《台文通訊精選》

 | | | 轉寄

牽手蓮治

作者 黃昭堂 2009.04.05

黃謝蓮治女士tī主後1934年5月15日出世tī台南市。老pē謝雍先生，老母謝蔡葉女士，有二男三女，蓮治是次女，排第二。

蓮治tī日本時代出世，讀台南市『花園小學校』。因為雙親攏受高等教育，所以，自細漢日本話tō講了真好。初中kap高中攏讀台南女中，1953年考入去台灣大學文學院英文學系。大學二年ê時，kap一陣同學去peh七星山，tī山頂遇著讀台灣大學經濟系三年級ê昭堂。因為山路有雪真ku̍t,查某學生攏有查甫學生牽扶，昭堂看著最後一位女生無人牽，tō伸手幫忙，一路做伙落山，兩人自然開始交往。原來昭堂teh讀『台南一中』ê時，寄宿tī前輩為著台南縣北門郡出身ê中學生設立ê學生宿舍『北門寮』。『北門寮』tī民族路，隔一條小溝ê正對面tō是蓮治ê厝。透過窗á應該看會著伊ê身影，總--是攏無機會熟似。

昭堂台大畢業了後，入第五期預備軍官訓練班，tī『車隴埔』、高雄『仁武營』訓練期間，這位攏無反攻大陸思想ê女生，不時參加台大ê勞軍團，去慰勞昭堂。二人約束將來beh做伙去日本留學。

1958年3--月，昭堂退伍了後，隨訂婚，仝冬6月14日tī台南縣七股鄉下山á寮，昭堂祖厝舉行婚禮，證婚人是昭堂大學生時代bat kā助選、當選省議員ê無黨無派政治家、合作金庫ê經理郭秋煌先生夫婦。Tī國民黨白色恐怖ê時代，無論任何理由攏無允准翁á某同時出國，其中一個一定ài留tiàm台灣。因為按呢，伊無入籍黃--家，1958年12月22日，二人攏是單身ê身份留學日本。

1959年2--月，昭堂考入去東京大學國際關係碩士課程，4月初4長男正澄出世，蓮治才入籍黃--家。Tī gín-á khah大漢了後，蓮治有心beh koh進修，申請進入東京大學文學部英文學系做研究生。M̄-koh tī 1961年4--月次男正憲生了後，tō辦理退學。到1965年8--月三男正嘉出世，tō變做一位真正ê職業主婦。

蓮治性情溫順靜淑，做代誌頂真，慢慢á來，一生m̄ bat kap人冤家。伊有台灣人意識，卻無政治細胞。雖然有時會chhōa gín-á去《台灣青年》雜誌社幫忙雜誌ê分送，koh會chhōa gín-á去參加反對國民黨政權ê街頭示威遊行，m̄-koh che是因為『嫁狗隨狗，嫁猴隨猴』ê古早美德，並m̄是有滿pak 獨立建國ê熱情。

1960年2月28日，《台灣青年》社成立，昭堂是原始發起人之一，兩年後hō͘國民黨駐日大使館吊銷護照，蓮治kap兩個查甫gín-á ê護照mā仝時吊銷，全家有三十四年久是『暴力份子、恐怖份子、叛亂黑名單人士』。甚至三男正嘉連台灣ê戶籍mā無。蓮治tī台灣生長ê時代，厝--裡攏有人tàu做家事。來日本了後，一切攏ài靠家己，kā gín-á洗尿chū對伊來講是真辛苦ê代誌，昭堂提案賣掉結婚手指，買洗衫機，約束以後會買koh khah大腳--ê hō͘--伊。昭堂最後違約，實在是一生ê遺憾。蓮治，gomennasai(對不住）！

1992年12--月，昭堂一家接著解除『暴力份子、恐怖份子叛亂罪』ê正式通知書，蓮治kap昭堂離鄉背井34年，第一擺koh踏tī台灣ê鄉土。桃園機場有上千ê鄉親迎接，非常感動。第二日隨轉去山á寮祖厝，夫妻二人háu kah無聲。昭堂父親黃賜川先生真早tō往生，m̄-koh上愛ê阿媽黃許羌女士、母親黃林怨女士、蓮治ê雙親攏tī『暴力份子、恐怖份子ê叛亂罪名』時代過身，無法度轉來參加葬式，實在真傷心。

昭堂1992年會tàng轉來台灣，m̄-koh tī日本『昭和大學』政治學教授ê任期到1998年才滿，為著避免無生活費，授課期間二人差不多兩禮拜tō飛一擺，來往tī台灣、日本中間六年久，1998年就任名譽教授了後，chiah tī台灣安定--落-來。Hit年蓮治診斷有『肺管擴張症』，醫生講che是久長ê病痛。嗽ài真出力，因為按呢肺部、心臟真衰弱。2003年12--月入院一個月，以後koh轉來厝--裡療養半年。

昭堂看--起-來真顧家、疼某，mā有獨裁獨斷ê一面，所以做伊ê某真辛苦。蓮治有時會輕聲講起怨嘆ê話，m̄-koh隨koh用溫柔ê聲音消滅昭堂可能發生ê受氣。蓮治真可愛，kawaii(卡哇伊）！

因為昭堂tī外口活動ê時間長，伊家己一個人食飯無滋無味，身體愈來愈sán,後--來變作koh sán koh虛弱。因為按呢，昭堂面皮厚厚，遇著大小宴會kap聚餐攏無經過主人同意，tō chh伊ōa參加，希望伊加減會tàng食--一-點-a。今年8月15到19長男正澄chhōa全家轉來台灣，18日eng 暗，伊竟然會tàng食一大碗ê魚翅，che也是伊最後ê大餐。以後tō感冒，物件攏食bē落去。28日阮請日本朋友，轉來厝ê時，伊tī大樓前跋倒，好佳哉骨無斷--去，m̄–kú koh khah無辦法食物件。9月初2下晡，昭堂親身飼伊一碗杏仁茶，伊竟然真有力幾嘴tō lim了，hō͘昭堂無感覺有啥物m̄-tio̍h｡9月初3早起7點半伊tī眠床頂講「想beh lim水。」昭堂tī客廳無chhap--伊，kā講「無beh起來食飯，會死。」8點20分昭堂做一碗杏仁茶，行入去伊ê房間，發現伊ê嘴唇變紫色，心臟、呼吸攏已經停止。救護車三分鐘內到，隨送去石牌榮民總醫院急救。停止一點鐘久ê心跳kap呼吸攏koh回復，m̄-koh意識無轉--來。三個gín-á tī 9月初3半暝tùi日本趕轉來看in親愛ê母親。進前，下晡6點25分林宗正牧師為伊洗禮。許承道牧師，義光教會ê幾位會友來為伊祈禱。9月初6，陳宇全牧師祈禱了後，tī親人ê陪伴，6點11分蒙主恩召。

蓮治arigatou(多謝）！gokurousama(辛苦--ah）！

(原文是中文，張秀滿翻譯做台文。)