《台文通訊精選》

 | | | 轉寄

走chhōe台灣kap我ê主體性

作者 莊佩芬 2007.04.29

我是台灣人，我講Hō-ló台語，我寫母語文。

真chē人問我tī美國主修啥？我定定會kā問ê人講滾笑，我tī美國主修台灣學。我會按呢講是因為來美國二冬lah，我開始重新熟sāi我以前大漢ê所在--台灣。雖然我無讀過『認識台灣』ê教科書，m̄-kú自從 1995 年我去DC chhōe一個台灣同鄉ê阿伯，hō͘阿伯掠去參加針對中國向台灣試射飛彈ê示威活動，我就開始修我台灣學ê學分ah。

阿伯是30年前來美國ê台灣留學生，hit時台灣ê政治猶koh足禁閉ê。Hit時ê留學生若是chhìn-chhái去講著有關台灣ê議題，就真有可能入去烏名單內底。95年我第一擺kap阿伯見面， 阿伯講話攏是用Hō-ló台語，hō͘我感覺真親切。台語是我ê母語，雖然我講bē輾轉。『國語』雖然m̄是我ê母語，m̄-kú自入學了就一直teh講ah，後來變做我主要ê語言。阿伯ê台語無摻kah半句華語，而且伊若是講著『大陸』ê時，伊攏講『中國』；講著『國語』ê時，tō講『北京話』。Chia ê現象hō͘我感覺真奇怪，我無法度理解阿伯是台灣ê高才生，講話無摻華語，而且伊ê語詞『中國』kap『北京話』ham 我所熟sāi ê『大陸』kap『國語』無相仝。Chia ê疑問到後來阿伯the̍h冊hō͘我看，koh chhōa我去kā中國示威了，我才完全了解。

台灣是經過歷代殖民者thún踏ê所在，我所知影ê歷史是現此時ê殖民者所編纂出來ê｡Chia ê改造ê歷史m̄-tāⁿ是tī教科書裡，mā經過媒體無所不在teh 重複。了解家己是台灣人，就親像kā我規個人反過來，我開始想beh訓練我講bē輾轉ê台語，追求有關台灣各方面ê新知識。我參與學校ê台灣同學會，參加有關台灣人團體ê活動。其中，我tī 96年去加州參加世界台語文化營hō͘我真大ê刺激。每一個講者攏用滑liu ê台語發表無仝主題ê論文。論文用台語發表，我從來to m̄-bat想過。Tī這個營隊裡，有真chē hō͘我刺激ê代誌。親像講：有一個日本記者用台語演講台語文ê重要性。一個日本人竟然kā我ê母語講kap寫kah chiah-ni̍h好，hō͘我感覺真pháiⁿ勢。Ùi hit chām開始，我意識著kan-taⁿ會曉講母語已經是無夠ah。

另外，若beh tī政治上ham文化上kap中國做區分，若無chhōe出台灣人家己ê主體性，恐驚á真pháiⁿ做會到。台灣人ê主體性是啥，我也m̄知。不而過，我知影台灣本底是有真chē講無仝母語ê族群所組成ê社會。母語文學本來是teh 記載人類上深ê感情ê文學。伊tī台灣是有時代意義ê,除了紀錄台灣人每族群ê感情，koh會使hō͘台灣人ê語言保存落來，甚至是kap中國tī文化上區分上好ê旗á。台灣文學長久以來一直真pháiⁿ脫離中國文學ê陰影。台灣人若是建立獨立ê母語文學，相信台灣文學beh脫離中國文學成做歷史ê路應該m̄是真遠a。

出國這幾年，我講我主修台灣學應該是bē siūⁿ超過。因為台灣ê特殊國情、國際地位hō͘我時時攏想beh掠機會kā外國人講我是台灣人kap咱台灣ê狀況。譬如講，tī阮系裡，所有ê教授攏知影台灣kap中國無仝。有一擺，阮一個查某教授叫我寫漢字ê『危機』hō͘看，我講beh寫漢字hō͘看除非伊了解我m̄是中國人。阮系裡ê教授對台灣人認同真有興趣。有一擺，有一個查甫教授kā一個新來ê台灣學生問第一個問題：你是台灣人抑是中國人。上課中，我mā不時會發言有關台灣ê情形。雖然我是讀家庭婚姻治療科ê，m̄-kú理論相通ê所在真chē。上基本ê tio̍h是轉來看家己是啥，為啥teh 活。我ê美國同學真chē人攏真會tàng接受我ê講法，而且祝咱台灣以後會tàng獨立成功。這擺總統大選了，我按台灣轉來，我幾個美國同學kap另外一個查甫教授kā我恭喜我支持ê黨所推派ê總統候選人當選。我對in hō͘我ê祝福感覺真趣味，因為我事先無kā in講我支持ê候選人。阮教授講伊ioh tio̍h知a，hō͘我感覺真歡喜。

美國雖然有chē chē ê種族問題，m̄-kú伊也是一個有民主基礎ê國家。一般來講，美國人會尊重你為家己爭取權利。留學美國對我來講m̄-tāⁿ是the̍h學位niā-niā。伊特殊ê時空背景hō͘我重新體會我出國進前ê台灣經驗。而且tī這個時空背景，mā hō͘我 有機會kap美國朋友交流咱ê台灣經驗。心理學內底有teh講，轉來了解家己是『siáng』，beh按怎用家己這個『siáng』kap別人鬥陣而且無失去家己。清楚ê主體性tī美國社會是真重要ê。若是無這個主體性真容易就hō͘主流社會食去，m̄-tāⁿ失去自我koh hō͘人看bē起。台灣國ê主體性是啥，tio̍h-ài靠你kap我共同來走chhōe。目前我kap一kóa人仝款、按咱本底所有ê chhōe起：講母語kap寫母語文。