《台語荒漠甘泉（全羅版）》

 | | | 轉寄

"Àm-tiong seng-tióng"

作者 陳清俊 翻譯 2008.08.24

listen



Poeh ge̍h jī-sì (Poeh ge̍h jī-cha̍p-sì ji̍t)


"Góa ū chiah ê mi̍h, kàu-gia̍h ū chhun, góa í-keng chhiong-chiok." (Hui-li̍p-pí 4:18)

Góa ū chi̍t-pún oân-gē ê chu, kî-tiong chi̍t chiuⁿ ê miâ chin chhù-bī, kiò-chòe “Tī im-àm-chhù seng-tióng ê hoe.” Chu nih kóng-kàu hoe-hn̂g lāi ū ji̍t-kng chiò bōe-tio̍h ê só͘-chāi, tān-sī ū ê hoe m̄-nā ōe tī àm-àm ê kak-lo̍h tōa-châng, iā sī su-iàu im-àm ê só͘-chāi, hō͘ i seng-tióng khah hó-sè, koh ōe khui hoe.

Lêng-sèng ê sè-kài iā ū lūi-sū ê chêng-hêng. Ki-tok-tô͘ tī bu̍t-chit khoân-kéng ke̍k khùn-lân ê sî, hoán-tńg bō͘-sēng khui hoe. Tī im-àm tiong tióng-tōa. Chit ê chêng-hêng nā-sī phàⁿ-kó͘ bô chin-si̍t, lán chóaⁿ-iūⁿ ōe lâi kái-sek sù-tô͘ Pó-lô ê it-seng keng-le̍k ah?

I siá téng-bīn keng-bûn ê sî, sī siū koaiⁿ tī Lô-má, i chú-iàu ê sù-bēng ná chhin-chhiūⁿ siū chhiat-tn̄g. Chóng-sī chiū tī che o͘-àm ê khoân-kéng, i ê hoe tōa-tōa khui chhut-lâi, chi̍t-phiàn chhàn-lān. Pó-lô í-chêng khó-lêng sī khòaⁿ-chòe tōa-lō͘ piⁿ hiáⁿ-ba̍k ê hoe, ū ji̍t-kng chin bō͘-sēng, hiān-chāi i siū khéng-tēng, i só͘ piáu-hiān bô-pí ê kian-kiông kap bí-lē. Siōng-tè ê èng-ún phah-khui i só͘ chiông-lâi bōe-bat thé-giām kè ê pó-chông.

Chiah-ê pó-chông tiong ū Ki-tok ê un-tián, thiàⁿ-thàng, hí-lo̍k, pêng-an téng-téng ê kî-biāu phín-chit, in tī o͘-àm tiong chiah ōe hián-lō͘ chhut ún-chông tī lōe-chāi ê kong-hui. Àm, sip, lah-sap ê kaⁿ-lô piàn-chòe Siōng-tè chin-tō ê tiûⁿ-só͘. Pó-lô sêng-siū tio̍h i í-chêng só͘ bōe-bat keng-le̍k tio̍h ê hiah-nih hong-hù hiah-nih khoah-tōa ê lêng-sèng sán-gia̍p!

Lán kiám m̄-chai, Sè-kan lâng, bô-lūn lâm á-sī lú tú-tio̍h o͘-àm, ko͘-toaⁿ ê sî, chiū ná chhin-chhiūⁿ teh chhēng kùi-tiōng ê ông-phàu, ū tit-tio̍h le̍k-liōng, koân-ui, kap hi-bāng mah? Lâng siū koaiⁿ-kaⁿ, chiong i ê châi-sán hong khí-lâi, chóng-sī bōe-thang hong-tiâu i cheng-sîn-siōng ê chin-chiàⁿ châi-sán. In ê bu̍t-chit khoân-kéng sī khoat-hoa̍t ná soa-bô͘ khòng-iá, chóng-sī “Khòng-iá kap ta-sò ê tōe tek-khak hoaⁿ-hí; soa-bô͘ ia̍h beh khoài-lo̍k, koh chhin-chhiūⁿ mûi-kùi khui-hoe.” (Í-sài-a 35:1). --- John Henry Jowett

Liân siōng súi ê hoe, tī ji̍t-thâu ê kng ē, i ê ē-bīn iā ū ka-kī ê iáⁿ. Kng ná kiông, i ê iáⁿ, ná bêng-hián.

附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com