《台文通訊精選》

 | | | 轉寄

阿母a

作者 多城客 2007.09.02

頂禮拜tī教會，阿母a the̍h 200 kho͘ ê加票hō͘我，講是beh捐hō͘｢台文通訊」做共同發行人ê基金。伊是讀著「台文通訊」80期，聰美基金會ê緊急呼籲，知影基金會ê經濟發生困難，tō自動the̍h錢出來。我本來有一點á躊躇，感覺hō͘伊老大人出錢無啥好，m̄-koh伊ê查某kiáⁿ壽惠講：「無要緊，阿母a有錢leh。」，而且che也是阿母âe一片心意，所以我tō代替「台文通訊」kā錢收起來。

阿母a名叫李劉鸞，是多倫多台灣聯合教會ê會友，tī教會真受大家ê敬疼，攏叫伊「阿母a」。阿母a今年已經滿96歲，若是算台灣歲應該是98歲lah。伊雖然行動無啥方便，m̄-koh身體真勇健，精神真好，不時攏笑瞇瞇。伊對人真親切，tú著人攏會講平安。阿母a ê頭腦真清楚，記池mā真好，無輸少年一輩ê人，教會每一個人ê名伊攏知影，記kah tiâu tiâu tiâu。

阿母a真心適，若tú著我，伊會tiāⁿ tiāⁿ講，恁第二小弟名做啥teh做啥，第三小弟名做啥teh做啥，第四小弟是李淑德ê學生....。實在真趣味，因為伊m̄-taⁿ m̄-bat in，mā m̄-bat見過in，伊kā聽過ê代誌攏記記tī頭殼內。Tī教會，伊會恬恬坐tī hia注意人，關心別人。有一擺，我連續兩禮拜無去教會，hit下晡，阿母a隨時tō拍電話來，問講：「你是按怎幾nā禮拜無來教會？」。

阿母a是台南市人，出世tī一個基督教家庭。細漢ê時bat tī太平境教會讀主日學，老師是高俊明牧師ê母親。後來讀東門女學校，koh進入新樓女學校，tō是這時ê長榮女中，tī hit陣是真koân ê學歷。阿母a自細漢tō開始讀羅馬字聖經，所以伊講羅馬字是伊ê本行。

阿母a ê先生是前屏東女中ê校長李志傳先生。李先生是一位音樂家，tī莊永明ê「台灣紀事」第830頁有介紹李先生，講伊是「台灣新音樂」ê第二代音樂家，kap林進生、陳招治、陳泗治、呂泉生等人，攏是tī教育崗位推廣音樂教育真有成就ê音樂家，tī台灣ê新音樂史有佔一席ê地位。李先生bat組織過台北市ê｢教師交響樂團」，mā bat領導「台北市立交響樂團」，伊有作真chē曲，上出名ê一首是蔡培火作詞ê｢咱台灣」。阿母a真愛唱這條歌，人若請伊唱，伊tō真歡喜ná唱，ná拍pho̍k á，手koh ná比，真古錐。

阿母a有四男六女，有ê是醫生，有ê過去是老師，有ê食頭路，攏真有成就。In分散tòa tī台灣、日本、美國kap加拿大，大家攏真有孝。阿母a tiāⁿ tiāⁿ會kā人講：「我ê gín-á攏對我真好。阮大kiáⁿ ta̍k禮拜攏會tùi日本khà電話來kap我講話。」看會出伊是真滿足，真幸福。若是有人kā伊講：「阿母a，你真福氣，真好命。」，伊tō真歡喜講：「感謝上帝。」

因為有堅強ê信仰，阿母a真樂觀，伊講：「萬事攏交託主。」，所以無煩無惱，日子過了真快樂。伊每一日ê khang-khòe tō是讀聖經，唱聖詩。每一頁聖經讀了後，伊tō會用筆giauh一leh做記號，表示讀過 。仝一頁ê聖經已經hō͘伊giauh過 6、7擺ah。阿母a對台灣ê情形mā非常關心，伊ta̍k日攏會看電視新聞，注意時事。過去伊mā tiāⁿ tiāⁿ讀「台灣公論報」kap「自立周報」，了解台灣ê代誌。

「台文通訊」是阿母a每個月真期待愛beh讀ê刊物。有時á伊若khah慢接著，伊會按呢問：「這期ê台文通訊是tang時會出來？」。伊因為年歲chē,目睭霧，所以攏ài用hàm鏡，一字一字un-un á讀。阿母a也時常捐款hō͘｢台文通訊」，伊應該是「台文通訊」年紀上大ê讀者kap共同發行人。伊講：「咱m̄ thang bē記得咱ê母語。做一個台灣人bē曉講台灣話，敢m̄是真làu-khùi?」。

阿母a對台文ê關心kap支持，實在hō͘人真感動，伊是咱大家ê好模樣。Tī chia beh特別祝伊身體健康，食百二！