举起琴弓，面ǹg倒pêng微偏对tio̍h钢琴伴奏ê卢惠慈老师，真有默契地点一下头，A. DVORAK 作曲ê SONATINA 第1、2乐章小提琴协奏曲叫每一位听众ê心弦tòe那优美ê旋律跳动，虽然聆赏ê听众意犹未尽，但koh再美好ê乐曲mā有终了ê时chūn。

台中惠明盲校服务三十七年ê陈淑静校长siōng了解韩义明ê成长过程，特别tùi台中赶来向听众述讲伊ê感言：「四月四日tī国家音乐厅听韩义明ê音乐会，我当场感动kah禁bē-tiâu目屎流落来，mā勾起二十五年前有关韩义明动人ê回忆。韩义明今á日ê成就证明了上帝超越koh无条件ê爱，我mā感触到世间父母ê爱是有条件ê，韩义明ê生母见伊无眼球á准备饿死伊，据阮估计大约有一个礼拜无饲伊食物件。伊耐命竟然ē-tàng无死，mā是beh来证明上帝无限ê爱。当时德国惠明派来台湾kap我同工ê韩牧师kap师太太眼见che弃婴只chhun皮包骨，如瘦猴般pháiⁿ看，韩牧师kap韩太太来台ê使命就是beh推展盲人福利事工，in使命tī身，毅然决定抱tńg去养。
三年后,韩义明成长成(chiâⁿ)做乖巧而活泼ê gín-á，会讲台语、华语、德语kap英语。韩牧师tī台任务完成beh tńg去德国ê时chūn，in夫妇决定boeh正式认养kā韩义明带tńg来德国。二十二年来，韩牧师kap韩太太一定经历真chē苦心，当然德国ê大环境造就了chit位少年ê盲音乐家hō͘咱赞叹无停。当时如果韩义明留tī台湾，咱ê大环境siōng chē mā hō͘伊成做kap西罗亚团员仝款而已。今á日在场ê十八位西罗亚团员ê中间有十六位是惠明盲校ê毕业生。
双连教会对西罗亚ê栽培，我真放心，mā希望koh-khah chē教会来关心残障同胞。今á日韩义明ê故事启示咱共同努力tī台湾创造kap德国仝款ê大环境。」

续落来由许梅芳小姐用古筝弹奏「恒春恋曲」，伊来自金门，tùi惠明盲校毕业，tī西罗亚合唱团唱女低音。Chit时韩义明tī台下当听众，沉醉地欣赏那新奇而美妙ê台湾民谣。

大家期待已久ê韩义明ê见证分享由留德ê张思聪牧师担任翻译，伊笑笑ê先用台语讲：「平安！我bē晓讲台湾话，失礼。」续落来伊讲：「真欢喜今晚kap大家分享中国音乐，回台将近一个月，真chē朋友对我真好，感谢上帝。我父母注意tio̍h我自小就爱声音，所以kā我送到音乐学校，五岁学小提琴，十岁学钢琴，讲真正我无爱钢琴，因为那siuⁿ大声，我十六岁就开始学koh-khah大声ê管风琴。我学琴siōng大ê困难是bōe-sái看明眼人ê乐谱，起先靠录音带。感谢上帝ê恩典kap爱，我克服一切困难来学我所ē-tàng学ê音乐。后来我学会晓点字谱，hō͘我koh-khah容易学钢琴kap管风琴，但挨(e)小提琴tio̍h用双手就无空手来摸点字谱。一生中tú-tio̍h真chē困难，但上帝ê爱hō͘我lóng ē-tàng克服一切困难。我肉眼虽看bē-tio̍h，但我绝对无怀疑过上帝ê爱。音乐是世界ê共同语言，通过音乐我ē-tàng传扬上帝ê爱，kap大家分享，今后我希望ē-tàng tī教会工作，事奉上帝。

应韩义明要求听中国kap台湾ê音乐，音乐会除了安排古筝外，韩义明见证后，由tùi文化大学音乐系毕业ê盲朋友刘于新先生用中国笛演奏「荫中鸟」。

续落来，朴素而慈祥ê韩太太上台boeh kap观众分享「义母ê爱」，台下hō͘ in siōng热烈ê掌声。伊本来答应讲台语，但离台二十二年来lóng无机会讲台语，面对chiah-ni̍h-chē听众mā会紧张，所以用几句台语请安后，就请伊tī台同工五年ê陈淑静校长翻译伊ê英文。伊轻声细语地讲：「韩义明ê故事大家lóng听了bē少，我无koh重复，但我必须kā大家讲一件真有意义ê事。当韩义明开始bat代志就问韩牧师kap我讲：『 STEPHAN kap FRIEDERICKE 是lín亲生ê儿女，我m̄是lín亲生ê，那我是tùi tài来ê neh?』韩牧师kap我lóng认为应该照实讲，而且必须小心回答chit-ê问题。阮祈祷后，上帝指示阮对韩义明讲：『你是上帝hō͘阮ê礼物，阮tī台湾ê时chūn，有位太太将你用布包tio̍h送来hō͘阮ê礼物，全世界无人像阮án-ne得tio̍h chiah-ni̍h好ê礼物。后来韩义明常常骄傲ê对人讲伊是父母ê大礼物。我得tio̍h好ê礼物，tio̍h讲多谢，感谢上帝chit份礼物带hō͘阮真大ê喜乐。」

主持人陈文钦牧师讲：「韩义明出生tī台湾，tī德国受栽培成做宗教音乐家，che hō͘咱真大ê启示，各位若有感动，请为伊ê koh再深造奉献。」韩义明收下新台币58,413.00，伊感激万分地向观众深深作了个大鞠躬。

西罗亚合唱团ê吴月云团长代表主办单位致谢词讲：「上帝无应允天永远是蓝ê，二十五年前韩义明弃婴被韩牧师夫妇收养，上帝ê爱开始充满in之间。讲tio̍h我们台湾无仝款，残障福利法规定政府机关ài雇用百分之二、民间企业ài雇用百分之一ê残障人士。但到目前为止，百分之九十以上ê企业宁可缴罚款mā无愿意雇用残障人士。上帝教咱ài关怀照顾那siōng微小ê，残障人士需要大家扶伊一kā，伊就ē-tàng khiā起来，韩义明是siōng好ê例。感谢今晚ê演出单位，koh-khah感谢各位观众ê掌声鼓励kap支持。」

西罗亚合唱团koh再唱「你ê梦」(林声翕曲)kap「妈妈请您mā保重」(萧泰然曲)了后，压轴ê韩义明管风琴演奏tī震耳ê掌声下开始。「NIKULAUS BRUHNSE小调」kap「ZOLTGALDONYI(圣咏)二曲tī伊纯熟ê双手双脚并用弹奏下，观众无不赞叹伊m̄免看谱就ē-tàng弹出chiah-ni̍h震撼人心ê大曲，ē-tàng讲伊是tī「显明上帝ê大权能」。最后ê掌声继续二分钟以上，che是我一生感触siōng深ê音乐见证会，心中一再teh唱「爱hō͘咱聚集作一伙」。
1993.9.28.