《台文通訊精選》

 | | | 轉寄

台文通訊發刊辭 - 按會徽講起…

作者 鄭良光 2006.02.12

台文習作會自成立以來，按幾個á對台文普及化有使命感ê同鄉開始，每一次聚會ê人數攏一直teh增加，到第六次ê時已經有十七個人參加。但是真正hō͘阮感覺歡喜--ê m̄是人數ê增加，是參與者ê熱情kap投入。Tī進入第四個月ê時，有會友提起辦台文習作會通訊ê構想。這個提議受著熱烈ê回應…

有人認為台灣語文面臨著滅種ê危機，這份通訊會tàng扮演一個「火種」ê角色，來延續台灣語文ê香火。

有人認為台文普及化需要全民ê參與才有法度達成。特別是教育界、政治界、傳播界、工商界、電腦界、學術界、宗教界、文學界、語言學界...等等無仝背景ê專業人才攏來參與才會成功。這個工程是chiah-nih大，台文習作會ê力量是chiah-nih á小，這份通訊會tàng扮演ê角色是親像一枝小小ê｢蕃á火」，來點一pha火，點to̍h hia ê肯為台語文化犧牲奉獻ê蠟燭kap火柴；來照光受污染，漸漸烏暗ê台語社會；來燒除hia ê加tī台語文化ê壓制kap污穢。

有人講，台灣語文工作ê力量過頭分散，互相koh無聯絡，這份通訊tio̍h-ài擔任「橋樑」ê角色，hō͘台灣語文工作者會tàng互相鼓勵、交換意見、分工合作。

也有人講，台灣語文不但tī國民黨ê電視節目、文字媒體受歧視，tī本土意識ê報紙、雜誌也是無受重視，台文作家發表作品ê空間有限，影響了台文創作ê意願。這份通訊會tàng提供台文作家一個創作ê｢園地」、發表ê｢舞台」。

台文習作會ê會徽就tī這種熱烈ê討論下產生。伊親像是一pha強beh hoa--去ê火種；一枝小小á ê燒了就化麩ê蕃á火；一條期待人來經過ê橋；一區欠人耕作ê田園；一個可能無觀眾ê舞台。阮就beh按呢來開始，阮啥物攏無，阮所有--ê kan-na一粒疼台灣ê心kap一個m̄肯放棄ê信念：「今日若將che來放，是永遠無希望」。

語言kap文字是有社會性ê物件，台文普及化kap標準化ê運動是m̄是會成功，台灣話是m̄是會tàng繼續做台灣地區ê普通話，ài靠所有認同台灣、疼台灣ê人做伙來關心才有法度thang達成。當阮這枝「蕃á火」燒盡ê時，阮相信有chē chē ê蠟燭會kā這pha火傳--落-去。

(這篇發刊辭刊tī 1991年7月初1 ê台文通訊創刊號。)