《田岡良食筆尾》

 | | | 轉寄

海漲人食罪？

作者 田岡良 2011.05.15

Beh 正式上課進前，T 開講話仙，講著東京都知事石原慎太郎對日本地動 kap 海漲 ê 發言，石原提起著日本人道德崩敗，包括老長壽 ê 囝兒 sī 細隱瞞爸母過身，來 sia̍p 養老年金就有幾若百件 hiah 濟，毋 chiah 石原認為海漲是 beh 洗蕩日本人 ê 罪惡。

H 反對 chit –ê講法，伊講，就準海漲 hām 地動是為著 beh 洗盪罪惡，毋過 he 災厄究真無生目睭，失德者可能無拍 khih 角，顛倒是濟濟無辜 ê 人或是著傷或是無命，T 自按呢用「共業」來回應，講：就 ná 親像制度頂懸有所謂總統國務機要費 ê 問題，無分是啥人，攏 tio̍h 做伙承擔。

Kài 心適 ê 一點是：T kap H 攏是基督徒。

轉--來了後，斟酌 kā 想，深深感覺 hit 款 kā 苦厄當做有特殊目的 ê 言論，窮實 chiâu 不止仔危險。以基督教 ê 信仰來講，表面上，舊約 ê 神 ká-ná 是一個取「族群／民族」做賞罰寸尺 ê 神，伊揀選以色列族，嘛定定愛以色列人 tī 戰爭 ê 中間，將某一個族群全滅（例：撒母耳記上 15 章）；相對舊約，新約內底 ê 神 ná 親像是 kā 眼光 hē 來踮個人身軀頂，揀選 ê 限界，嘛無閣取某 mih 族群來做區別，上帝看待個人有 hiah-nī 仔點 tîn,耶穌是以有 kah 逐枝頭毛來比論--ê(馬太福音 10 章 30 節）；總--是，chit 款舊約／新約 ê 分界，嘛毋是絕對，以舊約來講，猶原 ē-tàng 看著上帝對個人 ê 注目，比論：上帝對以諾、挪亞、亞伯拉罕、以撒、約伯 hām 大衛等等個別施恩典，甚至當上帝決定 beh kā 所多瑪城無分男婦老幼一盡剿滅 ê 時，伊也 àⁿ 耳聽亞伯拉罕 ê 祈求，為著內底 he 少數 ê 好人，無 beh 無分無會總thâi(創世記 18 章），ùi chit-ê角度來看，beh 講基督教 ê 上帝，是一個因為罪惡，見烏著 tak ê 主宰者，ká-ná 嘛無足正確。

當然，聖經本身就是 kài 矛盾--ê,也因為按呢，無贊成頂懸看法 ê 人，永永有才調舉出濟濟反例（比論：做大水將世界毀滅，kám 講挪亞一家伙仔以外就攏無好人？）關係 che,我無話 thang 說。

我想 beh 講--ê kan-taⁿ 是：設使人若相信大自然 kap 萬項 mi̍h ê 後壁，有某一種意向或者是規則 teh 運作，按呢，上好是相信 hit-ê意向 ê 主體 ia̍h 規則 ê 內容，是直透善良、全全平正、萬項攏知--ê,任何有神論 ia̍h 因果論者，若對 chit-ê基本假設來 póe 喙，恐驚仔攏無法度 phiah 免虛無主義來 tak 纏，咱 kā 想，若 chit 世間根本無最後 ê 一條限界，嘛無啥 mih 究極 ê 道理，一切，chiâu 是自然 tek、隨機 ê 運作，或者是講，有破 phà ê 運作，按呢生，chit 號信仰，是 beh 按怎 ē-tàng 完全對無神論者、唯物論者 ê 學說來走閃？無神論者 ia̍h 是唯物論者 in 有 in 家己 ê 思想體系，包括個人 kiau 群體倫理，hām 究極 ê 理路，若是咱所有--ê,獨獨是一個加加減減 ē 濫sam刣人 ê 主宰者，按呢，hām 自底就無 chit 號主宰，到底是有偌濟精差？

我真懷疑，hit 款「罪惡 saⁿ-kap 承擔」、「群體內底 ê 無辜者受害 mā thang 看做是 beh 為群體洗蕩罪惡」ê 思想，事實上，是一款古代部落封閉社會 ê 思想喙殘（個人 kan-taⁿ 是群體 ê ke-si;用人來做祭 mi̍h 等等），若是 chit-ê推 (chhui) 論無毋著，就莫怪 chit 號集體性 ê 脈絡 hē 踮現此時個人主義 ê 思考 ē 跤，ē hō͘ 人感覺嶄然仔離經、荒譀--ah。