《台語荒漠甘泉（全羅版）》

 | | | 轉寄

"Àm tiong ê sìn-sit tī kng-bêng tiong soan-iông"

作者 陳清俊 翻譯 2010.04.11

listen


Sì ge̍h cha̍p-it (Sì ge̍h cha̍p-it ji̍t)

"Góa tī àm-tiong kā lín kóng ê, lín tio̍h tī kng-bêng ê só͘-chāi kóng-chhut; àⁿ tī hī-khang kā lín kóng ê, tio̍h tī chhù-téng thoân i." (Má-thài 10:27)

Lán ê Chú siông-siông tī àm-tiong kā lán kóng-ōe. Khó-lêng sī tng sit-khì chhin-lâng tan-to̍k tī àm-àm ê chhù-lāi, iā khó-lêng sī tī ko͘-to̍k, chhiⁿ-chhám ê sî, iā ū-sî tī phòa-pīⁿ bōe thang khí-lâi, bô kap lâng chiap-chhiok ê sî, iā ū-sî sī tī pi-siong sit-bāng ê o͘-àm-mî.

Tī hia, I chiong I ê úi-tāi, kî-biāu, éng-oa̍h ê ò-pì kā lán kóng. Lán hō͘ sè-kan ê sū-bū bê kah bū-bū ê ba̍k-chiu, I hō͘ lán khòaⁿ ǹg thiⁿ ê chhàn-lān. Lán ê hīⁿ-khang iā beh thiaⁿ tio̍h, siông-siông hō͘ sè-kan chháu-nāu só͘ khàm I ê siaⁿ-im, khó-lêng sī tī hī-khang piⁿ sòe-sòe ê ōe.

Put-kò, chiah ê khé-sī iā tòa lâi chek-jīm: "Góa tī àm-tiong kā lín kóng ê, lín tio̍h tī kng-bêng ê só͘-chāi kóng-chhut; ... , tio̍h tī chhù-téng thoân i." Lán m̄-sī éng-oán thêng tī àm-sek, lâu tī àm-tiong, bô-kú, lán beh siū ho͘-tiàu kàu jîn-seng ê soan-hôa kap po̍k-hong-hō͘ tiong ê só͘-chāi. Hit-sî lán tio̍h chiong lán só͘ o̍h tio̍h ê kóng chhut-lâi, soan-iông chhut-lâi.

Án-ni siū-khó͘ ū sin ê ì-gī. Siū-khó͘ siōng pi-ai ê pō͘-hūn tiāⁿ-tiāⁿ sī ín-khí bô lō͘-ēng ê kám-kak. Lán bōe-bián ōe siūⁿ-tio̍h "Góa chiah-nih bô lō͘-ēng, góa só͘ chòe ê ū sím-mi̍h lō͘-ēng? Góa lêng-hûn ê kùi-tiōng ê hiuⁿ-iû (Chham-khó Iok-hān 12:3) ūi-sím-mih lōng-hùi tiāu?" Chiah ê lóng sī siū-khó͘-chiá ê ho͘-kiò, tān-sī Pē Siōng-tè tī che it-chhè lóng ū I ê chí-ì. I beh chiong i ê chú-bîn tòa-kàu kap I khah koâiⁿ kau-óng ê chân-chhù, hō͘ in ōe thiaⁿ-tio̍h I ê kóng-ōe, "bīn tùi bīn kóng-ōe, chhin-chhiūⁿ lâng kap pêng-iú kóng-ōe chi̍t-poaⁿ-iūⁿ." (Chhut-ai-ki̍p-kì 33:11) Jiân-āu lo̍h-soaⁿ tùi lâng soan-iông I ê sìn-sit. Mô͘-se tī soaⁿ-téng sì-cha̍p ji̍t kiám sī lōng-hùi tiāu mah? Í-lī-a tī Hô-lia̍t soaⁿ só͘ kè ê ji̍t-chí á-sī Pó-lô tī A-la̍h-pek soa-bô͘ só͘ kè ê nî-ji̍t iā kiám sī lōng-hùi ê mah?

Kè sìn-sim ê seng-oa̍h sī bô khah té ê lō͘ thang kiâⁿ, sìn-sim ê seng-oa̍h sī sèng-kiat, sèng-lī ê it-seng só͘ choa̍t-tùi su-iàu ê. Lán pit-su ū chi̍t-tōaⁿ tan-to̍k kap Siōng-tè tī-teh ê chhim-su sî-kan. Lán ê lêng-hûn su-iàu kap I chòe-hé tī soaⁿ-téng á-sī tōa chio̍h-thâu ê im-iáⁿ tiong kám-siū tio̍h an-lêng ê sî-chūn. Lán su-iàu tī o͘-àm jia-khàm tōa tē it-chhè, bān-mi̍h lóng chēng-chēng, chhiⁿ kng teh chiò kè mî. Che hō͘ lán ê gán-kong khòaⁿ khah khoah, hián-chhut bû-hān kap éng-oán. Chiah ê chióng-chióng sū lóng sī chhin-chhiūⁿ chia̍h-mi̍h tùi lán ê sin-thé só͘ bōe thang khiàm-kheh.

Lán nā ū chit khoán kap Siōng-tè tông-chāi ê kám-siū, lán ê lêng-hûn chiū éng-oán bōe tōng-iâu, lán beh chhin-chhiūⁿ si-phian só͘ kóng ê "Iâ-hô-hoa ah! Lí sī kūn-kūn." (Si-phian 119:151) --- F.B. Meyer

Ū ê lâng ê sim chhin-chhiūⁿ iā-lâi-hiong, tī jîn-seng im-àm, àm-mî ê sî khui kah te̍k-pia̍t ê súi.

附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com