《台語荒漠甘泉（全羅版）》

 | | | 轉寄

"Sìn-sim"

作者 陳清俊 翻譯 2008.12.07

listen


Cha̍p-jī ge̍h chhoe-chhit (Cha̍p-jī ge̍h chhit ji̍t)

"Lín beh bô khòaⁿ-kìⁿ hong, bô khòaⁿ-kìⁿ hō͘; iáu-kú chit ê soaⁿ-kok, chúi beh móa-móa, hō͘ lín thang lim; chiū-sī lín, kap lín ê cheng-siⁿ, lín ê siù, lim i. Chāi Iâ-hô-hoa iáu khòaⁿ chit-ê chòe sió-khóa; I iā beh ēng Mô͘-ap lâng kau tī lín ê chhiú." (Ṳ Lia̍t-ông-kì 3:17-18)

Tī lâng ê lí-sèng khòaⁿ, Siōng-tè ê èng-ún kun-pún bô khó-lêng si̍t-hiān, chóng-sī sím-mi̍h lóng bōe khó-tó Siōng-tè. Bô-siaⁿ bô-seh, bô tiāu-thâu, chúi tùi khòaⁿ-bōe-tio̍h kap khòaⁿ-khí-lâi put-khó-lêng ê goân-thâu lâu kui mî, "Keh chá-khí ... piàn-tōe chiū ū chúi móa-móa, ... ji̍t chiò tī chúi nih; ...chúi âng chhin-chhiūⁿ huih." (Ṳ Lia̍t-ông-kì 3:20, 22)

Lán ê siong-sìn lóng sī ài khòaⁿ gōa-chāi ê chèng-kù, chin chōe lâng ê sìn-sim sī pêng kám-kak. Bô khòaⁿ ōe tio̍h ê chèng-kù, chiū bô beh siong-sìn Siōng-tè èng-ún ê chin-si̍t-sèng. Tān-sī chi̍t ê lâng sìn-sim chòe tōa ê sèng-lī sī "Lín tio̍h tiāⁿ-tiāⁿ, tio̍h chai Góa sī Siōng-tè." (Si-phian 46:10)

Sìn-sim siōng úi-tāi ê sèng-lī sī khiā tī bōe-tàng hoâiⁿ-kè ê Âng-hái hōaⁿ téng, thiaⁿ-tio̍h Iâ-hô-hoa kóng, "M̄-bián kiaⁿ, chòe lín khiā-teh, khòaⁿ Iâ-hô-hoa kin-á-ji̍t ūi-tio̍h lín só͘ beh kiâⁿ ê chín-kiù." (Chhut-ai-ki̍p-kì 14:13) kap "chìn-chêng khì." (Chhut-ai-ki̍p-kì 14:15) Pêng sìn-sim hiòng chêng kiâⁿ, khòaⁿ sī bô sím-mi̍h tiāu-thâu, bô thiaⁿ-tio̍h sím-mi̍h siaⁿ-seh kò-iūⁿ, chiū ǹg chúi tiong ta̍h chhut thâu chi̍t pō͘, má-siōng khòaⁿ-kìⁿ hái-chúi pun-khui, kè-sio̍k tōa-pō͘ kiâⁿ, chiū khòaⁿ-kìⁿ hái tiong khui-chhut chi̍t-tiâu thong-lō͘.

Múi-pái góa khòaⁿ tio̍h Siōng-tè kî-biāu ê chok-ûi, chhin-chhiūⁿ sîn-jiah-sèng ê i-tī, chiàu Siōng-tè an-pâi te̍k-sû ê kiù-un, téng-téng, hō͘ góa siōng kám-tōng ê sī, chiah ê sū lóng sī tī choa̍t-tùi chēng-chēng tiong lâi oân-sêng ê. Lēng-gōa chi̍t tiám góa chin kám-tōng ê sī khòaⁿ-bōe-tio̍h tōa-tōa khoa-kháu ê kóng-kò, á-sī hì-ke̍k-sèng ê piáu-ián. Góa khiā tī bān-koân-lêng Siōng-tè ê bīn-chêng kám-kak chi̍t-tiám-á lō͘-ēng toh bô, Hiáu-gō͘ I chòe chiah ê sū sī chin khin-khoài ê, bô su-iàu sím-mi̍h la̍t, iā bô su-iàu góa tàu-saⁿ-kāng.

Sìn-sim ê chok-ûi m̄-sī chāi-tī chit-būn, sī chāi-tī sūn-chiông. Téng-bīn ê keng-bûn ê kò͘-sū sī Siōng-tè kiò chèng-lâng "Chit ê soaⁿ-kok lín tio̍h piàn-piàn khui kau." (Ṳ Lia̍t-ông-kì 3:16) Chèng-lâng sūn-thàn. Chúi tùi chhiau chū-jiân ê chúi-goân bô-thêng lâu lâi, kau té chúi kàu tīⁿ. Tùi lán kóng, che sī chi̍t ê sìn-sim chin hó ê kà-sī!

Lí hi-bāng tit-tio̍h sio̍k-lêng ê chiok-hok mah? Án-ni lí chiū ài khì ó͘ kau, lâi hō͘ Siōng-tè chhiong-móa. Chóng-sī I sī tī siōng bōe siūⁿ-tio̍h ê só͘-chāi, ēng siōng ì-gōa ê hong-hoat lâi oân-sêng chit ê sū. Goān Chú hō͘ lán ū chit khoán ê sìn-sim. "Sī tùi sìn, m̄-sī tùi só͘ khòaⁿ," (Ṳ Ko-lîm-to 5:7) lâi chòe tāi-chì, goān I lâi pang-chān lán, sui-jiân lán khòaⁿ-bōe-tio̍h hong, iā khòaⁿ-bōe-tio̍h hō͘. --- A.B. Simpson

附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com