《生活e5台語，台語e5生活》

 | | | 轉寄

享受復活得勝ê人生

作者 許隼夫 2011.04.03

對古早到現代，世間人攏驚死。所以chiah有真濟追求「長生不老藥」神話流傳落來。雖然亦有人死了koh再活起來ê 事，但是一般人攏看做是一件奇事nā-tiāⁿ。所以，真濟人m̄信耶穌復活，因為in lia̍h-chò這是迷信，是無科學ê mi̍h件。

總是，換一ê角度來看，生kap死並m̄是人會喘氣，ah是未喘氣ê代誌。有ê 人活著無有意義，生活親像「行屍走肉」，若像死了一般樣。

聖經有記載耶穌基督受釘佇十字架頂死了，第三日對死人中復活是一個千真萬確ê代誌。伊留落一ê空墓kap包布，伊ki-n-pi顯現h信徒與門徒看koh kap in講話。

Koh-khah要緊ê昰這ê好消息已經變成基督教信仰最重要ê福音。全世界因為信耶穌做救主來改變了in ê人生與生活。使徒保羅用家己ê信心來做見證。伊án-ne寫講：「基督若未bat復活，就阮所傳ê是空空，恁ê信也是空空…基督若未bat 復活，就恁ê信無chhai-kang，恁iáu-kú佇恁ê 罪中。」(林前15:14,17)

講真ê，耶穌基督有復活，伊實實在在有復活！咱thang對當時ê 門徒kap眾信徒親目看見耶穌復活ê身體，kap伊講話，也做夥食飯。In對悲傷失望ê 心情突然轉變做興奮，喜樂，出力去傳復活ê 福音，就明白這復活會改變人ê 能力有ja-n-a大。

　　這款改變ê 力量親像1815年住佇倫敦ê 人民。有一日旗號乒爬到溫徹斯特主教堂(Winchester Cathedral)ê 厝頂，接收停佇遠遠海港ê戰艦ê 旗號乒打來ê 手旗信號。當伊一字一字收著「W-I-L-L-I-N-G-T-O-N--D-E-F-E-A-T-E-D…」(威靈頓受擊敗) ê時陣，大霧包圍遮khm歸ê 倫敦城，旗號乒看為tih旗仔ê信號，手旗傳信被迫停止。歸日久，倫敦人民聽著這ê「威靈頓將軍受擊敗」ê消息心裡攏真大失望koh傷心。直到第二日早起koh繼續傳信號，加傳五字E-N-E-M-Y。變成「W-I-L-L-I-N-G-T-O-N—D-E-F-E-A-T-E-D—E-N-E-M-Y！(威靈頓擊敗敵人了！) 這時，倫敦氣氛大改變，全城ê人民大聲歡呼「咱勝利了！英國ti贏了！」。In ê 憂傷隨時變做歡喜。這t-t是主耶穌對死復活帶h信徒喜樂ê 心情。親像兩千年前耶路撒冷ê 信徒大聲歡歡呼：「哈利路亞，主已經復活了！伊實實在在有復活了！」仝款。

基督復活ê 好消息，是上帝通過這ê 奇妙ê 事件賞賜能力hō͘世間人。Hō͘凡nā信伊ê 人也會得著這ê 復活ê 生命kap 大能力(林前6:14) 。咱也因為這ê 信心來得tih生活ê 大能力。這ê大能力會當贏過一切消極、失望、絕望、憂傷、痛苦、驚惶、恐怖、懷疑、不安ê 心理，甚至黑暗、邪惡、不義ê 權勢。H信伊ê 人ê人生態度180度大改變，變成一ê 充滿積極、向上、希望、忍耐、安慰、平安、喜樂ê 人。

所以，復活ê 道理不但是「人因信得永生」，也佇今生會得著這ê 復活ê 能力kap過tih得勝ê 生活。基督教徒相信人死後會上天國享受永遠ê 生命，這個永遠ê 生命並m̄是愛等到死了後chiah享受--ê 。是信主以後隨時就會當享受ê 新生命kap新生活。Tú-tú親像聖經所講：「死亡被消滅了；勝利已經達成了！」(林前15:54現代)

我來相信耶穌就是受這ê 改變現世ê 生命kap生活ê 福音所吸引ê 。孔子公講過：「非知生焉知死」；保羅講過：「所以人若tiàm佇基督，就是做新創造ê人 ，舊ê 代誌已經過去，一切攏變成新ê 了。」(林後5:17)　雅各也講過：「信心kap行為愛相輔並行，信心是藉著行為來達到完全ê …有信心無行為是死ê 」(雅各2:22,26)。我欣賞基督教是一ê 現世ê koh是實際ê 信仰。我一生享受這ê 復活福音ê能力，也認真分享傳播這個大能力ê福音。下面是我個人ê 幾ê有關復活ê 生活經驗kap見證：

我讀神學ê 時陣，有一段時間因為看tih周圍ê 基督徒自私、自利、不公、不義ê 行為非常失望。又想tih我背祖背宗，無顧全家族ê 強力反對來信耶穌，結果看tio̍h基督徒也是無比佛教徒khah好jōa-chē 。一時陣想beh退學，又m̄敢tńg去見父母kap親人。心內非常失望痛苦。好佳在，有得tio̍h黃彰輝牧師ê 開導，伊指出耶穌也是活佇一ê真艱難koh真惡劣ê 社會環境中，伊本身有贏過hia ê 艱難。耶穌做咱上好的模範，伊復活ê 福音會改變信伊ê 人，也會改變了全世界。咱受神學教育就是beh培養傳播這個改變人ê福音。黃牧師幫助我明白了這個改變ê 福音，我有得tioh安慰kap 鼓勵。我改變我ê想法與態度，留落來繼續求學。

阮結婚選在鬼仔月（農曆七月），這是台灣人ê 大禁忌，無人佇這月日中結婚。總是阮已經信復活ê主，阮無koh再相信mā無teh驚這款迷信ê事。阮受厝邊頭尾議論紛紛，批評kap指責。阮去說明h阮ê父母聽，hō in理解。Kā in講：聖經有記載，上帝創造ê 日子，每一日攏是好日子。七月結婚「sio̍k koh 有kio̍k」逐項攏真便宜，koh 再破除迷信。阮結婚已經teh beh 45冬，逐日經驗著家庭婚姻的美滿kap上帝的賜福滿滿。

當阮牧師娘懷孕待產ê時，也tú好遇著阮愛搬厝，koh阮租ê 厝是一間「粪箕厝」。一般人有khan-sng（迷信）相信住這款厝ê人會liu錢，親像粪箕poa̍h-poa̍h出去，無人愛住。阮搬入去就開始佈置，隔壁ê 老阿婆過來k我講，太太懷孕時釘鐵釘仔不吉利，會釘著胎兒ê 身體，可能造成殘障。嬰兒誕生了後，阮對病院抱tńg來ê 時，隔壁阿婆第一ê 來看。伊真tio̍h驚也真歡喜講：「好心好幸leh，許先生，嬰兒佳在無an-cho̍aⁿ-iūⁿ 」。我kā伊回答講：「O-bà-sáng，阮信耶穌，無迷信，mā無khiàn-sńg。多謝您ê關心。」這ê 事件不但改變阮ê人生觀念kap 做代誌ê 方法，也變做阮分享福音真有力ê 故事。 咱相信復活ê信心就是相信耶穌贏過一切黑暗、邪惡ê 魔力。 伊也賞賜你kap我有這款復活得勝的能力去活出新ê 生命kap新ê 希望！這是咱信心最大ê 保証。相信復活ê信心h咱重新得tio̍h能力，也h咱改變：黑暗變成光明；失望變成希望；怨恨變成仁慈；阮弱變成剛強；憂傷變成歡喜；懷疑變成信心；受苦變成忍耐；怨嘆變成感恩；邪惡變成良善；不義變成公義….咱若活佇復活得勝ê能力中，咱ê一生自然就會充滿信心、積極、向上、向善、向美…也充滿喜樂與平安。　　　　　　　

我真愛Gloria kap William Gaither 這對夫婦做夥寫的詩kap 曲「因為主活」(Because He Lives)。是享受復活ê能力真好ê描寫：

上帝差祂ê聖子，祂ê名叫耶穌；
祂來疼咱，赦免kap醫治病痛；
祂放捨生命，為beh贖我罪過，
一ê空的墳墓證明我ê救主活teh。
因為主活teh，我thang勇敢面對明日，因為主活teh，一切驚惶攏消失，
因為我知影，祂te̍h掌管將來，
生命滿有意義光彩，就是因為主活teh。