《賴永祥講書》

 | | | 轉寄

《教會史話》(2_102) 府城廟宇kap聯境

作者 賴永祥 2009.06.21

基督教一開始是傳kàu台灣府城（台南），宣教師tiāⁿ-tiāⁿ會注意寺院、齋堂、廟宇、祠堂khah chē kap香火khah興ê所在。Kan-ta無一定知道以寺廟為主體有聯境組織，會使真簡單來動員民眾kap壯丁來反教。

漢人通俗信仰是多神ē（Polytheism），拜ê有天神、地祇、人神、職業神、家族神、地區神、或佛陀、菩薩、羅漢等外來神、甚至動植物、石頭；名稱真chē；級數無仝，有至尊至上ê玉皇上帝，mā有孤魂野鬼ê有應公。

府城有俗稱七寺八廟。開元、法華、竹溪、彌陀、龍山、重慶、黃孽七寺kap大媽祖廟、祀典武廟（大武廟）、府學文廟、府城隍廟、風神廟、藥王廟、大上帝廟（北極殿）、水仙宮等（八廟說法不一，mā有列龍王廟、馬公廟等等）是規模上大ē。Khah-su kā大間細間lóng合--起來，同治年間府城寺廟超kòe一百間。

廟有公廟（譬如講文廟、府縣城隍廟、大天后宮等），有私廟，mā有境廟。境廟是住tī hia ê信徒支持ē，管khah闊ê有十條外街，khah細ê一、二條街。有ê時陣有屬廟，叫做角頭廟。Kàu寺廟信徒來祭祀、發願、求平安、壓煞、鎮病、求醫、撫冥、卜命……，koh借慶典等活動。民眾saⁿ-kap來聯誼，自然成做生活ê中心 鴉片戰爭爆發了後，巡道姚瑩、總兵達洪河，因為感覺防備khah無夠，tio̍h kā城內ê街á路分做72境，招集發落紳士舖民壯年2、3、4十名等，hō͘ in武器，分段幫chān守備。道光22年（1842年)`姚瑩奏已經有82境。Chit-koah境真自然以寺廟為單位。咸豐3年（1853八五三年）府城成立團練總局，廟境壯丁猶原負責巡查。同治元年（1862年） 戴潮春ê事件，營兵義勇lóng來鬥saⁿ-kāng，署巡道洪毓琛koh-khah進一步計畫kā境連--起來加強地方治安。

所成立ê 10個聯境（括弧內指境主廟）：有二十一境（大上帝廟），十八境（"縣城隍廟）、八協境（大人廟）、六合境（開山王廟）、八吉境（保和宮，後來改做總趕宮）、六興境（開山宮）、六和境（祀典武廟）、四安境（良皇宮）、三協境（風神廟）kap七合境（集福宮）。 各聯境有成員，lī-chhiaⁿh規定防守城門kap境域。本文旨m̄是leh 詳細siāu-kài聯境制ê來龍去脈，有意思beh進一步了解ê人會使讀石萬壽撰「台南府城的城防」、「台南市宗教誌」、「寺廟與都市發 展」等文。Chit-koah境廟，加上三郊管理ê大天后宮、水仙宮、海安宮等。M̄-nā是信仰中心。Mā是民防中心，綠營反倒轉成做beh食m̄做si̍t ê單位。同治5年閩浙總督左宗棠正下令設置保甲局ê時陣，局mā大部份tī聯境各段簽首主廟成立；維持地方治安ê大權，完全落tī聯境ê keng-kah頭。

《台灣教會公報》 11995期 主後1990年5月27日