《台語荒漠甘泉（全羅版）》

 | | | 轉寄

"Siōng-tè ê tài-niá"

作者 陳清俊 翻譯 2008.10.19

listen


Cha̍p ge̍h cha̍p-káu (Cha̍p ge̍h cha̍p-káu ji̍t)

"Iâ-hô-hoa ê iok-kūi tī thâu-chêng kiâⁿ." (Bîn-sò͘-kì 10:33)

Ū-sî Siōng-tè éng-hióng lán sī ēng kán-tan ê chiap-chhiok á-sī kám-siū. Tān-sī lán su-iàu chiàu kám-siū chòe. Nā-sī chiap-chhiok sī tùi Siōng-tè lâi, I sòa lo̍h-khì ōe thê-kiōng chhiong-hun ê chèng-kù chèng-si̍t chit ê sū, liân chi̍t-tiám-á ê hoâi-gî mā bô.

Ēng Iâ-lī-bí chòe lē, i kám-kak Siōng-tè ín-chhōa i khì bóe A-ná-tu̍t hit khu chhân. I pēng bô chi̍t ē kám-kak, chiū hêng-tōng. Thèng-hāu Siōng-tè si̍t-chiān tùi i kóng ê èng-ún. Liáu-āu, i a-chek ê kiáⁿ lâi khòaⁿ i, thê-gī bóe chit khu chhân, tòa lâi Siōng-tè chí-sī ê pêng-kù, i hôe-tap kóng, "Góa chiū chai che sī Iâ-hô-hoa ê ōe." (Iâ-lī-bí 32:8)

Iâ-lī-bí thèng-hāu, kàu Siōng-tè chià-tio̍h I ê chún-pī chèng-si̍t i ê kám-kak, jiân-āu i àn-chiàu chheng-chheng chhó-chhó khòaⁿ tio̍h ê sū-si̍t kang-chok. Siōng-tè iā thang iōng chiah ê sū-si̍t hō͘ pa̍t-lâng siong-sìn. Siōng-tè ài lán bêng-pe̍k I tùi bó͘ chi̍t ê hêng-sè ê sim-ì í-āu, chiah chhái-chhú hêng-tōng. Lán bōe thang hut-lio̍k Tōa Bo̍k-chiá tùi lán kóng ê ōe, tio̍h chhin-chhiūⁿ "Pó-lô kap i ê tâng-phōaⁿ" tī Te̍k-lô-a hit-khoán, (Sù-tô͘ Hêng-toān 16:6) thiaⁿ koh koan-chhat Siōng-tè tī lán ê khoân-kéng tiong chòe ê kang, thiat-té liáu-kái Chú ê choân-pō͘ sim-ì. --- A.B. Simpson

Siōng-tè ê chhiú-cháiⁿ kí ǹg tó-ūi, I ê chhiú chiū tī hia khui lō͘.

Éng-oán m̄-thang tī sim-lāi kóng lí it-tēng beh chòe sím-mi̍h, á-sī it-tēng m̄ chòe sím-mi̍h, chí ū thèng-hāu Siōng-tè hián-bêng I ê tō-lō͘. Nā-sī chit tiâu lō͘ iáu sī ún-chông teh, he chin bêng-hián lí iáu m̄-sī chhái-chhú hêng-tōng ê sî. Siōng-tè ài lí khiā tī sím-mi̍h só͘-chāi, I hū choân-pō͘ ê chek-jīm.

Siōng-tè ēng lán só͘ bōe bat ê lō͘-thêng,
Chhōa I ka-kī ê kiáⁿ-jî hiòng chêng.

附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com