《台語荒漠甘泉（全羅版）》

 | | | 轉寄

Khó-giām cheng-ka sìn-sim

作者 陳清俊 翻譯 2007.04.15

listen






Sì ge̍h cha̍p-gō͘ ji̍t

"Góa óa-khò Lí ê ōe." (Si-phian 119:42)

Lán sìn-sim ê le̍k-liōng oân-choân sī tùi lán ê siong-sìn Thiⁿ-pē ōe si̍t-hiān I ê èng-ún ê jōa chōe lâi tēng. Sìn-sim kap kám-chêng, ìn-siōng, gōa-piáu, sū-chêng ê khó-lêng á-sī bô khó-lêng lóng bô koan-hē. Lán nā chiong chiah ê sū kap sìn-sim liâm chòe-hé, lán chiū bô óa-khò Siōng-tè ê ōe lah. Sìn-sim sī ēng Siōng-tè ê ōe chòe pêng-kù, m̄-sī óa-khò kî-thaⁿ ê sū-bu̍t. Tng lán khò Siōng-tè ê ōe, lāi-sim chiū ū pêng-an.

Thiⁿ-pē hoaⁿ-hí thoàn-liān lán ê sìn-sim. I án-ni chòe, ài beh sù-hok hō͘ lán kò-jîn, sù-hok hō͘ kàu-hōe, iā ài tùi án-ni kiàn-chèng hō͘ bô sìn ê lâng. Chóng-sī lán siông-siông bô hoan-gêng sìn-sim siū thoàn-liān, lán beh thè-āu. Tng khó-giām lâi ê sî, lán eng-kai án-ni hôe-èng, kóng, "Goán tī thiⁿ-ni̍h ê Pē, chiong che khó-giām ê poe hē tī góa ê chhiú, hō͘ góa āu-lâi thang tit-tio̍h khoài-lo̍k."

Khó-giām sī sìn-sim ê niû-si̍t. Lán thang chiong pún-sin oân-choân hē tī Thiⁿ-pē ê chhiú ni̍h! Kìⁿ-nā ūi-tio̍h kiáⁿ-jî ê hó-chhù, I lóng hoaⁿ-hí khì chòe. Chóng-sī khó-giām kap kan-lân pēng m̄-sī thoàn-liān, cheng-ka sìn-sim î-it ê hong-hoat. Tha̍k sèng-keng iā thang pang-chān lán jīn-bat Chin-sîn, in-ūi I tī sèng-keng tiong khé-sī I pún-sin.

Chiàu lí tùi Thiⁿ-pē ê jīm-sek kap tùi I ê koan-hē, I sī-m̄-sī chi̍t ūi khó-ài ê Siōng-tè mah? Nā m̄-sī, góa ài kó͘-lē lí, kiû Thiⁿ-pē ōe chiong lí chhōa kàu chit ê kéng-kài, hō͘ lí cha̍p-chiok jīn-bat koh kám-siā I ê un-jiû kap chû-ài, ōe thang kóng chhut I sī chin súi, chin hó. Iāh chai Thiⁿ-pē chin hoaⁿ-hí ūi-tio̍h I ê kiáⁿ-jî lâi chòe chin-chōe ê kang-chok.

Lán ê sim-lāi nā ná chiap-kūn chit tiám, lán chiū ná goān-ì chiong pún-sin kau tī Thiⁿ-pē ê chhiú-ni̍h, koh-khah móa-ì I tī lán sin-chiūⁿ só͘ chòe ê it-chhè. Khó-giām lâi ê sî, lán beh goān-ì kóng, "Góa ōe jím-nāi thèng-hāu, khòaⁿ Siōng-tè tī góa sin-chiūⁿ só͘ chòe ê hó, iā khak-si̍t sìn I ōe án-ni chòe."

Án-ni, lán beh tùi sè-kan lâng chòe chhut ū-la̍t ê kiàn-chèng, pang-chān lâng, hō͘ pa̍t-lâng sìⁿ-miā tit hong-sēng, tit khùi-la̍t. --- George Mueller

附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com.tw