《生活e5台語，台語e5生活》

 | | | 轉寄

駱維仁博士受頒榮譽神學博士感言（台語漢羅版）

作者 駱維仁 2012.10.07

1, 認同受剝削ê原住民
阮全家ê人lóng真尊重原住民，看in做家己ê人。Tī 1928年ê歇熱，阮爸爸受派去鳳林實習。有一日，伊看tio̍h一個太魯閣ê同胞tùi山頂揹一大籠kin蕉落來街á賣hō͘一間細間店。店主hō͘伊一角半銀，伊隨時開九錢錢去買一罐米酒，koh用三錢錢買小魚脯，坐tī樹á腳lim酒；無久，伊開始唱酒歌，講酒話，lim了就倒落去土腳睏。睏醒，看tio̍h日頭teh beh落山，感覺腹肚mā iau，伊就倒tńg去siâng hit間店，用所chhun ê三錢錢買幾條á已經爛去ê kin蕉，一時á久吞了了，然後空手倒tńg-khi厝裡，無買半項tńg去hō͘ tī厝裡teh等，teh iau餓ê bó͘-kiáⁿ。

所看tio̍h chit-ê奇異ê情境一瞬間變做異象：阮爸爸tī hit時，hit所在決志，將來beh去對hō͘政府欺壓kap台灣人剝削ê原住民傳福音。為tio̍h beh實踐chit-ê決志，阮全家tī 1948年搬去台東。Tùi hit-chūn起，阮厝就變做kán-ná旅館，有原住民出出入入，不時都有原住民來tòa，來食飯；阮lóng對待in ká-ná家己ê兄弟á是姊妹。因為án-ni，天香kap我tī 1995年beh tùi香港搬tńg來台灣ê時，阮開始想，將來chiah-ni̍h chōe ê冊beh hō͘啥人。阮一久á就決定beh留hō͘家己所認同ê族群–專門訓練原住民傳教者ê玉山神學院。

阮m̄是有錢人，生活樸素。Tī Princeton讀冊頭chit年(1960) ê冬天，因為真寒，我就去Salvation Army ê舊衫店買一領jacket；hia teh賣ê lóng是人m̄-ti̍h ê舊衫，真sio̍k，我用兩角半kā伊買tńg來。Hit領jacket到今á日(60年後)我iáu-teh穿。Thang講，chiah-ê冊是阮儉腸neh肚買ê。雖然阮真儉，m̄-kú若買冊就真phàⁿ手。Chiah-ê冊有jōa-chōe本，我m̄-bat算。玉神ê truck已經來載四遍，至少tio̍h koh來兩遍chiah搬會了。阮mā有收集成千片ê CD，大部分是聖樂。Koh無久chiah-ê lóng會離開阮，有ê已經tī阮身邊五六十年ā ，算是老朋友；beh kap chiah-ê朋友相離，bōe免得悲傷。玉神來搬第四遍以前，連續兩暗，我一個人戇神戇神坐tī已經整理好勢ê冊面前直直siòng，特別是看tio̍h一kóa天香用真chōe精神，真chōe時間，真chōe錢tùi世界出名ê博物館買tńg來ê；有ê是伊iáu無機會使用就進入伊ê孤獨世界–看tio̍h hiah-ê名畫kap冊ê時，bōe禁得目屎chha̍p-chha̍p滴，ná chún beh kap siōng親密ê親人相離別一樣。無冊tī身軀邊實在真悲傷koh無方便。我ta̍k日都因為beh讀á是參考某題目á是某本冊，總是已經無tī身邊來感覺苦惱。

其實，chiah-ê聖經、冊kap CD —阮所有ê一切，是beh留teh hō͘家己所認同ê族群ê，beh收藏tī玉神ê 「記念駱先春，駱洪敏聖經文教館」內面，應該tio̍h因為有hiah-ni̍h好ê所在thang hē來歡喜chiah tio̍h。阮真ǹg望有真chōe人會使用chit-ê文教館，thang幫贊家己khah了解上帝ê話ê奧祕，得tioh教示kap造就，也tùi chiah-ê好聽ê音樂得tio̍h激勵kap安慰。

2, Khiā tī異端作神學
Taⁿ請容允我tùi一生ê工作做簡單ê交帶，ōe-tàng講，我一生ê工作lóng是khiā tī異端chit pêng來做ê。

我tī 1960年去Princeton神學院讀冊，tī 1968年完成學業就tńg來台神教冊。我tī台神教無jōa久就開始感覺有問題。我所教ê hō͘人判斷做「異端」。保守ê宣教師先開炮，後來董事kap校友開始抗議，造成困擾。佳哉，當時ê院長陳皙宗博士每一遍lóng khiā出來維護我講：「少年ê學者應該有自由發表家己ê見解。」

Chit-chūn一下想起來，問題是出tī我siuⁿ注重理論，無考慮tio̍h實踐。Princeton ê創學理念是「Learning and Piety」(學習kap敬虔)，就是學問kap信仰，理論kap實際ê關係；嚴格來講，是tio̍h兩項兼顧。M̄-kú，到現在iáu有一kóa聖經學者主張講，聖經研究ê目的是kan-taⁿ使用「歷史批判ê方法(historico-critical method)」推論某一個事件，某一句話á是一段話ê歷史聖就完成伊ê任務。祂ê研究是tio̍h提出聖經對原讀者有傳甚麼信息(what it meant)，無應該探討聖經對現代人有甚麼信息kap意義(what it means)，因為這是系統神學家á是傳教者ê任務。

我看chit款ê想法siuⁿ簡單，甚至siuⁿ幼稚；因為，對基督徒來講，聖經是上帝ê話，是基督徒ê信仰kap行為ê準繩。因為án-ni，咱mā tioh關心讀者ê了解kap感受。我擔任聖經公會ê翻譯顧問了後有戲劇性ê改變，chit款ê改變thang講是一種ê 「範疇轉移」(paradigmatic shift)，tùi 「特殊ê原讀者」做重點(original reader specific)轉移到「特殊ê現代讀者」(present reader specific)做重點。這mā是聖經翻譯所tú-tio̍h ê問題，因為翻譯是beh傳達上帝beh hō͘人ê信息；若無達成chit-ê目的，翻譯就無意義。Án-ni thang講，paradigmatic shift mā是一種ê反動。

現代聯合聖經公會大部分ê翻譯lóng是根據Dr. Eugene Nida ê 「功能對等」(functional equivalence) ê理論，無koh再使用傳統ê直譯，是注重意思ê傳達，無koh看「字對字ê對應」(formal correspondence)。Chit字單字á是chit-ê詞，無伊單獨ê意思；意思是tùi上下文ê前後關係(context)來決定，無hō͘原文ê字所束縛，目的是beh hō͘譯文ōe-tàng koh-khah完整，koh-khah自然將原文ê意思用家己ê話表達出來，hō͘現今ê讀者kap原文ê讀者lóng得tio̍h siâng款ê信息，mā有siâng款ê感受(closest natural equivalence)；這thang講是對特定ê讀者來翻譯ê，是已經踏入「what it means」ê界限。真明顯，chit款ê翻譯真注重讀者ê了解，譯文khah活，khah自然；m̄-kú有人看chit款翻譯做反動、異端，甚至公開開審判會。

Án-ni看起來，我ê工作真正kap異端無法度thang切斷關係。其實，異端不過是khiā tī另外一pêng，tùi無siâng款ê角度來看tāi-chì，來研究，來解說，來了解上帝通過聖經 beh傳達hō͘人ê信息。M̄-kú因為角度無siâng，詮釋出來ê信息無相siâng，結論可能是代表小數人ê觀點，kap傳統ê了解有所差別，是一種ê創新。所以，咱ōe-tàng結論講，kap傳統無相siâng無tú-tú是pháiⁿ tāi-chì，是有創見；有創見就有異端，有異端chiah會產生異象。

3, 我所受tio̍h ê幫贊
a. 遺憾：
我接受聯合聖經公會ê目的是beh做翻譯顧問，特別是beh幫贊我所認同ê原住民ê翻譯。M̄-kú，iáu未真正有機會開始chit-ê任務，我就hō͘ UBS調去做翻譯總顧問，主要是行政ê工作，協調亞太區15個翻譯顧問ê工作，負khah大ê責任。雖然我無辭掉顧問ê任務，結果mā是tio̍h將指導台灣ê原住民ê工作交hō͘別人負責，我只有參加翻譯者ê研習會，á是用phoe幫贊翻譯者解決問題。不過，我iáu會記得，mā非常欽仰咱內面幾nā位我khah有接觸ê朋友，有ê是孤軍奮鬥，堅持拚到路尾ê勇士，親像Amis ê顏武德牧師，太魯閣ê田信德牧師，Paiwan ê許松牧師，客話ê彭德修牧師kap曾昌發博士，等。做一個翻譯ê總顧問我至少有堅持每一個原住民ê翻譯lóng有得tio̍h夠額ê預算thang做翻譯。Chit項，我做有到。

b. Siōng Bōe-tàng bōe記得ê事件：
Tī 1980年代，一kóa出版社開始出版「研讀本聖經」(Study Bibles)。聯合聖經公會mā感覺有需要出版chit款ê聖經，不過m̄知beh怎樣開始；因為UBS傳統ê政策是所有ê聖經 bōe用得有註腳á是解說(「no note or comment」)，驚了tī教會中引起無必要ê紛爭。我就好膽招三位朋友陳南州、黃伯和kap 鄭仰恩三位博士kap我組成小組(以外葉約翰、張德麟、童春發博士，以及張明佑kap梁重光牧師mā bat參與討論。)小組決定先用現代中文ê 「路加福音」做試用本，用「Hō͘邊緣人ê福音」做冊名，讀者目標定高中程度，列出一kóa原則kap方法了後就著手寫稿。稿件經過討論koh修改了後有請幾nā個學生來試讀。結果，阮發現學生讀是無問題，總是掠bōe-tio̍h主題。小組就隨時決定重寫，每段ê開始lóng加一句「主題提示(thematic highlighting)」，thang激起讀者開始問信息對in現在有甚麼意義ê問題。

阮tàu陣做chit-ê project，hō͘我得tio̍h siōng大ê收成，學習tio̍h我tī讀冊ê時無學tio̍h ê一面，就是Princeton所講ê “piety”chit面。

我有將chit遍ê經驗寫做論文。我先介紹原則kap方法，續落去談論怎樣使用Gadamer ê詮釋理論(the fusion of the two horisons)做基礎，最後將結果詳細報告。Chit篇論文我tī 1984年熱天，tī每三年chiah有一遍，每遍有一月日久，為tio̍h全世界ê翻譯顧問ê研討會時發表。Hit chūn是UBS siōng盛ê時，全世界lóng總有七十個參加；ta̍k-ê人lóng tio̍h讀一篇論文。研討會beh soah ê兩日前有做一個民意調查，所問ê問題真籠統：「Chit遍ê研討會甚麼siōng好？」大部分ê人講「食kap tòa真好」；有ê講「會議ê所在真方便」；mā有ê講「weekend ê旅遊安排了真理想」；只有七個人講起論文ê tāi-chì，七個lóng講 “I-Jin Loh’s paper is the best”。後來UBS ê執行委員會有發表一張position paper，其中咱所提出ê觀點大部分有受採用。阮tī台灣所做ê對世界有貢獻，有引起共鳴！

c.Siōng Bōe bōe記得ê人
蔡仁理博士kap我tī工作上siōng密切，伊bat做過台灣聖經公會ê總幹事，亞太區ê執行委員會ê主席，kap總幹事。Tī伊在任ê中間，伊有支持我完成一kóa聖經公會一般bōe做ê項目，親像《新約希漢辭典》(葉約翰kap張德麟博士有參與)、《聖經簡明辭典》(高金田kap鄭仰恩博士有參與)、《新約聖經並排版》、《溪畔靜思》、《日讀聖經》(這是為tio̍h ta̍k日上班ê無閒人準備ê；每日有一小段聖經，簡單ê解說，有思考ê問題，kap短短ê祈禱)，等。翻譯TCV (Todays Chinese Version)時，tī反對聲中，伊mā強力支持kap推廣，tùi做辭典chiah-ê項目，阮有學習tio̍h chit類ê冊是bōe-tàng用翻譯ê方法，是tio̍h一字一字個別討論ê。

- TCV ê新約由許牧世教授翻譯，翻舊約ê時有周聯華、王成章兩位博士kap焦明女士加入。Chit-ê譯本非常重要，是頭一本由華人所翻譯ê，文筆真自然，表達清楚，真好了解，所以現在iáu teh翻譯e現代台語譯本以及其他原住民翻譯á是修譯ê藍本。我tùi chit-ê翻譯學tio̍h翻譯者需要謙卑、合作、包容，bōe堅持家己ê意見ê精神，因為華語運用ê空間真闊，翻譯khah有意見。

另外一項tāi-chì我bōe用得bōe記得，我去Princeton讀B.D. ê時(960)，周聯華博士已經tī hia teh做研究學者。伊已經是一位名人，m̄-kú真友善；伊多才多藝，總是m̄-bat顯耀家己ê學問。伊tùi hit chūn起，我所負責真chōe中文ê翻譯項目，伊每一項lóng有義務參加，伊是促進和睦ê精神人物。

現代台語譯本是現在iáu teh做ê翻譯，這是頭一遍聖經公會kap長老會合作ê翻譯。Chit-ê翻譯真特別，會用得講是「道成肉體」ê翻譯，讀起來，會聽tio̍h上帝真正成做台灣人，用純粹ê台灣話teh對咱講話，lóng無外國腔。我tùi每一位翻譯小組ê人學習tio̍h真chōe。

我siōng ài，mā siōng驚翁修恭牧師講：「這m̄是台灣話」，á是「台灣話m̄是án-ni講」：siōng 愛，因為tio̍h修改，修改了ê意思一定會khah正確；siōng驚，因為tio̍h koh了時間討論。楊啟壽院長特別關心ài保持原文所用ê意象(image) kap暗喻(metaphor)，因為án-ni譯文chiah會活koh súi，khah有力，mā khah好記。張宗隆牧師是真有才能ê主席，讀真chōe冊，是一本活ê百科全書。吳明雄牧師siōng gâu péng各種版本做參考；mā對現在ê少年人teh用ê台灣話有把握，因為Chit遍ê翻譯真ǹg望非基督徒mā讀有。張剛榮牧師特別注意羅馬字注音ê正確；顏信星牧師對詩kap古字ê寫法真有把握；薛伯讚牧師特別注意tī講台頂ê宣讀；康進順牧師對原文有真好ê了解；梁重光牧師對電腦ê運用kap翻譯ê一致性，等ê問題lóng有特別ê注意。最近chiah參加ê 陳南州博士對翻譯mā有特殊ê貢獻。伊有時代理主席開會真果斷，因為伊kap我合作ê時間khah長，有建立真好ê rapport，伊所beh問ê問題kap我想ê問題常常是siâng款，我若無問，伊lóng會問。Koh一項好ê tāi-chì，就是只有伊是頭一代ê基督徒，所以不止了解非基督徒ê用詞。咱也已經有一位會曉用電腦來處理稿件ê梁重光牧師。最後，咱mā已經有一位比我khah有能力ê舊約專家，mā會曉電腦排版ê梁望惠博士做咱ê翻譯顧問thang扶起lóng總ê責任。相信chit-ê真正用咱ê父母話ê聖經 koh無久就會出現。

一生對我有siōng大ê影響kap幫贊ê就是kap我saⁿ-kap做研讀本本ê「南州、伯和、仰恩」chit三個「同伴。阮lóng是用in ê歇睏日，日暝phah拚做工。阮tùi無摸起，討論kap辯論，修改koh修改，寫到滿意為止。阮特別有重視特殊ê讀者(audience specific)，特殊ê環境(context specific)，特殊ê信息(message specific)，等ê問題。Kap in tàu陣學習hō͘我體驗tio̍h神學，á是聖經ê詮釋，m̄是純理論，mā是藝術，tio̍h靠鍛鍊koh鍛鍊chiah會老練，chiah做會出來；m̄是抽象ê，是ōe-tàng實行ê；m̄是個人做ê，是群體共造ê；m̄是lóng正統ê，常常是反動ê，是異端ê。這lóng是我kap in做工ê時所學tio̍h ê。Kap chit陣朋友做陣交談，討論kap辯論非常精彩，無一場冷場，lóng有創見，hō͘我tùi ta̍k遍ê開會感覺有期待koh興奮，體驗tio̍h作神學ê歡喜kap快樂。。

我mā對我指導in寫博士論文ê三位老師學習tio̍h真chōe，這對in ê論文看會出。
曾昌發：《從亞洲詮釋學的角度研究路加福音中耶穌的比喻》；秦明盛（Kapi）： “An Attempt at Reading the Story on Martha and Mary with Juxtapositional Narrative Approach”；邱淑嬪：《從「微不足道」的身份認同再思馬太福音的宣教觀》。

Tùi論文ê題目，咱ōe-tàng看出chiah-ê lóng是ǹg另外一pêng teh行，真優秀ê論文，結論lóng是反傳統ê。不過咱m̄免驚，因為咱相信，有異端chiah有將來，chiah有異象。咱tio̍h繼續ǹg chit-ê方向行chiah有辦法thang做創新ê神學，來面對將來ê挑戰。

4, 最後ê感謝
最後，我beh koh一遍向玉神ê董事長、諸位董事、院長Pusin kap各位教授表達我siōng深ê感謝，因為lín今á日頒授chit-ê極大ê榮譽hō͘我。我mā ài tùi bat kap我tàu陣作神學，行chit條坎坷ê路ê同志朋友說謝，kap in分享chit-ê榮譽。

天香kap我lóng是多病ê人，我tui 1967年就開始因為糖尿病家己注射，後來開始一連串ê慢性病、心臟病、高血壓，koh來有Parkinsons，今年初koh有做攝護腺ê手術，也患tio̍h急性氣喘病。天香是對她退休ê前兩年就開始有問題，tùi 2,000年起完全入去她孤獨ê世界，失去她所有ê記憶力、表達力，後來mā患tio̍h糖尿病；最近koh因為尿道發炎kap一kóa併發症入院四禮拜久。

Tī chit中間有得tio̍h三峽教會李全秇牧師特別ê照顧kap關懷小組ê幫贊，阮tio̍h深深kā in 說謝。

Mā有真chōe海內外ê朋友個別teh替阮祈禱，á是來探阮；koh有台語翻譯小組ê同工ta̍k禮拜來探阮，替阮祈禱，我mā beh kā in講「多謝」。

阮mā特別beh tùi阮至親ê兄弟姊妹表示siōng深ê感謝，我患tio̍h chiah-ni̍h chōe koh嚴重ê病已經超過50年à，若m̄是有大姊ê照顧kap協調兄弟姊妹ê幫忙，我早就無tī chia a。我tī年初手術ê時，大姊mā親身留tī病院照顧我幾nā日。我現在因為Parkinsons行動lóng無方便，她做頭協調全家來幫贊我：二姊常常寄人the̍h營養品hō͘我；小弟維道甚至替我出國辦tāi-chì；小妹Sumih家己丈夫teh破病mā來幫贊我幾nā月日久；孫á輩有榮耀醫師專門teh送阮去急診，頌苑牧師不時都teh安排阮看醫生kap入院ê事，等。Beh chhē tio̍h chiah-ni̍h和好合作ê家庭實在無簡單，這lóng是大姊ê功勞。阮感謝上帝hō͘阮有chiah-ni̍h gâu領導kap照顧家庭ê大姊，mā ài感謝上帝hō͘她有好ê丈夫kap完滿ê家庭thang kā她協助。

最後，總是siōng重要ê，我beh對我「khah好ê一半(my better-half)」講：「Nino，真多謝！」chit句話只有她聽有。她mā是我作神學ê 「同伴」。阮兩個lóng已經77歲à，三月日前mā tú-á慶祝阮結婚滿50週年。她一生lóng用我kap家庭做中心，我因為有她chiah有氣力做我所做ê一切。阮beh送hō͘玉神ê冊真chōe是她所珍藏ê，她應該tio̍h分享一半khah加ê榮譽！

願一切ê榮耀lóng歸hō͘上帝！