《趁iau2日时》

 | | | 转寄

如果乌暗无尽头――Thài会无ài hō͘音乐燃烧生命？！

作者 林俊育 2008.07.13

Tī一阵有心人士ê推动下，经过一年gōa ê筹备kap募款，财团法人台北市视障音乐文教基金会，终其尾tī一九九四年十一月二十五日登记成立。

大力推展「视障音乐」理念ê张育豪，mā当然被推举为基金会ê执行长。伊一开始就hoah出「如果乌暗无尽头，thài会无ài hō͘音乐燃烧生命？！」ê口号，因为文化大学音乐系第一名毕业ê张育豪认为：学习音乐对视障朋友来讲siōng无障碍，颠倒因目睭看bē-tio̍h，听觉特别灵敏，有ê koh-khah有绝对ê音感。

台裔德籍ê视障音乐家韩义明就是一个真好ê例，二十七年前，伊是出生tī台湾无眼球ê弃婴，经德国惠明盲人基金会派来台湾辅导台中惠明盲校ê韩牧师领养，并tī伊三岁ê时chūn正式认养而带tńg来德国教养，tī德国ê大环境下，伊学习小提琴、钢琴、管风琴kap声乐，如今成做杰出ê音乐家，音乐就是伊生命ê全部。

视障音乐基金会成立后，马上邀请chit位视障音乐siōng好ê模式回台，kap国内ê视障音乐家共同演出七场「关怀视障慈善音乐会」。我是基金会ê负责人，旧年四月亲自到韩义明tī德国汉诺瓦ê厝拜访，并做正式ê邀请。伊一屑á to无迟疑地答应，并且讲beh chhōa伊ê女朋友同齐来。

一九九三年四月，韩牧师kap韩太太带韩义明回台，我tī he时chūn kap in认bat而成为好朋友。韩义明hit时听了西罗亚盲人合唱团ê演唱，真受感动而对我讲，伊tńg去了后boeh学声乐唱歌，下次回台时boeh kap西罗亚同齐唱。伊tńg去德国了后就开始学声乐，mā参加四重唱主唱男低音，tùi án-ne认bat唱女高音ê明眼人依芙兰 ( FRANZISKA EBER )。今年年初，我收tio̍h in订婚ê好消息，chit种透过音乐而lóng无障碍地相揽真情，hō͘人赞叹无停，愿神永远祝福伊两人。

国内参加演出ê团体有西罗亚合唱团、啄木鸟室内乐团、台中启明学校Ê国乐团，个人有张育豪ê小号、林德昌ê独唱、曾宜臻ê二胡、徐百香ê独唱。个个lóng有优异ê表现，hō͘社会大众了解in肉体ê目睭虽然看bē-tio̍h，心灵ê目睭却是明亮ê，koh-khah透过音乐燃烧tio̍h生命ê火花，鼓舞一kóa心灵残障ê社会人士，照亮乌暗ê角落。

演出ê地点是tī台北市社教馆、台北市双连教会、高雄市文化中心、台中市中兴堂、东海大学、史怀哲之友会和罗东教会。场场lóng phah动bē少听众ê心，加上有kóa新闻媒体ê大篇幅报导，尤其是全民电视台tī「晚安，台湾」ê节目中，做四十五分钟ê现场采访，社会大众对视障朋友一定有koh-khah深ê了解，进一步koh-khah接纳in，che mā是基金会举办「关怀视障慈善音乐会」ê主要目的之一。

最后一场tī罗东教会ê音乐会siōng动人，che是应慕光盲人重建中心创办人陈五福博士之特别邀请而追加安排ê，时间是tī韩义明离台ê前一工。三个礼拜落来ê北中南巡回演出，韩义明已有小khóa倦态，伊ê未婚妻依芙兰koh-khah因无适应冷气而咙喉失声。搭配演出ê西罗亚合唱团，前夜ê按摩工作，hit工早起到三重市三角埔教会诗歌见证，下晡赶坐游览车到罗东，身心ê倦tah-tah thang想而知。

M̄-nā是演出人员thiám loh，连只负责连络安排ê我mā有点á喘不过气来。但是，tī乌暗中燃烧ê生命火花，tī最后一场显得特别艳丽。四百gōa位满怀爱心ê听众，聚集tī ka-nā ē-tàng容纳三百人ê罗东教会，台顶台下满溢tio̍h生命ê热情。演出者透过音乐表现对生命ê o-ló，phah动听了感动ê观众并以热烈ê掌声来回应，koh-khah hō͘演出者掩不住生命火花ê笑容。我用摄影机录下che动人ê场面，透过伸缩镜头摄取tùi视障音乐家心灵绽开ê生命火花，感动kah不时潸潸目屎流落来。

音乐燃烧生命ê火花永远亮丽无比，送韩义明kap依芙兰去机场时，in hō͘我一个红包，phah开一看是一张伊两人签名ê新台币三万元「有效支票」，in ài我tùi汇hō͘ in ê演出费中the̍h三万元来，奉献hō͘我最近成立ê「关怀视障研究发展中心」。Chit种回馈ê爱心，我认为出自一朵音乐燃烧ê生命火花是真自然ê代志。我心领伊两人ê心意收下红包袋，交待研发中心ê吴敏惠主任，将那意义重大ê「支票」镶起来永远保存。我将伊两人ê演出费全数汇hō͘ in，请in teh-beh奉献ê三万元留做深造或是买新小提琴之用；韩义明ê母亲bat kā我讲，伊ê小提琴太老旧了。

我全程参与chit-pái ê「关怀视障慈善音乐会」，视障音乐家tùi心灵深处燃烧ê生命火花，mā点to̍h我生命ê火花，hō͘我ē-tàng「忙」á不「盲」。感谢所有参加演出ê视障音乐家，koh-khah希望in ē-tàng继续燃烧社会ê生命火花。
1995.6.15