《賴永祥講書》

 | | | 轉寄

台灣基督教史ê寶庫

作者 王昭文 2016.03.27


八月間有去一chōa美國，拜訪tòa tī波士頓ê賴永祥教授。今年(2012年)九月滿90歲ê賴教授，照常每工慇勤工作，整理多年來收集ê資料，不斷充實「賴永祥長老史料庫」（www.laijohn.com）。Chit-ê網站，是公認ê台灣研究重要明燈，台灣基督教史寶庫，每工lóng有真chē人tī chia挖寶、chhōe根。

賴永祥教授名氣siōng響ê領域是tī圖書館學，伊參與創辦台灣大學圖書館學系、獨力研發廣受採用ê「中國圖書分類法」，ē-sái講是台灣圖書館界祖師級ê人物；m̄-koh，伊個人興趣其實是tī歷史研究。伊是台灣戰後第一批投入台灣史研究ê學者、17世紀台灣史研究ê開拓者，著有《台灣史研究初集》，koh纂修《台灣省通志稿卷三：政事志外事篇》。伊是到taⁿ siōng長壽ê台灣研究刊物《台灣風物》ê創辦者之一，mā是siōng早20年ê重要作者。

Án-ne，一位廣博、頂真ê學者，tī 65歲了後，漸漸kā工作重心放到tī台灣基督教史上。伊自少年ê時期kah老母同齊受洗，對信仰追求非常認真，前後擔任台北和平教會、波士頓台灣人基督教會ê長老。Tī 1965年to̍h編輯整理〈基督教台灣宣教史文獻〉，收入《台灣基督長老教會百年史》做為附錄。赴美後，伊繼續收集基督教文獻資料，並發行「壹葉通訊」來kah諸親友分享重要史料、同時徵集相關資料。後來tī台灣教會公報社總編輯盧俊義牧師ê邀請下，1988年起開始tī《教會公報》連載「教會史話」專欄，每期約1000字左右。「教會史話」連載了674則，出版5輯。賴長老宣稱其健康狀況不佳，一定tio̍h暫停寫作。無jōa久，「好學不倦」ê賴長老，開始學習使用電腦，並且jú來jú有心得。2007年1月，tī林皙陽牧師娘李秀卿女士ê協助下，成立「賴永祥長老史料庫」。除徵得台灣教會公報社同意，kā《教會史話》修訂、電子化、上網，賴長老koh kā所收藏ê史料kā它解題，漸漸khǹg起lih chit-ê網站。

真chē私人資料願意提供hō͘伊，是因為信任伊ê人格kah處事能力，伊所建立ê公信力，oh得有人ē-tàng取代。不過，賴永祥長老珍貴ê所在並m̄-nā tī伊長年用心收集ê資料，koh khah tī伊做歷史研究ê細膩用心kah整理史料ê方法。伊kā零碎ê資料做有意義ê連結、分類，展現出無人ē-tàng取代ê學術能力。M̄-koh伊無kā chiah-ê物件當做私產，反tńg建構史料庫，hō͘ koh khah chē人thang使用。Chit-ê史料庫，khah se5ng一個用心設計ê圖書館，tùi一般讀者、chhōe入門途徑ê學徒到專業研究者，lóng thang tùi chiah-ê整理kah真好用ê資料中，得tio̍h thang用ê資訊，甚至chhōe-tio̍h前往下一階段ê跳板。 賴長老講伊做chiah-ê是出tī個人興趣。M̄-koh，伊ē-tàng久長繼續，不管有無掌聲lóng m̄-bat厭倦，而且對資料一屑á都無藏私來分享，tī以歷史為興趣者身上並真罕得。我想，若m̄是出tī信仰熱情，若m̄是出tī對教會ê使命感，án怎有可能？

讚嘆賴永祥長老ê工作之餘，mā難免為tio̍h台灣基督長老教會頭尾iáu未建立「台灣基督教史料中心」而感遺憾。歷史檔案資料館籌備數年，一直iáu未進入具體規劃。期望tī 2015年基督新教來台150年週年記念ê時，ē-tàng看tio̍h一線光明。賴長老做好模範，bē-tàng無有傳承繼續ê人。

*王昭文撰 《台灣教會公報》3169期 2012年11月25日 窗口無遮欄 ; koh見tī王昭文茄苳樹窠網站 2012年11月28日。附圖像 賴永祥長老tī厝內ê工作空間 (王昭文2012年8月撮影)