《趁iau2日时》

 | | | 转寄

为生命欢唱

作者 林俊育 2008.06.29

生命是何等ê伟大，值得大家来欢唱！生命是来自创造宇宙ê独一真神，值得大家来尊重！

人道主义ê史怀哲博士提出「敬畏生命」，并以一生ê奉献来实践chit种高超ê人格，mā成做后来跟随者ê准则。台湾第一个奉行「敬畏生命」ê，应该算是有「台湾史怀哲」之美誉ê陈五福医师，伊一生奉献hō͘视障朋友ê「慕光精神」，mā就是「敬畏生命，服务视障」。

最近常看「尊重生命，关怀交通」kap「尊重生命，向毒品讲不」等标语，但我感觉siōng具体而有意义ê是，今年十一月十一kap十二日，由高雄市中正教会联合中华民国残障人协会kap台湾基督长老教会残障关怀中心举办ê「为生命欢唱音乐晚会」，因有「双连教会西罗亚盲人合唱团」、「手语诗班」kap bat是心灵残障而蒙耶稣基督救赎ê蒋忠先生等活活ê见证，加上青年归主协会廖明发强而有力ê信息，应呼召而决志信主ê有一百gōa人，盛况空前。但策画全程ê陈仪裕牧师tī主日崇拜中讲：「遗憾ê是，咱准备ê陪谈员无够，希望各位会友ē-tàng向主讲：『我tī chia，请差遣我。』」

西罗亚合唱团tī中正教会ê主日崇拜中诗歌见证，in虽然肉体目睭看bē-tio̍h，却tùi心灵ê深处唱出生命ê讴歌，阐明「西罗亚=奉差遣」ê意义，并震撼渴求生命喜乐ê与会会友。Hō͘我siōng感动ê是，tùi周报看tio̍h顶礼拜ê教会主日崇拜奉献金额是 6,118 元，hit工为西罗亚合唱团事工ê奉献高达 35,000 元。

一个残而不废koh「奉差遣」四界用诗歌见证神ê爱kap大能力ê合唱团，团员心中充满tio̍h神ê大爱，m̄免看谱kap词（其实肉眼看bē-tio̍h，但脑中背有一百首以上ê歌曲），完完全全将心中ê感情唱出，mā就是真正为生命欢唱，ná亲像一股tùi山谷流出ê清水，hō͘干渴已久ê心灵重新得tio̍h滋润，koh再真正「看得tio̍h」耶稣基督ê「生命、真理kap道路」。「为生命欢唱」是何等ê喜乐！何等ê伟大！