《趁iau2日时》

 | | | 转寄

西罗亚=奉差遣，西湖之行

作者 林俊育 2008.06.22

1988年底，双连教会基于关怀弱势团体，成立全台北市盲朋友联谊会。其中几位kah意歌唱ê会员发起成立诗班，in大多是tùi台中惠明盲校毕业，lóng有宗教音乐ê基础。Tī李凤珠老师ê耐心指导下，利用职业按摩工作之余，每周一、五ê上午十点到十二点，不辞辛劳而努力无放轻松地练习。

因为诗班渐渐茁壮，对外演出mā日渐增多，大家便开始脑力激荡来为chit-ê诗班命名。最后由卓忠辉牧师tī一九八九年九月十日ê主日讲道中，以约翰福音第九章「耶稣治好生落来就瞎眼ê人」，来阐明瞎眼kap伊家己或伊父母ê罪lóng无关系，而是beh tī「瞎而不废」ê人身上彰显神ê大能力。耶稣讲：「我是世上ê光」，便用唾沫kap泥巴抹tī chheⁿ-mê ê目睭上，教伊去「西罗亚」池子洗目睭，结果医好了伊ê目睭。

「西罗亚」ê意思是「奉差遣」，in ê肉眼虽然看bē-tio̍h，心灵ê目睭却是明亮ê，所以愿被神差遣，以优美ê诗歌来事奉。团员就决定正式取名为「西罗亚诗班」，对教会外则称「西罗亚合唱团」。

「奉差遣」当然是beh行出教会而进入社会，除了应邀到其他教会诗歌见证外，iáu主动到监狱kap国中去唤醒迷失ê灵魂，koh-khah kap伊甸残障福利基金会附设ê伊甸福音中心合办「以爱化解碍」百万残障福音巡回布道会。

西罗亚合唱团有一个心愿到戒毒所去慰藉并鼓舞受毒害ê同胞，但一直bē-tàng其门而入，只是khǹg tī祈祷中。圣经kā咱讲「tī人bōe-sái，tī神则ē-tàng」。今年五月二十一日，tī中华基层福音差传会西湖福音中心ê戴彼得牧师安排下，西罗亚合唱团去西湖国中诗歌见证后，到设tī西湖乡ê「基督教晨曦会苗栗戒毒辅导村」，kap二十几位晨曦兄弟共进午餐。

午餐后是晨曦兄弟为二位兄弟beh去泰国戒毒辅导村事奉ê惜别会，阮一阵真欢喜应邀参加。晨曦兄弟们全体合唱二首福音诗歌来祝福beh去泰国戒毒所服务ê二位兄弟，经单位主管ê同意，我将全场录影落来。

In ê歌声宏壮而铿锵有力，hō͘我一种莫名阵阵震撼ê感觉，koh再通过伸缩镜头ê拉近，我tùi各种角度看出chit群决心弃绝毒品ê青年们面上表情，in he-ni渴望神用福音ê救赎，看in he-ni尽心、尽力、尽性koh尽情地唱，in迫切希望透过福音诗歌来疗伤，肯定神一定ē-tàng tī-chia hō͘ in拾回生命ê价值。Chiah-ê有信心koh有把握ê情感tùi嘹亮ê歌声中传达出来，听in用强而有力ê高声o-ló耶稣时，无无为之动容而潸然目屎流落来。

由组长绍介西罗亚合唱团ê事工使命后，晨曦兄弟们koh再唱一首「西罗亚池ê神迹」来表示对团员ê欢迎。我辅导西罗亚合唱团五年gōa来，第一pái听tio̍h chit首歌，其意义非凡，特别录下kap读者分享。

「我tī he乌夜ê暗时，往何处去chhōe黎明。虽然有钟响kap鸡叫声，但我目chiu前照常是乌暗。当我初见主面ê时chūn，iáu是冷冰冰ê清早。我tùi你慈爱ê眼中，看见光明灿烂黎明。［副歌一］oh！主，我ê主，我tio̍h感谢你，你赐我án-ne ê恩典。恳求主，叫我永远mài tùi-án-ni美境中醒过来。［副歌二］oh！主，我ê主，你赐我光明，tī奇妙西罗亚池裏。恳求主，叫我永远沉浸tī che美梦ê医治中。」

西罗亚合唱团mā应邀唱「阮若phah开心内ê门窗」kap「点to̍h ê蜡烛」来回应，感性而动人ê歌词加上柔美ê歌声，出自一阵残而不废盲人ê口，m̄免看谱而出自内心koh无指挥ê合唱，hiah-ni̍h和谐koh hiah-ni̍h优雅，想必phah开了晨曦兄弟们心内ê门窗，接受耶稣基督作in ê救主，像点to̍h ê蜡烛去照亮罪恶kap乌暗ê世界，拯救hiah-ê迷失tī毒品中哀号待救ê灵魂。

［西罗亚通讯第五期,1995］