《台語荒漠甘泉（全羅版）》

 | | | 轉寄

Chhiau-kè lán só͘ kiû só͘ siūⁿ ê un-sù

作者 陳清俊 翻譯 2007.11.25

listen
Cha̍p-it ge̍h jī-gō͘ (Cha̍p-it ge̍h jī-cha̍p-gō͘ ji̍t)

"Kia̍h hiah ê chìⁿ, ... phah tōe. I phah saⁿ-pái chiū soah. Siōng-tè ê lô͘-po̍k siū-khì i kóng, Lí hit-tia̍p tio̍h phah gō͘-la̍k pái." (Ṳ Lia̍t-ông-kì 13:18-19)

Chit kúi kù ōe só͘ thoân ê sìn-sit sī jōa-chiâⁿ siū chù-ì koh ū-la̍t! Í-sek-lia̍t ông Iok-a-si "phah saⁿ-pái chiū thêng" í-keng chòe kàu chin hó lah. Tùi i kóng, í-keng piáu-sī i te̍k-pia̍t ū sìn-sim ê hêng-ûi lah. Chóng-sī Iâ-hô-hoa ê sian-ti Í-lī-sa chin sit-bāng, in-ūi ông phah chi̍t-pòaⁿ chiū thêng-chí.

Sī, Ông khak-si̍t ū tit-tio̍h chi̍t kóa èng-ún, sū-si̍t-siōng, Siōng-tè só͘ hō͘ i ê iā bōe chió. Tān-sī Iok-a-si pēng bô tit-tio̍h Í-lī-sa phah-sǹg hō͘ i á-sī Iâ-hô-hoa só͘ beh hō͘ i ê it-chhè. I bô bêng-pe̍k Siōng-tè èng-ún ê tōa pō͘-hūn ì-gī kap sù-hok ê hong-hù. I khak-si̍t tit-tio̍h pí jīm-hô sè-kan lâng khah chōe ê mi̍h, chóng-sī bô tit-tio̍h Siōng-tè siōng-hó ê un-sù. --- A.B. Simpson

"Siōng-tè ōe kiâⁿ-chòe pôaⁿ-kè tī lán it-chhè só͘ kiû só͘ siūⁿ ê, chiū-sī chiàu I só͘ ūn-hêng tī lán ê koân-lêng, goān tī kàu-hōe kap tī Ki-tok Iâ-so͘ êng-kng kui I kàu bān sè, tāi-tāi bô soah." (Í-hut-só͘ 3:20-21)

Sù-tô͘ Pó-lô bô tī pa̍t só͘-chāi ēng-kè chit ê jī-kù kóng,"pôaⁿ-kè tī lán it-chhè só͘ kiû só͘ siūⁿ." Múi chi̍t jī chhiong-móa Siōng-tè bû-chīn ê thiàⁿ kap ūi I ê khéng kî-kiû ê sìn-tô͘ "sêng-chiū" ê lêng-le̍k. Chóng-sī ū ē-bīn ê chit ê hān-chè: "chiàu I só͘ ūn-hêng tī lán ê koân-lêng." I ōe sêng-chiū lán chí-ū kàu tī lán só͘ ài ê sêng-chiū. Siâng chit ê le̍k-liōng, I chín-kiù lán, ēng I ê pó-huih sóe lán chheng-khì, ēng I ê lêng chhiong-móa lán, pó-hō͘ lán bô siū iú-he̍k, ōe ūi lán èng-hù múi chi̍t ê kín-kip chōng-hóng, múi ê gûi-ki, múi ê khoân-kéng, kap múi chi̍t ê te̍k-jîn. --- tùi "Soan-tō-hōe pò"


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com.tw