《生活e5台語，台語e5生活》

 | | | 轉寄

《台灣另類牧師●醫師─謝緯》全書摘要

作者 陳金興 2011.05.08


本書獲國家圖書館選為
「2010年臺灣出版Top1推薦圖書」



謝緯
是牧師 mā是醫師

他身軀內底ê血
流著
對這塊土地ê熱情

他ê宗教情懷
散播出
對台灣人ê真愛


謝緯tī台灣完成小學kap中學教育，koh tī讀完神學院了後，二次大戰期間去日本讀醫學院。1946年轉來台灣，就tī故鄉南投鎮協助伊ê老父所開設ê「大同醫院」，同時也開始義務傳道。1949年受封立做長老教會ê牧師，1950年參加門諾會山地巡迴醫療團ê義診工作。1951年去美國進修三年，tī水牛城（Buffalo）總病院進修期間，伊決定回國了後，要 (beh) tī台灣為原住民創辦肺病療養院。

由美國進修轉來ê謝緯，伊ê醫療宣教 (Medical Mission ) 事業，遍及南投縣山地、台南縣及彰化縣沿海等偏遠地區。除了經營大同病院以外，伊每禮拜又koh各安排一工tī其他三個所在走闖：南投縣埔里鎮，包括基督教肺病療養院與埔里基督教病院；台南縣北門鄉，tī 烏腳病免費診所義務看診，替病人手術；彰化縣二林鎮，為二林基督教病院患者義務看診、開刀。 1969年受推選做台灣基督長老教會總會議長，處理真複雜êWCC (普世教會協會) 事件。謝緯對教會、社會kap醫療工作，盡心盡力，到死為止。

1970年6月17日下晡，伊家己開車tùi南投beh去二林為急診患者開刀，不幸途中tī名間鄉發生車禍身亡，彼時陣纔55歲。tī出發進前，謝緯ê夫人看伊中晝纔由埔里看診轉來，驚伊siuⁿ thiám，ài 謝緯加歇睏一下chiah koh去二林，伊煞講：「我若會當早一分鐘到病院，患者就會當減少一分鐘ê痛苦，甚至可加救一條性命。」

謝緯用極其堅強ê意志，堅持伊另類ê價值觀，tī偏遠地區為散赤koh需要幫助ê病患犧牲奮鬥，到死無變，可講「無想要行完 不起程」，是本土醫療宣教鬥士。雖然工作量真多，伊無半句怨言，謝緯一生服事ê理念，就是「甘願做戇人」。爲著教會ê傳福音事工，伊進入社會，透過實際kap病人接觸ê醫療行為，應答伊對tī宣教ê呼召（calling），可講是台灣醫療宣教ê典範。

因為謝緯ê人道精神kap對台灣醫療ê付出以及無私ê奉獻，hō͘人尊稱做「台灣史懷哲」。1992年受追贈第二屆「醫療奉獻獎」。