《生活e5台語，台語e5生活》

 | | | 轉寄

公報編輯參加白話字中級檢定最高分

作者 台灣教會公報 2006.01.22

【林宜瑩台北報導】為tio̍h hō͘ koh-khah chē人使用白話字，長老教會總會台灣族群母語委員會，舊年十一月七日試辦白話字中級檢定，共有卅五人應考，最近公布成績單，《台灣教會公報》資深編輯潘秀蓮勇奪最高分；而為響應推動白話字，台灣教會公報社於二○○六年一開始就開辦白話字課程，鼓勵全體同工lóng參加，為保留長老教會重要文化資產貢獻心力。

Chit次得tio̍h檢定最高分ê潘秀蓮，是嘉義中會岩前教會ê執事；得tio̍h chit項殊榮，伊表示台灣人會白話字照理應該是天經地義ê事，無什麼好誇口。講到如何學習白話字，潘秀蓮講細漢時chū教會長老bat開授白話字課程，因此tī耳濡目染下便學會曉白話字，進入《台灣教會公報》擔任週刊編輯後，為tio̍h編排台文版需要常常校對白話字，便án-ne jú練jú熟練。

　不過，引發潘秀蓮對白話字ê熱愛，則是chit兩年ê事。潘秀蓮表示，有看tio̍h教會外人士看見台灣羅馬字（白話字）ê重要性，紛紛興起一股推廣、學習白話字ê熱潮，反觀教會內ê人，對白話字卻無重視，結果連鄭兒玉牧師tī二○○四年ê一場台灣羅馬字研討會中iáu特別撰文，以「長老教會出了歹子孫！」猛批，自一九七○年代以後，長老教會ê人竟然m̄教、m̄寫、m̄用源自長老教會ê白話字，ná親像敗壞家產ê歹(pháiⁿ)子孫仝款，hō͘人痛心！

為tio̍h hō͘白話字chiah-nih重要ê教會文化資產能延續落去，台灣教會公報社身為教會文字事工機構，自然必須一肩擔負起白話字運動興衰責任，以全體同工同齊學習白話字ê具體行動，來響應推動白話字運動，結業後也會請投身白話字推廣gōa年ê陳豐惠老師、莊明正長老、張德香牧師進行檢定測驗。

　Á總會族群母語委員會試辦ê白話字中級檢定結果，過關者名單thang去網站http://www.pct.org.tw/閱覽。 （原載台灣教會公報社第2811期）