《趁iau2日时》

 | | | 转寄

真诚ê忏悔

作者 林俊育 2008.07.06

哲人讲：「蜡烛无心不燃，燃烧虽然落目屎，却照亮乌暗ê世界。」

西罗亚盲人合唱团是一阵有「心」ê视障朋友，tī有「心」社会人士ê关怀kap鼓励下，体会tio̍h神ê爱tī燃烧in ê生命，不辞夜间按摩工作ê辛苦，花费比明眼人koh-khah chē ê时间勤练歌唱，到教会、监狱、戒毒所kap学校，以美妙动人ê歌声kap见证，来抚慰受创伤而残障ê心灵，并照亮乌暗ê世界。

辅导chit-ê合唱团七年gōa来，chiah-ê点to̍h ê蜡烛mā常照亮我个人阴时偶阵雨ê心灵，tùi in对社会大众爱ê关怀，我koh-khah体会tio̍h神ê真理kap爱ê力量，hō͘不可能ê lóng变成可能。Chit群视障朋友ê歌声kap见证，hō͘一个死刑犯忏悔而得tio̍h重生，终其尾假释出狱，重新作人。Che是何等ê力量？！我愿kap读者分享chit-ê感动人ê故事。

一九九一年一个秋高气爽ê午后，西罗亚合唱团tī台南监狱，以优美ê歌声kap动人ê个人见证，来抚慰受刑人创伤ê心灵。大约过了一个gōa月，我tī一个报纸ê副刊上，看tio̍h一篇属名台南监狱受刑人李士依先生ê「重生、烧热目屎、恩典」文章，其中一段写讲：「会记得有次是西罗亚盲人合唱团ê演唱，见in手牵着手，和悦地行向舞台。Hit种残而不废ê坚定意念，到taⁿ感佩犹深；尤其是in透过歌声，m̄-nā细诉坎坷岁月，kah-ná mā唱出我内心苦楚ê沧桑，当场禁bē-tiâu烧热ê目屎涔涔流落。真正ê歌声一如真理ê福音，到taⁿ iáu tī我心深处缭绕。」

我真自然tek涌起kap李先生认bat ê念头，随时写一封信，并将手中所有西罗亚ê简介、通讯、我写ê有关西罗亚文章和合唱团ê录音带，用挂号包裹寄到台南监狱hō͘李先生，希望以西罗亚合唱团爱ê关怀，ē-tàng hō͘一个受刑人tī神ê面前真正忏悔，koh再活出有意义ê人生。

包裹寄出后，就tńg来到波士顿。但无久了后，我ê台北公司传真李先生ê回phoe hō͘我。清秀ê毛笔字kap词意通顺ê信，hō͘我印象深刻，那完全忏悔而决定向善ê坚定意志，koh-khah hō͘我感觉西罗亚合唱团歌声中爱ê关怀，力量之总是ē-tàng以用排山倒海来形容。政府花chiah-ni̍h-chē钱盖hiah-ni̍h chē监狱，讲是beh管训犯罪ê人，其效果却无如残而不废ê西罗亚盲人合唱团，爱ê力量之大，真是不可思议ê事。

李先生信中讲伊十五年前嗜赌如命，赌输了就借酒麻醉家己，过tio̍h行尸行肉般ê生活。就是tī醉茫茫ê时chūn，伊杀死来ài赌债ê人而被判死刑，有次全国大赦改为无期徒刑，koh一pái大赦改为三十年有期徒刑。茫茫无期ê牢狱生活，伊mā认命he是罪有应得，唯一bōe-sái释怀ê是愧对太太kap二个无辜ê gín-á，一男一女mā lóng读国中了，lóng由太太含辛茹苦地抚育，每想tio̍h家己悔无当初，就心痛如绞，mā只有多写phe hō͘儿女，来补偿对儿女ê愧疚。

李先生iáu kā我讲伊太太kap儿女tī台北ê电话，ài我有空去关怀in。我人常tī美国，只好将chit件事交hō͘教会ê陈牧师，tī陈牧师ê探访kap关怀了后，李太太mā有tang时á来教会。我mā利用回台ê机会kap伊tī教会见面交谈，遗憾ê是伊受害太深而一直请求李先生同意离婚，thang hō͘伊ē-tàng tùi新tī社会上khiā起来，但李先生却绝无回答应。我kap李先生通过二十几封信，知影伊tī西罗亚合唱团ê感动了后已深深忏悔而决志重生，但我怎样解释，李太太lóng讲伊绝对m̄相信。李先生mā tī深觉家己亏欠太太而晓明大义了后，终其尾签下离婚同意册hō͘伊太太。

获知李先生假释出狱，我为伊欢喜之外，koh-khah期待西罗亚合唱团ē-tàng继续以点to̍h ê蜡烛，照亮hiah-ê苦楚而乌暗ê心灵，phah开心内ê门窗，接纳神ê爱kap真理，活出有意义而喜乐ê人生。Koh-khah希望有「心」ê社会人士，kap有「心」而点to̍h蜡烛ê西罗亚合唱团同齐燃烧，那燃烧ê落目屎必mā有喜乐，koh-khah会带来光明而和谐ê世界。
1995.8.13