《田岡良食筆尾》

 | | | 轉寄

按怎chiâⁿ做聖潔？

作者 田岡良 2011.05.29

三禮拜前，經過一棟做神學院路用 ê 大樓，看著大門 ê 玻璃頂懸，有黏大字，用華語寫講：『成為聖潔，合乎主用』。

Chhím 看著 chiah-ê 字，我心內就極憢疑：「Thài ē beh koh "chiâⁿ 做聖潔？" Koh,人是"按怎 thang chiâⁿ 做聖潔？"」在我來看，chit 兩句八字，若 hē tī 基督教義 ê 下跤來稽考，根本是 kài 矛盾 ê 講法，基督徒--ah,恁按呢講，kám 攏 bē 感覺怪怪？

Tú-chiah 去查線頂聖經，taⁿ 知 chit 兩句是 ùi<提摩太後書〉2 章 21 節引--來-ê-ah，兩個版本 ê台語譯文列踮下跤：

所以人若潔淨家己 mài 做 chiah-ê 歹代誌，伊就 ē 做一個高尚 ê 用器，祝聖過來適合主人 ê 路用，無論甚物時 ē-tàng 做各種 ê 好事。(紅皮聖經譯本)

所以人若清氣家己脫離 chiah-ê,就 beh 做貴氣 ê 器具，chiâⁿ 聖，合 tī 主人 ê 路用，便便 thang 做逐項好 ê 事。(巴克禮譯本)

Ùi 頂 ē 文，咱真容易看出，chiah-ê 話，是屬 tī 款勸 ê 路用，要求人 tī 行放頂懸來配合，了後，chiah ē-tàng「chiâⁿ 做聖潔」。

總--是，若用「聖潔」chit 兩字去 chhiau 華語和合本 ê 翻譯，上無，koh thang 揣著下面 chit 兩段經文，先來看第一段（〈以弗所書〉1 章 4 節）：

上主創造宇宙以前就已經通過基督揀選咱來做伊 ê 子民，hō͘ 咱在伊 ê 面前 chiâⁿ 做聖潔無缺點--ê。(紅皮聖經譯本)

就是照伊創造世間 ê 代先 tī 基督揀咱，hō͘ 咱 tī 伊 ê 面前 chiâⁿ 做聖，無 thang 嫌。(巴克禮譯本）

Chit 段經文 kap 基督教信仰 ê 中心是 sio 黏蒂帶，伊講著講：人 thang 得著救贖，是因為上帝代先揀選基督徒，koh hō͘ 伊 chiâⁿ 聖（透過基督 ê 死來贖罪），che 是上帝 ê 工（已經完成 ê 工），基督徒 tī 上帝 ê 面前，是全無破 phah，攏無 thang 嫌--ê。

Beh saⁿ 同 ê 經文，koh 有下跤 chit 段（帖撒羅尼迦後書 2 章 13 節）：

主所寵愛 ê 兄弟--a,阮 tio̍h 常常為恁感謝上主。因為上主對起頭就揀選--恁，boeh hō͘ 恁倚靠聖靈來做上主家己 ê 子民，kap hō͘ 恁相信真理來得著救。(紅皮聖經譯本)

但是主所疼ê兄弟--ah,阮應該替恁常常感謝上帝，因為上帝 tùi 起頭揀--恁，beh hō͘恁得救，是在 tī 神 ê 成聖 kap 信真理。(巴克禮譯本)

Chia ê 經文 koh 一擺強調，人得著救，是上帝 ê 揀選（毋是人 ê 好，嘛毋是人做啥物代誌），而且，人 beh chiâⁿ 聖（chiâⁿ 做聖潔），tio̍h 倚靠聖靈（上帝 ê 神），kap 相信真理（因為相信 chiâⁿ 聖）。

Kah 若講，人 ē 用得 chiâⁿ 聖（chiâⁿ 做聖潔），就親像人得著救 sio-siâng,是獨獨倚靠上帝，毋是靠人家己，按呢，款勸人靠家己『成為聖潔，合乎主用』，kán 無 chiok 奇怪？？？Kám 講，che 是 teh 勸人去做一件「已經完成 ê 工事」？或者是，beh ài 人去做一件「上帝 chiah 做 ē 到 ê khang-khòe」？

Koh 來，「chiâⁿ 做聖潔」是啥物？相信，無人敢講是「行做 kap 講話攏無 têng-tâⁿ，日常生活攏無犯罪（聖經所定義 ê 罪）」，因為基督徒家己知影，無論是親身 ê 經驗、或者是別人 ê 情形、iah 是聖經 ê 教示，chiâu 指出 che 是無可能 ê 代誌。若是按呢，「chiâⁿ 做聖潔」就 kan-taⁿ 有可能是指「上帝看做聖潔」，雖然人犯罪、人無 ka-nn̂g,毋過，因為上帝揀選、耶穌替贖，上帝無照人 ê 行做來看--人，是半聲半就 kā「基督徒」看做「聖潔」，若準是按呢.....koh 款勸人 tio̍h「chiâⁿ 做聖潔」，毋是真 ke 工？？？

基督教 ê 教示，不時有 chit 款足矛盾 ê 情況--出-來，tī 我來看，ē 按呢生，有一個真重要 ê 動機，就是 beh 壓制人 ê 自我意識，ke-ke 減減看家己無，hō͘ 人甘願去趁教會內底 ê 權威 kap 權力者。

所致，教會一方面 kā 信徒講：恁 ē 得救是上帝 ê 恩，已經 chiâⁿ 聖，人無法度倚靠家己，kan-taⁿ 上帝 ē-tàng 救--人 hām 改變--人，koh kā 基督徒 phô͘ 做上帝 ê「王 kap 祭司」（〈彼得前書〉 2 章 9 節），總--是，教會凡勢真驚信徒無受控制，就翻轉頭，kā 人 ê tâⁿ 誤 koh sa 出來練，hō͘ 人無法度穩心仔做 chiâⁿ 聖 ê 王 kap 祭司，是顛倒跋轉去變做有罪、無 ka-nn̂g、ē 感覺見笑 ê 奴才...

教會--ah！親像 chit 款用家己 ê 話 tú 家己 ê 喙 ê 代誌，ē-sái khah 減--寡-無？