《賴永祥講書》

 | | | 轉寄

《教會史話》(1_052)李科羅kap鄭經

作者 賴永祥 2008.07.13

鄭成功優遇道明會士李科羅(Victorio Ricci)頭尾攏無變，m̄-koh in kiáⁿ鄭經leh？根據G. Philips「國姓爺傳」謂:鄭成功北征金陵(南京)ê時，鄭經bat百方阻碍李科駐ê傳教。鄭經bat講神父有意beh霸佔鄭成功ê厝，ma7bat密縱部屬tī eng暗ê時來破壞教堂kap神父寓宅ê厝頂。當神父beh請鄭經m̄-thang按呢ê時，鄭經一面答應beh賠償伊ê損失，另一方面iáu是命令部屬繼續破壞。後來有一隻英國ê船仔遇風漂來到廈門，伊ê貨物攏去hō͘暴徒搶了了a，船員hō͘鄭方監禁。因為鄭方懷疑渠等是滿人派來ê間諜。船員偷走出去求清軍kā in tàu相工。鄭經就按呢將chit-ê責任mā算tī李科羅ê身上，稱神父kap敵方有秘密ê來往、煽動教徒叛亂並有將廈門交hō͘清人ê企圖。就按呢李科羅無法度無離開chit-ê所在，bih去tī成功所保護ê一ê葡人ê船頂。鄭經知影chit-ê消息了後馬上征收教堂租hō͘典鋪。到北征失敗，戊功回師了後，鄭經因為憚父之意，chiah下令來恢復舊狀。


1662年7月2日(永曆16年5月8日)成功死，經嗣立。李科羅tī鄭經據廈、台期間，bat有2次抵著雞籠(基隆)事，hoān勢需要注意。頭一pái是tī 1662年8月，李科羅對菲律賓tńg來，船隻迎風beh修理來駛入雞籠港。hit時有真chē住民是對附近山內來ê，用土語iá是一半句仔西班牙語，kā神父告白信仰，並出示十字架、珠數、聖像版畫、書籍等，李科羅bat為住民實施洗禮kap告解。停留10日了後著tńg去厦門。1663年4月科羅the̍h鄭經函使非，提議恢復通商。


李科羅第二pái抵雞籠是1664年。hit時清軍攻打厦門，李神父hō͘人掠去，好加在商人老磨君子丹鎮(Constantine Nobel)協助伊走出去，koh tńg來到雞籠。李神父大約tī hia tòa一年，住民信教者增加真多。1664年8月27日荷軍抵雞籠，Herman de Bitter任駐雞籠軍隊指揮官，mā有Cornelius Keyserskind從事傳教，所傳當然是改革宗，che kap李科羅之間ê關係無啥清楚。


有關荷人tī 1664年8月到1668年10月間koh再據雞籠史事，我bat有「清荷征鄭始末」(「台灣風物」4卷2期kap 3期；復收tī拙編「明鄭研究叢輯」(一)一文，故不贅言。我bat tī基隆讀小學kap中學、去社寮島chhit-thô真多擺(洋名Palm Island，今稱和平島)俗稱「千疊敷岩」附近ê「蕃字洞」，就是當年荷人koh再據雞籠時ê遺跡。洞內刻字千餘，大小參雜，其中可見1664、1666、1667等西曆年號，mā有Jacob Schelck, Hans Hubener, Henrick, Botenpoly, Micoiaw Iros等洋字。後來日人將hit區編入要塞禁區。我真多年攏m̄-bat koh再去a，m̄知chit-ê史蹟ê保存情形如何？


《台灣教會公報》 19303期 主後1989年2月26日