《各各他e5目屎--苦難得安慰》

 | | | 轉寄

總無阮也青瞑mah？

作者 紀福讚 2006.02.26

民主政治ê精神是尊重多數ê決定，但絕對m̄是犧牲弱勢ê生存權，來增加多數ê權益，反倒轉，是ài顧慮多數ê權益，mā保障少數ê生存。事實上，今á日tī台灣，對弱勢、殘障ê福利保障，是非常非常ê少，對tī殘障工作權ê保障koh khah少。親像早前台灣bat規劃彩券（愛國獎券）ê販賣是殘障者ê工作權保障範圍，這是真súi ê政策。Tī買彩券ê人心理，也是一種行善ê激發，m̄是出tī「貪」ê動機，是出tī「疼」ê關懷。

1993年，58歲ê倫敦業餘發明家貝立斯tī電視頂看tio̍h非洲防治愛滋病困難ê原因之一，是in散赤到無錢thang買收音機ê電池，致到bē tàng收聽tio̍h預防愛滋病ê chai-bat，貝立斯想tio̍h古早手搖式留聲機ê原理，衝入去工作室，試驗手搖式ê發電機來取代電池。伊tùi英國申請tio̍h一筆幫助發展中國家ê資金21萬美金，開始tī南非開普敦設廠生產手搖式ê發電機，幫助非洲愛滋病ê防治kap第三世界散赤地區ê資訊。這個工廠有150外名殘障ê員工，用青瞑人做音質ê品管，是所有員工ê 90﹪。In所出產--ê，m̄ kan-taⁿ是商品，乃是「人道」。

今á日台灣政府提倡「根留台灣」ê企業投資，規定台商bē tàng kan-taⁿ看tio̍h目前ê經濟利益，忽略台灣整體ê安全kap長期性ê利益。這也是出tī「商業道德」ê考慮，生意人bē tàng顧賺錢，無顧國家ê利益，這是一款人道、道德ê訴求。Kāng款，國家teh立法ê時，m̄是kan-taⁿ看tio̍h多數人ê權益nā-tiāⁿ，mā ài注意tio̍h道德上ê顧慮，特別是弱勢群體ê生存權。

今年聯合國譴責中國人權案受阻止ê原因，就是有一寡歐洲聯盟ê強國，為tio̍h經濟利益ê緣故，投反對票。這是一款kan-taⁿ注重經濟權益、忽略道德（人道）ê實例。卻有丹麥、荷蘭等國家m̄驚中國政權ê報復，提案譴責。莫怪美國ê代表講，「譴責案無通過，最大ê損失是中國13億ê人民本身。」Chiah-ê支持中國政權ê國家，有得tio̍h經濟利益，soah失去道德ê良知。這款ê是非判斷，是真明顯--ê，卻是「經濟、政治利益」hō͘人青瞑。

耶穌講：「我因為審判臨到這世間，hō͘ bē看見ê人看見，也hō͘看見ê人變做青瞑。」hiah-ê kap伊saⁿ-kap tī teh ê法利賽人聽見chiah-ê，就kā伊講：「總無阮亦睛瞑mah？」