《賴永祥講書》

 | | | 轉寄

《教會史話》(1_055) 林錦生與甘字典

作者 賴永祥 2008.08.03

林錦生，1894年12月16日tī台南出世，老父叫林江河，老母叫詹敬。1904年10歲入去新樓長老教中學(今長榮中學前身);1907年3月畢業著受聘協助甘為霖牧師編修字典，工作béh年了後chiah來辭頭路，拍拚學日語。1911年3月考著台灣總督府ê醫學校，1916年畢業就出來行醫，先tī楠梓橋仔頭，後來赴廈門、汕頭、上海等等ê所在，mā有學漢醫。二次大戰了後tńg來台灣，kohti7橋頭開業，叫做和光醫院。kap夫人施錦(1917～1969)之間，有2男3女，則宗邦(針灸師)、淑芬(適張俊傑)、宜男(適洪進來)、宗翰(醫學博士)及冠男(適洪山水)。

林錦生早年是屬於台南太平境教會，1905年冬起至1911年春約五年餘擔任禮拜司琴。晚年tī橋頭教會擔任長老kap附設懷恩幼稚園董事長真chē年a，bat獻仕隆路土地壹筆hō͘教會。他ê作品有「新世紀形相學」(1978年台南鵬逞印刷廠刷印)及「七十年前之回憶」(1976年刊？)一小冊。1980年1月20日安息。

我ùi林冠男女士hia得著「七十年前之回憶」一本。書ê副題是「廈門音新字典與我」，有三十面，分三段(一)學而時習之，(二)練琴司琴，(三)字典編修。字典編修部分有五小節：(一)割鷄焉用牛刀，(二)新字典構想，(三)參考書，(四)即席提案，(五)英國流紳士，(六)冊房經理鋒芒不露，(七)無戶籍之私生子？是教界難得之回憶錄。

根據錦生ê回憶，甘字典ê編修序分作二部：第一部是讀音基礎篇，以彙集向音異形字、填錄俗語該當字于項下為專責；第二部是解義篇，專責抄錄語義，修整訶句。錦生負第一部基礎篇；以打馬字(Talmage)字典chiâⁿ作藍本，tùi甘牧師所製作ê羅馬字單語手冊，單語每字一行，照英文字母，ùi第一字A開始，錦生搜集同音異形字，不管外多攏收入該音項內；同時審定各字ê讀音，希望一定愛正確；俗語字加參考15音小心來取捨，恬恬á拍拚修改，經過beh 2年chiah完成。

m̄-koh錦生tī回憶內面，mā提起著2項惋惜ê代誌；一ê是應該順應時潮，凡是日文內底慣用ê漢字文句成語彙集攏編入去字典，一定有餘力不足，辭任了後彙齊170多語(如挨拶、沙汰、玄關、丈夫等)手交甘牧師，m̄-koh攏無去hō͘人採用；二者kap冊房經理孫耀雲先生合作所得ê五三句俗語字，亦踵步覆轍。 1910年11月陳大鑼畢業台長老中學，著hō͘甘為霖牧師約聘，共事3年，負責完成解義、整編kap校正，「廈門音新字典」總算tī 1913年順利刊行。字典ê完成是甘牧師ê心願kap設計，是林錦生、陳大鑼ê勞作!


　《台灣教會公報》 1933期 主後1989年3月19日