《賴永祥講書》

| | | 轉寄

《教會史話》修訂1_009 台灣基督教會醫學史

杜聰明博士(1893–1986)有一文,題〈台灣基督教會醫學史〉,見tī《台灣醫學ē曉雜誌》(第69卷第2號,1963年2月刊),後來收錄tī《杜聰明言論集》第二輯(541-562頁)。

杜博士Tī該文第一章緒言講:最近發見tī台灣教會公報社發行1940年kah 1941年《台灣教會公報》,台灣醫界先輩彰化基督教病院蘭醫生門生顏振聲先生用白話羅馬字文發表〈南部教會醫療傳道史〉,相信是寶貴ê文獻,尤其以白話羅馬字文寫作罕得有人注意。因為án-ne,筆者受張榮宗kah黃主義兩先生之協力翻譯做華語,做本題第二章論文來紹介。Koh可惜顏先生hit內面ê內容限tī南部kah彰化基督教病院而已,關係北部教會馬偕記念病院ê歷史無講tio̍h,因為án-ne,筆者tī民國51年(1962年)2月12日親自前往淡水,訪問偕叡廉牧師,聽伊ê父偕叡理牧師來淡水傳教kah醫療故事,以及筆者調查種種文獻來寫本論文,為第三章北部教會醫療傳道史來報告,提供為台灣醫學史ê資料ā。

顏文,原載tī《台灣教會公報》663–668、670–672、674–677號(l940年 6月–1941年4月);詳述1865年5月馬雅各醫自出世來台宣教kah醫療以後ê南部教會從事醫療ê情形,包括旗後醫館、台南舊樓醫館、新樓醫館、女界醫療傳道、大社醫館kah彰化醫館等等。M̄-nā敘述(sū-su̍t)機構ê發展,ta̍k位醫療宣教師ê事蹟,mā列出tùi chiah-ê醫療宣教師學習醫療ê本島人姓,有時甚至得tio̍h醫治來信教者ê名lóng有,實在是一本說明台灣西洋醫學天光期ê良冊,是本島第一部有系統ê醫學史。1942年,台灣教會公報社出版單行本,題名《南部教會醫療傳道史》(本文51面,白話字),台南神學院圖書館藏有一冊,係故陳金然牧師所贈ê。

顏振聲醫生,號加齡,1876年6月25日生,1949年1月9日安息。老父顏永成,老母洪仙河(永嬉),少年ê時bat寄居高長ê厝,tī教會書房習印刷,進大學(神學校),tī新樓醫館kah金醫生(Dr. W. Murray Cairns,1892–1895年tī台)學習醫術,後來轉去彰化kah蘭大衛醫生(Dr. David Landsborough)學習醫術,tńg來台南市開業稱做愛育堂,是當地ê名醫;tī太平境教會歷任執事(1900–1907)kah長老(1907–1946);mā bat tī新樓病院,擔任過院長(1942–1944)。



顏振聲醫師