《台語荒漠甘泉（全羅版）》

 | | | 轉寄

"Kiâⁿ thiⁿ-lō͘"

作者 陳清俊 翻譯 2011.05.08

listen


Gō͘ ge̍h chhoe-poeh (Gō͘ ge̍h poeh ji̍t)

“Khòaⁿ ah, góa khòaⁿ-kìⁿ ū sì ê lâng, pēng bô siū-pa̍k, kiâⁿ tī hé-tiong, iā bô siū-siong;” (Tān-í-lí 3:25)

Sa-tek-la̍h, Bí-soah, A-pek-nî-ko siū hiat lo̍h tī hé-iô nih, lia̍t-lia̍t ê hé bōe chó͘-chí in ê hêng-tōng, in-ūi khòaⁿ-tio̍h in tī hé-tiong teh kiâⁿ-iû. Si̍t-chāi kóng, hé sī in kiâⁿ ǹg bo̍k-tek-tē ê chi̍t tiâu tō-lō͘. Tùi Ki-tok ê chin-lí, lán tit-tio̍h an-ùi, m̄-sī in-ūi che chin-lí kà lán bōe pi-siong ê chū-iû, sī kà lán tùi pi-siong lâi tit chū-iû.

Chhin-ài ê Chú, tng o͘-àm jia-tà góa ê sî, hō͘ góa chai, góa chí-ū sī chìn-ji̍p chi̍t ê pōng-khang nā-tiāⁿ, chin-kín chiū ōe thong-kè pōng-khang, hôe-hok kàu kng-bêng.

Góa chai, ū chi̍t ji̍t, góa ōe khiā tī Ká-ná soaⁿ téng, thé-hōe koh-oa̍h ê êng-iāu. Sī, Thiⁿ-pē ah, góa beh thé-giām koh-khah chōe, beh keng-kè Lí ê siū-tèng tī Kok-kok-tha ê soaⁿ téng. Góa chai o͘-o͘ àm-àm ê ìm-iáⁿ sī ǹg thian-tông ê tō-lō͘ ê chi̍t-ê ìm-iáⁿ nā-tiāⁿ. Kà-sī góa, chai góa peh soaⁿ ê bo̍k-tek sī in-ūi Lí ê chhù sī tī hia. Án-ni, nā-sī kiâⁿ kè hé tiong, góa bōe hō͘ iu-siong lâi siū siong. --- George Matheson

Lō͘ chiah pháiⁿ kiâⁿ.
It-ti̍t teh peh kiā,
Bô hoe, chí-ū chhì-á, hong-iá,
Lóng sī o͘-im thiⁿ nā-tiāⁿ.
Chóng-sī, gûi-hiám ê sî, I khan góa kiâⁿ,
Kap I tâng-kiâⁿ, góa chū-chāi bô kiaⁿ.

Si̍p-jī-kè chit khoán kang,
Ka-chiah tòng bōe-tiâu ê tāng,
Tōa koh chho͘-tāng, mo͘h bōe tín-tāng,
Iā bô koan-sim ê lâng.
Tng I un-jiû mo͘ góa ê chhiú, góa tit ǹg-bāng,
I chai, I liáu-kái, I koan-sim góa ê khó͘-thàng.

Ūi-hô iáu teh thî-khàu, kiaⁿ-hiâⁿ,
Si̍p-jī-kè, phāiⁿ khí-lâi kiâⁿ,
Chi̍t-pō͘, chi̍t-pō͘ ǹg thiⁿ siâⁿ,
Sī lán só͘ ài, só͘ chai-iáⁿ.
Múi chi̍t-pō͘ tit sin sìⁿ-miā,
Sī ū Chú pôe lán kiâⁿ.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org