《台語荒漠甘泉（全羅版）》

 | | | 轉寄

"Khó-khò ê chō͘-chhiú"

作者 陳清俊 翻譯 2011.11.13

listen

Cha̍p-it ge̍h cha̍p-saⁿ (Cha̍p-it ge̍h cha̍p-saⁿ ji̍t)

"Góa bat i, sī beh hō͘ i bēng-lēng i ê kiáⁿ kap i ê ke-koàn; hō͘ in tn̂g-tn̂g siú Iâ-hô-hoa ê tō-lí, péng-kong kiâⁿ-gī; tì-kàu Iâ-hô-hoa chí A-pek-la̍h-hán só͘ kóng ê ōe, lóng kui hō͘ i." (Chhòng-sè-kì 18:19)

Siōng-tè kéng-soán I só͘ ōe sìn-jīm ê lâng. I chai I thang kî-thāi A-pek-la̍h-hán chòe sū, tùi i kóng, "Góa kéng-soán i, i thang hoan-hù, kàu-tok, bēng-lēng i ê kiáⁿ-jî, iā Góa só͘ èng-ún hō͘ A-pek-la̍h-hán ê tāi-chì, lóng beh sêng-chiū. Siōng-tè sī thang sìn-lāi ê, I iā kî-thāi lán sī siāng-khoán ê khó-khò, kian-tēng, ún-tēng. Che chiū-sī sìn-sim ê kán-iàu ê ì-gī.

Siōng-tè teh chhē I só͘ ōe-thang kau-thok ê lâng, thang chiong thiàⁿ-sim, lêng-le̍k, sìn-si̍t choân-jiân thok-tiōng i. I sī hé-chhia-bú, I ê le̍k-liōng chin tōa, thoa ōe kiâⁿ jīm-hô tāng, koh chōe ê chhia-siuⁿ. Khó-sioh, kau tī hé-chhia-bú ê soh-liān bô kàu kiông, bô kàu ióng, thang thoa lán kî-tó ê.tāng-liōng. Só͘-í, Siōng-tè put-toān teh hùn-liān lán, tī sìn-sim-siōng, ōe ún-tēng koh kian-kò͘. Ǹg-bāng lán ōe ha̍k-si̍p hó-sè, ōe kian-kò͘ khiā tiâu-tiâu. --- A.B. Simpson

Siōng-tè chai lí ōe tòng-tit khó-giām, nā-bô, I bōe hō͘ lí tú-tio̍h chhì-giām. In-ūi I sìn-iōng lí, lí chiah ū chiah ê chhì-giām; bô-lūn sī jōa tōa ê chhì, lí lóng tòng ōe kè. I chai lí ê le̍k-liōng, kè-sǹg kàu lí ê chīn-pōng. Ài kì-tit, chi̍t ê lâng óa-khò Siōng-tè só͘ sù ê lêng-le̍k, I bōe hō͘ i siū tio̍h só͘ bōe tàng jím-siū ê chhì-giām.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org