《賴永祥講書》

 | | | 轉寄

《教會史話》(1_061)俗語字在甘字典

作者 賴永祥 2008.09.14

甘為霖編「廈門音新字典」，m̄若有正字，有同音異形字、俗字，mā有所謂高級字形m̄-koh khah少用ê)、罕用字、偏字kap怪字，各別佔一行，列記讀音kap解義。注音用羅馬宇。正字、字首用大寫；俗話音，一律小寫。抬頭單字，先記字頭大寫ê羅馬字讀音，koh來是列漢字，字義解說khǹg tī後壁。抬頭俗語，首列語音，chiah記正字、讀音，以括弧做記號，如:Lak(六liok)，再汰列解說。

正字ê音義，以「康熙字典」為準，問題無chē。惟俗語字，編者靠當時tī閩南kap台灣「十五音」字彙外，無文獻thang好參考，只有聽別人講。俗語所該當ê正字，iá是口傳失真soah有語無字ê是真chē。雖然是無顧辛苦去訪查，soah往住為著一ê字iá是半句話，躊躇真久bōe凍決定。

林錦生kap冊房經埋孫耀雲有很好ê交情。伊講孫先生牛穿chhah隨便，m̄-koh伊並m̄是啥麼攏m̄ bat ê人，心存私淑。孫曜雲對俗語偏字ê蒐集kap研究，更有奇怪ê癖好。有一日問錦生:「你是甘牧師字典ê編修員，雅俗兼備。雅者正字音義，自有康熙字典，足資依據，事工比較khah簡單。俗者俗語，散漫參差，亂雜無據。雖有十五音字彙，足資借鏡。m̄-koh mā是有bōe凍盡如人意者，mā是無可奈何？」伊chiah koh問講:「親像餡餅ê「餡」，水餃ê「餃」，恁ê字典kám有chit-ê字？又koh親像淘井ê「淘」字，汰米ê「汰」字，你kám知影chit寡字？」頂面四ê字，雖然m̄是tiâⁿ-tiâⁿ用，soah是淺顯ê俗語字。待錦生beh作笞ê時，耀雲接落去koh問講:「再如俗語Kau soa-sap之 soa-sap，伊ê正字是啥麼？錦生àⁿ頭tī leh思考。過一時仔chiah以「瑣屑」二字來回答伊ê問題。耀雲拍手笑講:「語云:後生可畏。信哉斯言!聽你ê回答，會凍知影你m̄普通人會凍比ê。甘字典有你真正是真幸運。」

錦生得著耀雲ê鼓勵，甚至是伊辭退編修了後mā是繼續搜尋探討俗語字，總共得參考書所無ê有53字，tī 1911年春交hō͘甘為霖。(據「七十年前之回憶」)

孫耀雲，橋仔頭後衛庄人，1883年由黃月德導引入信，tī 1886年1月24日由巴克禮牧師領洗，同年到冊房做印刷工， 服務33年，期間升做經理，koh做到公報社ê主任。1896年至1903年任太平境教會執事，1903年至1911年任長老。退休了後轉屬東門教會。 　 　
《台灣教會公報》 1940期 主後1989年5月7日