《台語荒漠甘泉（全羅版）》

 | | | 轉寄

"Khó͘-poe"

作者 陳清俊 翻譯 2009.07.19

listen


Chhit ge̍h cha̍p-káu (Chhit ge̍h cha̍p-káu ji̍t)

"Pē só͘ hō͘ góa ê poe, góa kiám bô beh lim mah?" (Iok-hān 18:11)

“Lim Pē só͘ hō͘ góa ê poe” pí hō͘ hong-éng pêng-chēng, pí hō͘ sí-lâng koh-oa̍h koh-khah tōa ê sū. Sian-ti, sù-tô͘ ōe kiâⁿ sîn-jiah, chóng-sī in pēng bô siông-siông chiàu Siōng-tè ê chí-ì kiâⁿ, khì sêng-siū khó͘-lān. Chiàu Siōng-tè ê chí-ì chòe, kam-sim siū khó͘, sī sìn-sim siōng ko-hong, ki-tok-tô͘ siōng êng-kng ê sêng-chiū.

Siàu-liân sî-tāi ê tōa chì-khì í-keng phòa-chhùi, ji̍t-ji̍t siū tāng-tàⁿ teh, lóng bô hioh chhoán ê sî-chūn, sui-jiân ū-sim ǹg-bāng tùi pa̍t-lâng chòe hó-sū, ūi só͘ thiàⁿ ê lâng hō͘ in ū hó ji̍t-chí kè, tān-sī pún-sin hō͘ pîn-khùn kau-tîⁿ, sin-thé hō͘ pīⁿ-thiàⁿ só͘ pa̍k, oân-choân ko͘-toaⁿ, kap só͘ thiàⁿ ê lâng pun-lī, tan-to̍k bīn-tùi sìⁿ-miā ê tá-kek. Sui-jiân hoat-seng che it-chhè, siū chiah tōa chiah kan-khó͘ ê thoàn-liān, lí iáu ōe kóng, “Pē só͘ hō͘ góa ê poe, góa kiám bô beh lim mah?” Che sī sìn-sim ê chòe ko-hong, sī sim-lêng sêng-kong ta̍t kàu ke̍k-tiám.

Tōa sìn-sim ài tī siū-khó͘ ê sî chiah ōe chhiong-hun piáu-hiān chhut-lâi. --- Charles Parkhurst

Ài ū siū-khó͘ ê Kiù-chú, chiah ū lîn-bín lâng ê Siōng-tè. Chin-chiàⁿ ê tông-chêng sī tùi ū siū-tio̍h siâng-khoán thòng-khó͘ ê lâng lâi. Khó͘-thàng sī hō͘ lán ū le̍k-liōng khì tông-chêng pa̍t-lâng ê tāi-kè. Kìⁿ-nā goān-ì pang-chān pa̍t-lâng ê, pit-su ka-kī seng siū-khó͘. Lán nā hi-bāng pang-chān pa̍t-lâng, su-iàu seng bīn-tùi si̍p-jī-kè. Bô lim Iâ-so͘ só͘ lim ê khó͘-poe ê lâng, bô chhin-chhiūⁿ I, hiah-nih goān-ì khiam-pi siū Iok-hān sóe-lé ê lâng, choa̍t-tùi thé-giām bōe tio̍h tùi ho̍k-sāi lâng lâi tit tio̍h hit chióng tōa bô pí ê khoài-lo̍k.

Tāi-pi̍t ông siōng an-ùi ê si-phian sī tī i ê sìⁿ-miā keng-kè siū khó͘-lān ê sî só͘ ap chhut lâi ê. Sù-tô͘ Pó-lô sin-chiūⁿ nā bô “hit ki chhì”, (Ṳ Ko-lîm-to 12:7) lán kin-á-ji̍t chiū bōe tit-tio̍h hiah chōe tī i ê phoe-sìn só͘ piáu-ta̍t un-jiû an-ùi ê sim-siaⁿ.

Nā-sī lí í-keng chiong pún-sin kau-thài Chú, bo̍k-chêng lí ê khoân-kéng tú-tio̍h tāng-tàⁿ teh-tio̍h, sī beh tī Thiⁿ-pē ê chhiú tiong kā lí tiau-khek chòe éng-oa̍h hêng-thé bí-hó ê chok-phín. Só͘-í siong-sìn I, éng-oán bô sak-khui I tú-teh tī lí sin chiūⁿ sú-iōng ê kang-kū, bô sit-khì I beh tī lí sìⁿ-miā tiong kiat-chhut hó ké-chí.

Ū hián-hiān khak-si̍t kî-koài kap khùn-lân,
Chóng-sī tè tī āu-bīn sī sù-hok kap pêng-an.

Khó͘-lān ha̍k-hāu só͘ pit-gia̍p ê sī kia̍t-chhut ê ha̍k-chiá.

附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com