《賴永祥講書》

 | | | 轉寄

《教會史話》(1_020) 巴克禮推動白話字

作者 賴永祥 2007.09.09

台灣ê南北基督長老教會，多年使用羅馬拼音ê白話字。Chit種白話字是用ABC字母kā台語ê聲音kap語調拼出來者，thang正確來kā聖經或其他意思傳達hō͘讀者，而且短時間就thang學會曉用。

巴克禮牧師是推動白話字siōng出力ê，其回憶記載：「Ttui3我初到台灣，就確信三件事，到taⁿ經過五十年，iáu堅信不移。第一，若ài有健全koh有活命ê教會，每一個信徒不分男女，lóng tio̍h研讀聖經。第二，chit-ê目標，使用漢字是達bē-tio̍h ê。第三，使用羅馬拼音ê白話字，thang達到chit-ê目標。白話字真適合婦女、兒童kap未受教育hiah-ê人ê使用; 讀冊人只用漢字，就是對白話字ê輕視。因此我決定以身作則，用白話字來代替漢字。我一生ê中間只有一pái使用漢字聖經講道，á為hit一pái感覺遺憾。我當然知影，只用白話字，會hō͘人誤為無讀冊無知識，但想tio̍h可能帶來ê利益，我就不在乎loh。」(Band. “Barclay of Formosa”，p.67)

1885年7月，巴克禮牧師創刊了白話字刊 ── 「台灣府城教會報」。其ê 發刊詞án-ne講：「Lín家己讀聖經，會受聖靈ê感動，雖然無人講道hō͘ lín聽，猶原會明白上帝ê旨意。可惜漢字真oh學，會讀ê人少，因此阮另外來設法，用白話字來印冊，hō͘ lín khah容易看bat。阮最近tī府城安置一座印冊機，thang印chit種讀物。希望眾人ài出力學習白話字; 以後阮若印什麼冊，lín lóng看會bat。Mài有人認為看會bat漢字，就m̄免學白話字，mā mài看輕伊，認為是細漢gín-á ê把戲。兩種字lóng有用處，不過因為chit種白話字容易學容容易bat，因此必須先kā伊學，以後如koh再學讀漢字koh-khah妙；但是beh先學白話字，以免因為無學讀白話字，á看m̄-bat阮以後所印ê。勸lín眾人、信徒、慕道友、男女老幼、bat字或m̄-bat字lóng趕快來學，án-ne lín就會讀報紙以及其他ê冊kap聖經，希望lín學習道理愈深，德性愈完備。」「台灣府城教會報」，就是「《台灣教會公報》」ê前身，白話字公報最後一期是1049、1050期合刊，時1969年三月。

十七世紀荷蘭人在台宣教，成績不差，但荷蘭政權被逐出，基督教mā真緊失去。其原因neh? 巴牧師認為是無kā聖經譯成本地語言，soah致使無人ē-tàng看聖經來互相繼承其信仰。實在可惜ê是，當in tī荷蘭印好本地語言ê福音冊ê時, 已經siuⁿ慢loh。(Band. “Barclay of Formosa”)。按1661年新港腔馬太福音，由宣教師倪但理(Daniel Gravius)譯出刊行。 　 (華語原載：《台灣教會公報》第1894期 主後1988年6月19日)