《賴永祥講書》

 | | | 轉寄

《教會史話》(2_130)「高長伯」傳探原

作者 賴永祥 2010.01.03

高長，通常hō͘人叫做高長伯，是長老教會tī台灣ê第一ê果子，mā是第一位本地出身ê傳道者。真可惜kàu chit-má ia̍h-bōe有詳細ê資料刊..出來。伊在生相關ê消息，一般人知影ē可能lóng ùi楊士養牧師寫ē《台灣信仰名人略傳》第一冊（1966年刊），ia̍h是楊士養編寫林信堅修訂《信仰偉人列傳》（1989年刊）。

楊士養牧師所寫信仰ē名人，材料豐富，記ē「不特為死者作紀念碑，更可為後人考資之鏡」（錄自「前言」），kan-tāⁿ差tī伊通常無註明資料ē來源。「高長伯」一文（tī《略傳》第一冊16-19頁），其實是高金聲牧師用白話字寫ē中文翻譯。高金聲牧師寫ē「高長伯」是南部教會歷史部所寫「追念聖徒」ê其中一ê，收tī《南台教會史》（楊士養著）成做附錄。既然是翻譯，góa tio̍h kā兩ê對照，發現chi̍t-koah問題。舉例來講：高文原記「高長伯是福建省泉州府（Choan-Chiuhu）晉江縣永寧城的人」，m̄-koh楊文做漳州府，筆誤。高文koh記Li Hui兄受長伯ê誠實感動來入信事，楊文tio̍h寫作李輝兄，m̄-koh查考文前、李文後ê系譜，應是李惠……。

林信堅牧師修訂ê《信仰偉人列傳》（請見第17-23頁），竟然kā楊士養所寫ê「高長伯」，mā就是高金聲所寫「高長伯」ê中文譯，全部thâi掉；用1912年11月出刊《台南教會報》（第332號）無注明作者ê「高先生的小傳」譯文來代替，koh附林信堅寫tī 1985年3月31《台灣教會公報》（第1726期）ê古文新註做附錄。林君並無講清楚拿掉原本作者ê全文。 高侯青蓮長老（1879-1975年），是高再得長老娘，有歲ê時陣leh做編寫in ta-koaⁿ高長傳教士傳記，運用聽tio̍h、看tio̍h、調查資料kap思考，koh有林宇（長老教女學第一屆校友）ê幫助，用白話字完成。遺族kám有意思beh發行？

有關高長在生資料ê找chhōe，góa感覺黃茂卿長老ê努力真值tit提出來講。伊tī《台灣基督長老教會太平境馬雅各紀念教會設教一二O年史》（1985年刊）早期史料內，koh tī《……（同）九十年史》（1988年刊）內，形容高長是台灣宣教ê「火戰車」，真kut力leh調查。Tī《……九十年史》，koh有高聰明醫師（高金聲牧師五男）提供真chē高家收藏ê相片，真珍貴。

有關高長在生，中外資料koh需要找chhōe（譬如講《台南教士會議事錄》），伊ê系譜需要編做（kan-tā想看mài算傳道者、教會長執、社會領袖有jōa-chē？）真期待有chi̍t工ē-tàng完成。

《台灣教會公報》 2023期 主後1990年12月初9