《台文通訊精選》

 | | | 轉寄

台灣人ê心靈雞湯

作者 阿秀 2007.06.03

一個大學時代ê老朋友，十幾冬無伊ê消息。有一日tī internet ê台文網路遇著，伊無大改變，除了寫中文改做寫台文，伊猶原tī新竹teh做電子工程師。

選舉期間，伊支持阿扁a，情緒high到上高點，tī新竹地區，為阿扁a khiā台、giú票，hit暝伊mā tī中山腳球場。我mā支持阿扁a，我kā伊講：「對政治人物，我攏bē-tàng全然相信，政治是一時ê，文化才是久久長長」。無想到，伊回批講：「Chē chē台灣人，不時teh煩惱股票沈大海，目睭看出去，攏是花花蕊蕊ê世界，心bē定，行bē順，文化兩字敢會tàng提來做檳榔擔á ê看板？」

無外久，伊koh送一個E-mail來，講，朋友相招，in beh翻譯台文ê「培根論文集」，問我敢會使翻譯其中ê幾篇。我雖然無時間，但是我真肯定為台文盡心出力ê人，只是我問伊：

(1) 有外chē人看過中文ê「培根論文集」？
(2) 有外chē人肯讀台文？
(3) 有外chē人有可能來讀台文ê「培根論文集」？

M̄是kā in潑冷水，咱付出精神kap時間，mā ài想咱推廣台文ê市場性。

北美洲有一本冊叫「Chicken so͘p」，我知影tī台灣有翻譯本叫做「心靈雞湯」，銷路非常好。當然這本是好冊，但是背景無仝，文化無仝。台灣人應該ài有家己ê心靈雞湯。無定咱會使試看māi，kā chia ê翻譯ê時間來寫也好，收集也好，用台文出一本台灣人ê心靈雞湯，由心起造。心若定，方向若正確，就bē去煩惱股票沈大海，bē受花花蕊蕊ê世界影響，文化也bē單單是檳榔擔ê看板。

選舉會使用激情，但是beh有合理ê社會、文化ê社會，ài一步一腳印，bē tàng親像開票，七、八點á就知影阿扁a當選。「台灣人ê心靈雞湯」，咱大家來加油。