《台語荒漠甘泉（全羅版）》

 | | | 轉寄

"Chá-khí-sî"

作者 陳清俊 翻譯 2010.11.28

listen


Cha̍p-it ge̍h jī-poeh (Cha̍p-it ge̍h jī-cha̍p-poeh ji̍t)

"Ji̍t-chhut, ji̍t-lo̍h ê só͘-chāi, Lí hō͘ in lóng hoaⁿ-hí." (Si-phian 65:8)

Lí bat chá-chá khí-lâi, peh chiūⁿ sió-soaⁿ-niá, khòaⁿ Siōng-tè só͘ chō ê chá-khí-sî mah? I chiong ji̍t-thâu tùi chúi-pêng-sòaⁿ bān-bān sak khí-lâi, khong-tiong ê im-im àm-àm siau-sit, hoat-chhut chhian-piàn bān-hòa ê sek-chhái, kàu îⁿ-îⁿ ê thài-iông chhut-hiān, siā chhut oân-bí ê kng-sòaⁿ. Ji̍t-thâu, á-sī thài-iông, sī ji̍t-sî ê ông, ui-gî se̍h kè thiⁿ, hō͘ tōa-tē kap chhim-kok lóng chhàn-lān kong-hui. Chit sî lí thang thiaⁿ-tio̍h thiⁿ-téng si-pan ê koa-siaⁿ, o-ló Siōng-tè ê úi-tāi kap chá-khí-sî ê hui-hông.

Tī chheng-chá an-chēng tiong thiaⁿ kìⁿ chi̍t ê siaⁿ,
Hoaⁿ-hí! Hoaⁿ-hí! Góa kui-ji̍t kap lí tâng kiâⁿ.

Khòaⁿ-tio̍h chheng-kiat sûn-chin chá-khí-sî ê hiok-kng, hō͘ góa sim khat-bō͘ chin-lí, chí ū chin-lí ōe hō͘ góa chhin-chhiūⁿ chá-khí hiah chheng-thiat sûn-kiat, hō͘ góa ê sìⁿ-miā kap chiu-ûi ê tōa chū-jiân hô-ha̍p hó-sè. Ji̍t-chhut liâng-hong chhe lâi góa ǹg-bāng Siōng-tè ê sim, I chiong sìⁿ-miā oa̍h-khì chhe ji̍p góa ê phīⁿ-khang. I ê khì-sek, sim-ì kap lêng chhiong-móa góa, hō͘ góa siūⁿ I só͘ siūⁿ, chhin-chhiūⁿ I ê seng-oa̍h. Góa tī I sìⁿ-miā nih chhē tio̍h góa ê sìⁿ-miā, chit ê sìⁿ-miā iā tit-tio̍h éng-oán ê êng-iāu.

Nā-sī bô Siōng-tè só͘ chō ji̍t-sî mî-sî, lán jîn-lūi sī jōa-chiâⁿ khó-lîn! --- George MacDonald

Chá-khí-sî, kng àm ê kau-kài,
O͘-àm tùi tōa-tē tiām-tiām so͘-khai.

Hit-sî kap Iâ-so͘ kam-tiⁿ kau-tâm tī sek-lāi,
Chi̍t ji̍t ê kang-chok kiû Chú chí-sī kap an-pâi.

Koâiⁿ-soaⁿ kē-kok I chhōa lō͘,
Hō͘ soa-bô͘ khui-hoe, iu-siong ba̍k-sái piàn kam-lō͘.

Lí siūⁿ ài chhù-chhù tek-sèng ê jîn-seng?
Ta̍k-ji̍t thàu-chá chiong Siōng-tè pâi tāi-seng.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org