《生活e5台語，台語e5生活》

 | | | 轉寄

「無獨有偶」2004雲林國際偶戲節 觀後感

作者 Chuniok 2006.02.05

七月tńg去台灣參加李登輝學校，順續去竹山向台灣布袋戲ê劉進春大師拜師學藝，難得tú-tio̍h 7月9~15日e52004雲林國際偶戲節，我就tòe劉大師去觀賞。

節目單ê簡介講起：「台灣進入面臨傳統技藝失傳、老藝人凋零、文化藝術斷層ê命運。有感於世界各國對家己國家相關文化ê保存、承續，lóng投入相當ê預算kap人力，koh有專責推動ê機關....經濟發展ê台灣tio̍h如何重新去豐富咱ê文化生活，hō͘文化藝術無因功利來消失，hō͘文化藝術進入民眾ê生活中....雲林縣是布袋戲ê故鄉，面對工商社會ê變遷中，布袋戲也面臨人才凋落ê命運，將傳統文化保存、延續kap發揚....這是辦理偶戲節ê最大目的。」

主辦單位是雲林縣政府，指導單位有行政院文建會、新聞局、交通部觀光局kap中華文化復興復興運動總會。Chit幾年來，新政府對台灣文化復興ê重視，大家[有目共睹]，是值得咱歡喜kap鼓舞ê代誌。但tāi先tio̍h將「中華文化復興復興運動總會」正名做「台灣文化復興復興運動總會」，布袋戲kap原住民文化kám是「中華文化」？

演出ê地點有斗六、虎尾、北港三位，分室內kap室外。七月是台灣siōng熱ê天，我日時揀室內ê節目，暗時chiah揀室外ê。參加演出ê單位，國內有台北縣原住民文化藝術團、新興閣掌中劇團、真五洲(黃俊雄)布袋戲團、廖文和布袋戲團、虎科大掌中技藝社、正心中學布袋戲研習社、昇平五洲園、小叮噹兒童布袋戲社、天宏掌中劇團、錦飛鳳傀儡劇團、小西園掌中劇團、蘋果兒童劇團、小青蛙劇團、鞋子兒童劇團、五洲園掌中劇團、吳萬響掌中劇團、明興閣掌中劇團、東華皮影戲團、亦宛然掌中劇團、隆興閣掌中劇團、春秋閣掌中劇團、西田社傳統劇場、五隆園掌中劇團、明世界掌中劇團等24個團。國際ê單位有十指幫劇團(新加坡)、波章傳統偶戲團(泰國)、皮諾丘木偶戲團(塞爾維亞)、巴士偶戲團(克羅埃西亞)、賽度民俗藝術團(印度)、江戶傀儡劇團(日本)、大衛史密斯劇團(加拿大)、今田人形座劇(日本)、危險平衡劇團(智利)、格連納木偶劇團(德國)、西菲亞巴司偶戲團(德國)等十一團。Chit款ê陣容ē-sái講是真盛大，這是台灣舉辦ê第三屆國際偶戲節，án-ni繼續努力落去，台灣ê文化藝術ē-tàng行出國際社會，為國家做文化外交ê貢獻。

加拿大ê大衛史密斯劇團kap新桃源布袋戲團劉進春大師已經有交情tī-teh,阮特別去觀賞in ê演出，團長是退休ê音樂教授大衛•史密斯，團員是伊ê bó͘ kap囝。Chit-ê傀儡戲團演出類似《虎姑婆》ê故事，一開始座無虛席，開演了後觀眾(大部分是學生)陸續離開，可能是因聽無英語ê對話，可見演出使用觀眾ê語言是有必要ê。

黃俊雄之夜是演出ê最高潮，大人囝仔觀眾滿場，siōng頭前有一位103歲ê布袋戲元祖黃海岱，伊是黃俊雄ê老父。黃俊雄tī台頂對老父褒獎有加，開始使用早期木造雕刻ê戲台，有夠幼秀精製。了後使用khah曠闊ê舞台，後台樂隊鬧熱滾滾，加上黃俊雄巧妙絕技ê口白對話，頭到尾lóng無冷場，看tio̍h真爽快。

希望阮Boston 蕃薯園布袋戲團繼續努力求進步，有一工mā ē-tàng hō͘觀眾看了真爽快。