《台語荒漠甘泉（全羅版）》

 | | | 轉寄

"Chú tùi lí ê kè-ōe"

作者 陳清俊 翻譯 2010.07.25

listen

Chhit ge̍h jī-gō͘ (Chhit ge̍h jī-cha̍p-gō͘ ji̍t)


"Góa só͘ chòe ê, lí hiān-kim m̄ chai, āu-lâi chiū ōe hiáu-tit." (Iok-hān 13:7)

Tī hiān-sè, lán khòaⁿ Siōng-tè ê chok-ûi, chí-ū phiàn-bīn, bô oân-choân, só͘ kìⁿ tio̍h ê chí sī chi̍t pō͘-hūn, á-sī iáu bô choân-jiân tián-chhut ê hiān-siōng. Chóng-sī tng lán khiā tī êng-hôa éng-oán ê sèng-tiān chêng, lán chiū ōe khòaⁿ tio̍h choân-kéng, khòaⁿ tio̍h múi chi̍t hāng sū án-chóaⁿ kî-biāu kiat-ha̍p chòe chi̍t-thé.

Lán thang sióng-siōng tī Í-sek-lia̍t ông Só͘-lô-bûn ê sî, Lî-pa-lùn ê chèng soaⁿ, lí thang khòaⁿ tio̍h chi̍t-phìⁿ tōa-châng koâiⁿ-koâiⁿ ê hiong-pek-chhiū (pek-hiuⁿ-chhiū). In thang chin kiau-ngō͘, in-ūi bat keng-le̍k kè chin chōe pái hân-léng pak-hong ê sàu, joa̍h-thiⁿ thài-iông ê pha̍k, àm-mî lō͘-chúi ê sip. Ū chiáu-á chō siū tī in ê ki-oe, ū ià-siān ê lú-kheh kap chhian-sóa ê kò͘-iûⁿ lâng hioh tī in ê ìm-iáⁿ ē, lâi siám-bih iām-jia̍t ê ji̍t-thâu, kiông-lia̍t ê po̍k-hong-ú. Siáng chai, hut-jiân-kan chiah ê tōa-châng ê pek-hiuⁿ-chhiū tī chhò-chhâ lâng ê pó͘-thâu ē, lóng tó lo̍h khì!

Lán khòaⁿ pó͘-thâu tùi pek-hiuⁿ-chhiū phut thâu ē só͘ sán-seng ê siong-hûn, koh chiong só͘ ū ki-oe lóng-chóng siah khì, kàu kui châng chhiū tōa siaⁿ ai chi̍t ē tó lo̍h khì tī thô͘-kha. Lán beh khòng-gī chiah ê chhiū siū chhò, siū châu-bia̍t, tōa chū-jiân siū phòa-hoāi piáu-sī hùn-khài. Lán beh chhin-chhiūⁿ sian-ti Sat-ka-lī-a án-ni kóng, "Siông-chhiū ah, lín tio̍h háu, in-ūi pek-hiuⁿ-chhiū í-keng tó...!" (Sat-ka-lī-a 11:2) Lán ná chhin-chhiūⁿ ài chhiáⁿ khah sòe-châng ê chhiū piáu-sī tông-chêng, chhiáⁿ bô oa̍h-miā ê mi̍h iā piáu-sī oàn-hūn chit chióng hêng-ûi.

Lán bô eng-kai chiah kín chiū chhut oàn-giân, sī eng-kai tī "Chhui-lô óng Hō͘-lân" ê kang-lâng chiong chhiū ūn lo̍h soaⁿ, kap chiah ê chhiū khì khòaⁿ-māi. Keng-kè Tē-tiong-hái chûn ê ūn-sàng, chòe-āu tī Siōng-tè ê sèng-tiān tiong chiâⁿ-chòe kng-kng ku̍t-ku̍t kong-hui ê tōa-niû. Tng lí siūⁿ tio̍h chit châng chhiū ê chòe-āu ê khì-chhù, khòaⁿ tio̍h i chiâⁿ-chòe chì-sèng-só͘ choân-lêng kun-ông ông-bō ê chi̍t-lia̍p pó-chio̍h, lí iáu ōe tùi sim-tiong kóng chit ê "Lî-pa-lùn ông-bō ê pó-chio̍h" chhiū hông chhò lo̍h-lâi, ūn-poaⁿ, khǹg tī chun-kùi ê só͘-chāi lâi chhut oàn-giân mah? Chit ê pek-hiuⁿ-chhiū bat chong-giâm khiā tī tōa chū-jiân ê tiān-tn̂g ni̍h, chóng-sī "Chit keng tiān āu-lâi ê êng-kng, beh iâⁿ-kè chêng ê êng-kng." (Hap-kai 2:9)

Ū chin chōe lâng chhin-chhiūⁿ lāu ê pek-hiuⁿ-chhiū, Siōng-tè chhì-liān ê pó͘-thâu kā in siah kàu kng-kng-kng, lán bōe thang bêng-pe̍k ūi-hô su-iàu siū chiah tōa chiah khùn-khó͘ ê chêng-kéng, tān-sī Siōng-tè sim-tiong ū ko-siōng ê bo̍k-piau kap bo̍k-tek, chiū-sī beh hō͘ in khiā tī thiⁿ-nih ê Sek-an soaⁿ chòe éng-oán ê tōa thiāu kap tōa kông. I tùi in kóng, “Lí beh tī Iâ-hô-hoa ê chhiú-tiong chòe súi ê ông-bō, tī lí ê Siōng-tè ê chhiú-chiúⁿ chòe bián-liû.” (Í-sài-a 62:3) --- J.R. Macduff

Bô kiû khì liáu-kái, khì bêng-pe̍k góa ê si̍p-jī-kè,
Khah-hó, tī o͘-àm tiong ū Lí thang mo͘-tio̍h koh kun-tè.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org