《各各他e5目屎--苦難得安慰》

 | | | 轉寄

講道kap回應

作者 紀福讚 2006.03.05

今á日台灣人教會ê講壇有幾種類型：

一、新聞評論型

巴特（Karl Barth)講現代ê基督徒tio̍h一手提新聞，一手提聖經。史脫特（John R. W. Stott)也強調講壇是做橋樑，起造tī上帝ê話語kap人ê需要頂面。舊約ê先知信息也kap時代ê走向、社會ê困境有密切關聯。講壇信息反映時代ê欠缺，人心靈ê iau餓，做社會烏暗中ê光燈，hō͘羊群對生存ê時空事件做有信仰ê判斷，對社會ê公義、憐憫會tàng存謙卑，kap上帝同行，鼓舞會友化意念成行動。這是thang肯定ê一面，但是講道者，用tī上帝話語ê研究、探討ê時間，比用tī看新聞、報紙、雜誌、參與社會運動ê時間比率是過頭少。致到聖經ê引用是片段，目的kan-taⁿ beh證實家己ê新聞判斷kap言論，m̄是提供會友tī現實事件中做信仰ê反省kap上帝話語ê應用。所以新聞評論型ê心態，是假設教會抑講壇是時代ê先知，是攻擊、批判ê姿態。講--ê人自認為是先知，甚至是上帝ê化身，講到面紅目屎滴，聽ê人也聽到真爽快，但對tī信仰ê長進無得tio̍h幫助。因為若無對聖經幫助信徒尋tio̍h解決ê答案、方式，會變做一種精神苦悶ê發洩，bē tàng chhōa信徒tī「道成肉身」ê行動中體驗上帝ê同在。危險性是將「新聞本身」當做「道」teh傳。

二、無食人間煙火型

這是一種純粹屬靈ê教導。Tī舊約ê先知信息也真強調上帝過去ê行動、作為，講起列祖kap上帝契約做信仰反省ê依據。親像西乃山約ê強調，大衛王朝應許ê提醒。Tī新約，司提反、彼得ê講道也lóng追溯到亞伯拉罕ê立約，所以用聖經ê內容做說明、例證、推理，是講道信息ê根基，但也必須kap今á日切身ê生活有關係。聖經中ê講道也ê確會提起當代教會、社會ê問題，這是信仰切身ê問題，beh án-chóaⁿ實踐tī今á日ê實際遭遇中，這種講道類型是將上帝關tī教會，將聖經ê信息限制tī教會ê生活、體制中，有時kan-taⁿ teh講「爽」ê，是這種聖經知識ê推理、證明，滿足對聖經ê知識ê會友，伊ê危險就是會成做法利賽式ê教導，信仰ê知識kap生活二元化，聽道kap遵趁會愈分愈離。

三、道德勸善型

講道變做勸善。聖經有真濟鼓勵去實踐ê生活倫理，親像做光做鹽tī地面上；親像tio̍h疼厝邊親像家己；親像疼至微細ê一個；chiah-ê lóng屬tī勸善。但基督教ê勸善比起佛教ê生活實踐實在是一點á距離，用台灣今á日ê「慈濟功德會」、「一貫道ê散財教義」lóng會tàng表明教會ê勸善功能m̄是功效真大。這種ê勸善ê危險就是bē記「福音」ê本質，講道變做律法ê說明、提醒。Bē記tī chiah-ê倫理ê宣佈前提是：「我是世界ê光」、「tio̍h疼上帝」、「親像做tī我ê身上」，這是基督教倫理實踐ê動力kap根據，但勸善ê講道往往看bē tio̍h「福音súi」ê所在；kan-taⁿ講解律法，將真重ê擔放tī會友ê身上，hō͘會友驚到m̄敢擔，á是擔到真艱苦。

四、消災解厄型

強調聖靈醫病趕鬼ê氣力，推銷神蹟kap信心；講解家庭婚姻ê幸福；beh如何成做一個成功ê人；信仰煉金術等等。強調「功利」，減少「責任」；強調「恩典」，取消「十字架」；講「祝福」，m̄講「受苦」；「幸福、成功、功利」才是主要beh接受ê內容。以「利我」做中心，會「siàⁿ」就好，真理、公義、仁愛chiah-ê群體ê倫理無tú-tú必要。伊ê危險性就是認同「強勢」，放棄「弱勢」ê群體，kap耶穌福音ê本質，保羅所強調ê教會本質tú-tú倒péng。

五、政令宣導型

這是注重教會增長ê講壇型態，是教會推動事工ê說明會，是教會組織ê教課，是親像產品推銷ê廣告。這種講道真實際，「教會ê增長、利益」做中心，但無tú-tú是「上帝國ê增長」，宣教ê強調比宣道ê責任khah要緊。教會ê內聚力會真加強，但對社會ê責任無tú-tú是要緊，這二項是m̄是有衝突，若有，「教會」第一，福音、真理. . . . . . ，甚至「上帝」也tio̍h讓步。這種ê講道，若是闊度khah闊，m̄是強調對教會ê忠誠，乃是對上帝ê忠誠，會當hō͘人tī信kap行，聽道kap實踐有真好ê配合。但危險性是「宣道」kap「宣教」ê混淆，以為疼教會，就是疼上帝，tī無意中忽略真理、公義、憐憫ê實踐。

六、上帝國ê宣揚，是耶穌ê講道

Tī「宣道」中耶穌koh再臨在ti7e5歷史，回應ê各種iau餓ê需要。宣道ê內容是耶穌tī拿撒勒ê會堂所明確表示--ê:「主ê靈tī我ê身上，因為伊用油膏我，叫我傳福音hō͘散赤人，差遣我報告被掠ê釋放，青瞑--ê得tio̍h看見，hō͘受壓制--ê得tio̍h自由，報告上帝悅納人ê禧年」（路四18－19），che是耶穌ê宣道內容，也是伊講道ê內容，是上帝國近了，人會當回應ê好消息。伊無將律法ê重擔放tī人ê身上，親像文士、法利賽人，伊m̄是teh勸善；伊也m̄是認同「強勢」ê人，做錦上添花，將信仰做一個裝thāⁿ teh宣揚，伊有時代性ê評論，但m̄是主要宣道ê內容，伊ê中心是禧年ê報揚，m̄是kan-taⁿ批判，khah重要ê是應許ê傳達（這也是先知講道ê重點）；伊有要求門徒聽道ê人，「tio̍h照án-ni去行」，去疼厝邊親像家己，m̄-koh m̄是去建立家己ê勢力範圍，m̄是宣教，是宣道；m̄是建立一個組織，伊做上帝kap眾人ê奴僕；耶穌ê講道淺白，所以伊講：「有耳孔thang聽ê人，tio̍h聽」，聽m̄是kan-taⁿ聽tio̍h聲音、道理而已，tio̍h包含遵趁，所以伊講：「今á日，這個禧年ê應許，beh應驗tī lín ê耳孔」，tī聽tio̍h ê時，就得tio̍h祝福ê應許，就產生力量、改變、選擇kap遵趁。耶穌講：「Lín ê目睭是有福氣--ê，因為看見了；lín ê耳孔也是有福氣--ê，因為聽見了。」