《台文通訊精選》

 | | | 轉寄

靜靜ê回想 -- 懷念王育德先生

作者 陳柏壽 2006.02.26

每擺暗暝靜靜teh回想，台灣人iáu未記載tī歷史冊ê反抗史，一幕一幕沖激tio̍h我心ê海岸；想tio̍h過去二、三十冬來，台灣人一波過一波，一直teh犧牲，無怨嘆，無反悔，為tio̍h反抗中國人ê統治，死mā甘願。這款精神hō͘我體驗tio̍h台灣文化ê中間第一高貴第一純潔ê一面。過去ê代誌雖然親像白雲tī藍天teh飛；淡淡ê色彩tī koân koân ê所在，一蕊一蕊一直去，jiok mā jiok bē tio̍h，但是每擺想tio̍h chia ê時，心內沖激真大，想愛大聲hoah出來，目屎禁bē tiâu。但是每一擺我lóng kā目屎吞落去腹肚內，嘴齒根咬hō͘ ân，tō變做力量。

最近有一項代誌hō͘我聽tio̍h真艱苦心，是有關台灣獨立建國ê路中一位真偉大ê老師王育德先生ê代誌--講啥物王先生透底m̄-bat提起叫大家oa̍t-tńg來使用教會羅馬字。(王教授m̄是教會人士)

Taⁿ我有需要kā這幕靜靜ê回憶講出來，這是iáu無人teh整理ê「台灣白話文運動史」其中足重要ê一幕。希望我án-ne做，會tàng提供一面鏡，送hō͘目前充滿本位主義，看本身ê台語作品、研究、字典、發明..khah贏過台語文化ê死活ê台語界。

Hit年我會記得是1985年，世台會tī東京附近ê Hakone舉行。開會前幾個月王教授tō無暝無日做導演，訓練阮幾位用台灣話演劇；伊ê 要求真嚴，教阮咬字發音，一點á to bē使chhìn-chhái。我iáu會記得伊叫我演一個「台獨份子」，兩撇嘴鬚，戴一頂烏帽á，講話真有力，m̄驚國民黨teh九怪。

Ta̍k擺排演了後已經是半暝三更，因為阮厝離伊ê厝真近，所以兩人lóng做伙坐thakhusih tńg去，但是ta̍k擺伊落車前一定beh先付錢才落車。伊疼惜後輩，m̄是kan-na用嘴講，是用伊ê全生涯、全牲命ê實際行動來表現hō͘你知。

大會ê 主日禮拜因為我是司會，所以我有拜託好朋友Yoyogi (代代木)教會ê張清庚牧師來講道。我看台á腳坐約有chiâⁿ百個人，王育德先生mā坐tī hia。張牧師ê講道是正港ê一流súi，koh有真強ê台灣精神。講道了後，無想到王教授突然間tùi椅á頂khiā起來，我khah緊請伊起來台á頂講。伊開嘴ê第一句tō講：「我m̄-bat聽tio̍h chiah-nih súi ê台灣話講道，我ê心內感激不盡！」接落去伊soah講出伊對台灣人ê文化戰場中ê一句真重要ê話，(對我來講tō是一種宣言)：「我一世人總共構想台語ê標音法大概有七種，但是今á日beh kā大家講一句話：請恁kā我一世人所構想發明ê物件，lóng kā in放bē記得，大家lóng koh oa̍t-tńg來使用咱教會一百外冬所teh通用ê教會羅馬字！」

雖然無外久以後，阮hit陣流浪日本ê台灣人，tō用目屎送別這位深深受人敬疼ê老師tńg去上帝hia，王先生每一句教示阮ê 話，特別是伊tī大會所宣佈hia ê話，深深留tī 阮ê心內；伊雖然tiām-tiām-á離開阮，親像天頂ê雲，靜靜á tī hia teh飛；但是想tio̍h伊ê話，伊ê謙卑，伊為台語推廣ê需要，甘願放棄家己一世人苦心設計推廣ê台語標音法，每擺想tio̍h伊為tio̍h大局，犧牲家己、否定家己ê真正寬宏偉大ê精神，我ê心tō親像一陣風颱時ê海湧，禁bē tiâu大聲beh háu出來。

最近蕃薯詩刊有刊一張王育德先生在生親筆寫ê批，tī這張批ê內面王育德教授表示伊放棄伊家己發明ê台語標音法，請大家使用教會羅馬字。聽講有人對這張批ê真實性有懷疑，我感覺我有責任kā我親身經過ê這幕寫出來，hō͘大家對王教授這種看台語ê前途比家己ê台語研究koh khah重要，為大局放棄家己設計ê文字系統ê精神，有清楚ê瞭解。我看這種無私ê表現，是最高貴ê台灣人精神。

阮紐約台灣衛鄉教會聰美紀念基金會按25期開始，beh承擔「台文通訊」發行人ê責任。出tī對鄉土ê疼，阮全教會ê兄弟姊妹beh用全精神，一點一滴來灌沃這khu台灣文化ê田園：經營「台文」變做阮人人ê心血，mā是阮這間小小台灣人教會一項真重要ê使命。阮一定beh用「疼心講誠實話」，堅持「有疼心啥物long2m7驚」ê精神，kap有心ê台文作者、讀者手牽手、心連心，勇敢向前行。