《台語荒漠甘泉（全羅版）》

 | | | 轉寄

"Chiām-sî ê thòng-khó͘"

作者 陳清俊 翻譯 2007.12.09

listen

Cha̍p-jī ge̍h chhoe-káu (Cha̍p-jī ge̍h káu ji̍t)

"Goán ba̍k-nih kú khin-khin ê kan-khó͘ sī kā goán chiâⁿ siōng-téng-siōng éng-oán ê tōa êng-kng." (Ṳ Ko-lîm-to 4:17)

Lâng siông-siông án-ni mn̄g, "Ūi-sím-mi̍h jîn-seng chhiong-móa chiah-nih chōe ê lâu huih-kōaⁿ, chiah-nih chōe ê lâu ba̍k-sái ê sū?" Tap-àn beh tī "chiâⁿ" á-sī "Sêng-chiū" ê sû chhē-tio̍h. In-ūi tī chiām-sî "khin-khin ê kan-khó͘," hō͘ lán "chiâⁿ", "sêng-chiū" bó͘-chióng pó-kùi ê phín-chit. Thòng-khó͘ kà lán m̄-nā sī sèng-lī ê tō-lō͘, koh ū sèng-lī ê tēng-lu̍t, chiū-sī múi ê thòng-khó͘ lóng kâⁿ ū pò-siúⁿ. Sarah Adams tī 1840 nî ê chàn-bí si-koa án-ni kóng,

Chú, góa ài chiū-kūn chiū-kūn Lí,
Tio̍h tèng si̍p-jī-kè, mā kam-goān siū tèng-sí.

Hí-lo̍k ū-sî su-iàu thòng-khó͘ lâi chhui-sán. Fanny Crosby (1820-1915) sī Bí-kok chàn-bí si-koa tù-chok-ka, siá kè chhiau-kè nn̄g-chheng siú ê si-koa. Nā m̄-sī in-ūi i ê sit-bêng (chhiⁿ-mî), i bô ki-hōe ēng ba̍k-chiu him-sióng tio̍h chhiⁿ-chhiⁿ ê chhân-iá, âng-âng ê ji̍t-lo̍h, á-sī i lāu-bú ba̍k-chiu nih-chi̍t-ē nih-chi̍t-ē ê piáu-chêng, chiū bōe hō͘ i ê sim-lêng ū te̍k-pia̍t ê sī-le̍k, koan-chhat-le̍k kap lêng-kám lâi siá si-koa.

Ta̍t-tit an-ùi ê sī thòng-khó͘ chí sī thêng-liû chi̍t-mî, tē jī kang chá-khí chiū lī-khui khì. Pí-kàu tn̂g-tn̂g ê joa̍h-thiⁿ, sai-pak-hō͘ sī hô-téng ê té. Kì-tit "Kui-mî sui-jiân ū thî-khàu, chá-khí sî chiū ū hoaⁿ-hí." (Si-phian 30:5) --- tùi "Mî-sî ê koa"

Thòng-khó͘ āu ū pêng-an chhut-hiān,
Sī hi-bāng pàng-hē, m̄-sī hi-bāng si̍t-hiān.
M̄-sī kî-thāi tī bêng-ji̍t ê pêng-chēng,
Sī hong-thai āu ê an-lêng.

Pêng-an bô tī hiān-chāi móa-móa hí-lo̍k,
Iā m̄-sī tī hoaⁿ-hí thiàⁿ-thàng seng-oa̍h hēng-hok,
Sī tī sim-tiong ū khó-khò le̍k-liōng,
Chhiong-tu̍t, thòng-khó͘ tiong tit seng-tióng.

Pêng-an chûn tī oân-choân ê hōng-hiàn,
Bô-siū ì-chì, kám-chêng só͘ kái-piàn,
Pêng-an m̄-sī chhut tùi pêng-chēng ê Ai-tiân,
Sī chāi Khek-se-má-nî hn̂g sèng-lī chhut-hiān.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com.tw