《台文通訊精選》

 | | | 轉寄

O͘-lin-gió kap白玫瑰

作者 Biāu-gio̍k譯 2008.11.02

下面是一位同事傳來ê電子批，是一位阿媽講起伊tī聖誕節tú著ê代誌，我kā翻譯做台文，相信會hō͘你感動流目屎。

我趕kông chông入去一間百貨公司，想beh tī聖誕節進前做最後一分鐘ê採購。看著百貨公司人hiah-ni̍h chē,我開始頭疼。想講可能ài tiàm chia浸真久，我猶koh有真chē代誌ài做leh。聖誕節代誌真chē,真費氣。

我kheh過一群人，來到chhit-thô物ê部門，看著hia ê chhit-thô物所標ê價數( siàu)，我開始懷疑，我ê孫á敢有beh chhit-thô che？來到khǹg o͘-lin-gió ê所在，雄雄看著一個差不多5歲外ê查甫gín-á mo͘h一sian 古錐ê o͘-lin-gió,手一直so o͘-lin-gió ê頭毛，koh kā mo͘h tiâu tiâu leh。

我真好奇，目睭一直注意看這個gín-á,想講he是beh hō͘啥人leh？我看伊行óa去問一個查某人，講：「阿姨，敢真正我chia ê錢無夠？」Hit個查某人有一點á煩，kā應講：「你知影你chia ê錢無夠thang買。」In阿姨叫伊tiàm hia等，m̄ thang烏白走，伊去別位the̍h其他ê物件，一時á tō會隨轉來。

我看這個gín-á繼續mo͘h hit sian o͘-lin-gió｡我tō kā問：「這個o͘-lin-gió是beh hō͘啥人ê?」伊應講：「Che是阮小妹上蓋愛ê聖誕禮物。伊知影聖誕老阿公一定會送一sian hō͘ 伊。」我kā講聖誕老人可能會送hō͘ 伊。伊講：「Bē lah，聖誕老阿公bē tàng去阮小妹hia….我beh叫阮阿母chah去hō͘ 伊。」我問伊in小妹是tī tó位？伊用傷心ê目神看我，講：「伊已經去kap耶穌做伙a。阿爸講，阿母mā teh beh去kap小妹鬥陣a。」一時，我ê心臟險險tō tiāⁿ去。這個gín-á koh看我，講：「我叫阿爸kā阿母講，叫伊bān-chiah去leh，ài等我tùi店裡轉來了才去。」這時這個gín-á問我敢有beh看伊ê像？我kā講我真愛看。伊kā khiā tī店頭前hip ê幾張像the̍h出來，伊講：「我beh叫阿母the̍h這幾張像去hō͘小妹，伊才bē bē記得我。我真愛我ê阿母，我無愛伊離開我。M̄-koh阿爸講，阿母需要去kap小妹做伙。」我看這個gín-á頭lê-lê,變kah恬chih-chuh。

我等伊無注意ê時，伸手入去我ê皮包á裡，jîm一kóa錢出來。我kā伊講：「咱敢會使koh算一遍？看你ê錢有夠無？」這個gín-á變khah有精神起來，講：「好！我to知影一定有夠ê!」就按呢，我kā我ê錢lām伊ê錢開始算，當然是有夠錢thang買o͘-lin-gió｡伊歡喜講：「感謝主耶穌賜hō͘我有夠ê錢。」Koh講：「我tú-chiah有求耶穌hō͘我有夠錢thang買o͘-lin-gió, hō͘阿母chah去hō͘小妹，伊有聽著我ê祈禱。我本來mā beh求伊hō͘我錢thang來kā阿母買一蕾白色ê玫瑰花，但是我無求伊。M̄-koh伊hō͘我chiah chē錢會tàng買一sian o͘-lin-gió kap一蕾玫瑰花。阮阿母足愛白色ê玫瑰花。」

幾分鐘後，in阿姨轉來，我tō kā車sak走。Che了後，我ê心情kap tú來買物ê時規個無仝款。我繼續無停teh 想這個gín-á｡會記得幾日前ê報紙，有報導一個食酒醉駛車ê人lòng死一個細漢查某gín-á,in老母性命真危險，伊ê家屬當teh 躊躇是m̄是beh kā維生機( life support)關掉。M̄知這個gín-á kap這個車禍敢有關連？

兩日後，報紙ê報導講，車禍ê家屬已經kā維生機關掉a，hit個少年ê查某人已經過身a。我無法度kā hit個gín-á bē記得去，一直teh想，in兩個人是m̄是有關連？Hit下晡，我擋bē tiâu tō出去買一kóa白色ê玫瑰花，the̍h去殯儀館。Tī hia我看著hit個少年ê老母手裡the̍h著一sian古錐ê o͘-lin-gió､一蕾真súi ê白玫瑰kap hit個查甫gín-á ê像。離開hia ê時，我ê目屎一直liàn落來，我ê人生觀規個改變過來。這個細漢gín-á對伊ê老母kap伊ê小妹ê愛是hiah-ni̍h-á深，m̄-koh一目nih 久，伊ê人生tō hō͘ hit個食酒醉ê lòng kah碎碎碎。