《綠色短評》

 | | | 轉寄

中國kám ē拍台灣？

作者 李南衡, ChoânTâijī/全台字 by Chng Hūiphêng 2022.11.27

Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》　　 Lí Lâmhêng

　　　　　　　　　　　 Tiongkok kám ē phah Tâioân?

　　 Cha̍pgoe̍h cha̍pla̍k chì jījī ê Τiongkiōng Jīcha̍ptōa, Τiongkiōng chóngsukì 習近平 koh chi̍t piàn kiôngtiāu kóng,"chó͘kok oânchoân thóngit ittēng tio̍h si̍thiān", jîchhiáⁿ" choa̍ttùi bô sênglo̍k hòngkhì súiōng búle̍k". Suijiân chhùi ngē kóng beh phah Tâioân, tānsī ē phah bē phah tio̍h khòaⁿ khehkoan ê tiâukiāⁿ. 《 Ji̍tpún Sánkengsinbûn 》 Tâioân ki tiàm tn̂g Yaita akio san（矢板明夫） kóng, kúi nî chêng i hóngbūn kòe Τiongkiōng kunhong koân chàn, hit ūi koaⁿoân kóng Τiongkiōng chhut peng phah Tâioân ū saⁿê tiâukiāⁿ, tēit, kunla̍t siōng Tiongkok tùi Tâioân ū phah sísí ê chhakū, ētàng tī té sîkan lāi kā Tâioân phah·lo̍hlâi; tējī, í Bíkok choh thâu ê tīniâⁿ bô kàiji̍p Τâihái koanhē, chhiūⁿkóng Bíkok chhuthiān chi̍tê chhin Tiong ê chóngthóng, á·sī chhuthiān lāiloān, á·sī hông kńg ji̍pkhì Tiongtang, Auchiu ê chiàncheng; tēsaⁿ, Tâioân chhuthiān giâmtiōng ê lāiloān, chi̍tê lūisū "bô chènghú" ê chōngthāi. Jîchhiáⁿ Τiongkiōng phòaⁿtoàn ittēng phah ē iâⁿ chiah ē tāngchhiú. Lēnggōa chi̍tê piàn sò͘ sī, nāsī 習近平 thâukhak bô chhengchhéⁿ.

　　 Tiongkok tangsî ē phah Tâioân? Bíkok Tiongiong Chêngpòkio̍k hù kio̍ktiúⁿ David Cohen kóng, 習近平 íkeng hālēng kiōngkun tī 2027 nî chìnchêng kūpī búthóng Tâioân ê lêngle̍k. Só͘í i jīnûi 2027 nî chìnchêng Tiongkok ē phah Tâioân. 《 Bíkok Chi Im 》 pòtō, cha̍pgoe̍h cha̍ppeh, Bíkok Kiōnghôtóng Chiònggīoân Kalúka（Meke Gallagher） piáusī, 習近平 thiánkhui tēsaⁿ jīm kî liáuāu, ē tī Tâioân būntê téngbīn piàn choh kohkhah khìsè pek jîn, 2024 nî Tâioân tōasoán āu khólêng sī "siōng gûihiám".

　　 Cha̍pgoe̍h jīla̍k, hoatbêng "Kújī kiōngsek", Tiongkok Kokbîntóng ê kokanhōe chêng pìsutiúⁿ 蘇起 kóng kàu Tâioân tī Bí Tiong koanhē tiong ê kaksek, i khausé Chhòa Engbûn chóngthóng sī chi̍tê chiâⁿ hó ê kîchhiú, kā Tâioân chhau choh piànsêng "saⁿ tiuⁿ imiông bīn", paukoat nn̄g hōaⁿ koanhē, bînchú chūiû kah chiàntàu ìchì, tī Chhòa chóngthóng chhau choh chi hā, Bíkok kanta khòaⁿtio̍h iông ê chi̍t bīn, gō͘ phòaⁿ Tâioân tī nn̄ghōaⁿ sī îchhî hiānchōng, tī bînchú sī Pe̍hshekongchú, tī chiàntàu ìchì siōng sī ióngkám·ê, tānsī sūsi̍t siōng Tâioân lāipō͘ khiok tútú sī tòpéng. Kā Tâioân tòa kàu chiànlio̍k ê "choa̍tkéng". 蘇起īgiân, Τiongkiōng Jīcha̍ptōa liáuāu, 習近平 tēsaⁿ jīm ê 5 nî lāi, le̍ksú ê símphòaⁿ khólêng chin kín to̍h ē kàu ah. Choân sèkài ê lâng lóng chaiiáⁿ Tiongkok 習近平 ittēng beh phah Tâioân, kanta蘇起kā Tiongkok phah Tâioân kóng choh sī le̍ksú tùi Chhòa Engbûn chóngthóng ê símphòaⁿ, si̍tchāi chin khóò͘ⁿ!

Kiⁿî "siangsi̍pcheh", Chhòa Engbûn chóngthóng tìsû ê sî kóng, Tâioân goānì ūi khue̍k ê hôpêng hoattián kònghiàn itkí chi la̍t. Tī nn̄g hōaⁿ koanhē ê li̍ptiûⁿ siōng, lán ê siānì bô piàn, sênglo̍k bô piàn, îchhî hiānchōng to̍h sī lán ê chútiuⁿ, lán ē choânle̍k chó͘chí hiānchōng hông phiànbīn káipiàn. I kiôngtiāu, káikoat nn̄g hōaⁿ bē ha̍h ê ìkiàn, ittēng tio̍h thàukòe pêngténg ê tùiōe. Lán bē khì chò mō͘hiám ê tāichì, tānsī choa̍ttùi m̄thang siūⁿ kóng Tâioân jînbîn ē tī aple̍k ēbīn khutho̍k. Lán ē kèsio̍k chhiongsi̍t kokhông, tiánhiān chūngó͘ hôngūi ê koatsim, khakpó bô lâng ētàng pek lán kiâⁿ hiòng Tiongkok só͘ siattēng ê lō͘kèng. Inūi Tiongkok só͘ siattēng ê lō͘kèng lāibīn, bē ū Tâioân bînchú chūiû ê sengoa̍h hongsek, koh khah bē ū nn̄g chheng saⁿpah bān lâng ê chúkoân.

　　 Tiongkok kám ē phah Tâioân? Tangsî ē phah? M̄ sī lán Tâioân lâng ētàng koattēng·ê. (221111)

Chù, 習近平 　蘇起　 liām Hôagí


Pe̍h-ōe-jī-pán/白話字版

《 Le̍k-sek toán-phêng 》　　 Lí Lâm-hêng

　　　　　　　　　　　 Tiong-kok kám ē phah Tâi-oân?

　　 Cha̍p-goe̍h cha̍p-la̍k chì jī-jī ê Τiong-kiōng Jī-cha̍p-tōa, Τiong-kiōng chóng-su-kì 習近平 koh chi̍t piàn kiông-tiāu kóng,"chó͘-kok oân-choân thóng-it it-tēng tio̍h si̍t-hiān", jî-chhiáⁿ" choa̍t-tùi bô sêng-lo̍k hòng-khì sú-iōng bú-le̍k". Sui-jiân chhùi ngē kóng beh phah Tâi-oân, tān-sī ē phah bē phah tio̍h khòaⁿ kheh-koan ê tiâu-kiāⁿ. 《 Ji̍t-pún Sán-keng-sin-bûn 》 Tâi-oân ki tiàm tn̂g Ya-ita aki-o san（矢板明夫） kóng, kúi nî chêng i hóng-būn kòe Τiong-kiōng kun-hong koân chàn, hit ūi koaⁿ-oân kóng Τiong-kiōng chhut peng phah Tâi-oân ū saⁿ-ê tiâu-kiāⁿ, tē-it, kun-la̍t siōng Tiong-kok tùi Tâi-oân ū phah sí-sí ê chha-kū, ē-tàng tī té sî-kan lāi kā Tâi-oân phah-·lo̍h-lâi; tē-jī, í Bí-kok choh thâu ê tīn-iâⁿ bô kài-ji̍p Τâi-hái koan-hē, chhiūⁿ-kóng Bí-kok chhut-hiān chi̍t-ê chhin Tiong ê chóng-thóng, á-·sī chhut-hiān lāi-loān, á-·sī hông kńg ji̍p-khì Tiong-tang, Au-chiu ê chiàn-cheng; tē-saⁿ, Tâi-oân chhut-hiān giâm-tiōng ê lāi-loān, chi̍t-ê lūi-sū "bô chèng-hú" ê chōng-thāi. Jî-chhiáⁿ Τiong-kiōng phòaⁿ-toàn it-tēng phah ē iâⁿ chiah ē tāng-chhiú. Lēng-gōa chi̍t-ê piàn sò͘ sī, nā-sī 習近平 thâu-khak bô chheng-chhéⁿ.

　　 Tiong-kok tang-sî ē phah Tâi-oân? Bí-kok Tiong-iong Chêng-pò-kio̍k hù kio̍k-tiúⁿ David Cohen kóng, 習近平 í-keng hā-lēng kiōng-kun tī 2027 nî chìn-chêng kū-pī bú-thóng Tâi-oân ê lêng-le̍k. Só͘-í i jīn-ûi 2027 nî chìn-chêng Tiong-kok ē phah Tâi-oân. 《 Bí-kok Chi Im 》 pò-tō, cha̍p-goe̍h cha̍p-peh, Bí-kok Kiōng-hô-tóng Chiòng-gī-oân Ka-lú-ka（Meke Gallagher） piáu-sī, 習近平 thián-khui tē-saⁿ jīm kî liáu-āu, ē tī Tâi-oân būn-tê téng-bīn piàn choh koh-khah khì-sè pek jîn, 2024 nî Tâi-oân tōa-soán āu khó-lêng sī "siōng gûi-hiám".

　　 Cha̍p-goe̍h jī-la̍k, hoat-bêng "Kú-jī kiōng-sek", Tiong-kok Kok-bîn-tóng ê kok-an-hōe chêng pì-su-tiúⁿ 蘇起 kóng kàu Tâi-oân tī Bí Tiong koan-hē tiong ê kak-sek, i khau-sé Chhòa Eng-bûn chóng-thóng sī chi̍t-ê chiâⁿ hó ê kî-chhiú, kā Tâi-oân chhau choh piàn-sêng "saⁿ tiuⁿ im-iông bīn", pau-koat nn̄g hōaⁿ koan-hē, bîn-chú chū-iû kah chiàn-tàu ì-chì, tī Chhòa chóng-thóng chhau choh chi hā, Bí-kok kan-ta khòaⁿ-tio̍h iông ê chi̍t bīn, gō͘ phòaⁿ Tâi-oân tī nn̄g-hōaⁿ sī î-chhî hiān-chōng, tī bîn-chú sī Pe̍h-she-kong-chú, tī chiàn-tàu ì-chì siōng sī ióng-kám-·ê, tān-sī sū-si̍t siōng Tâi-oân lāi-pō͘ khiok tú-tú sī tò-péng. Kā Tâi-oân tòa kàu chiàn-lio̍k ê "choa̍t-kéng". 蘇起ī-giân, Τiong-kiōng Jī-cha̍p-tōa liáu-āu, 習近平 tē-saⁿ jīm ê 5 nî lāi, le̍k-sú ê sím-phòaⁿ khó-lêng chin kín to̍h ē kàu ah. Choân sè-kài ê lâng lóng chai-iáⁿ Tiong-kok 習近平 it-tēng beh phah Tâi-oân, kan-ta蘇起kā Tiong-kok phah Tâi-oân kóng choh sī le̍k-sú tùi Chhòa Eng-bûn chóng-thóng ê sím-phòaⁿ, si̍t-chāi chin khó-ò͘ⁿ!

Kin-nî "siang-si̍p-cheh", Chhòa Eng-bûn chóng-thóng tì-sû ê sî kóng, Tâi-oân goān-ì ūi khu-e̍k ê hô-pêng hoat-tián kòng-hiàn it-kí chi la̍t. Tī nn̄g hōaⁿ koan-hē ê li̍p-tiûⁿ siōng, lán ê siān-ì bô piàn, sêng-lo̍k bô piàn, î-chhî hiān-chōng to̍h sī lán ê chú-tiuⁿ, lán ē choân-le̍k chó͘-chí hiān-chōng hông phiàn-bīn kái-piàn. I kiông-tiāu, kái-koat nn̄g hōaⁿ bē ha̍h ê ì-kiàn, it-tēng tio̍h thàu-kòe pêng-téng ê tùi-ōe. Lán bē khì chò mō͘-hiám ê tāi-chì, tān-sī choa̍t-tùi m̄-thang siūⁿ kóng Tâi-oân jîn-bîn ē tī ap-le̍k ē-bīn khut-ho̍k. Lán ē kè-sio̍k chhiong-si̍t kok-hông, tián-hiān chū-ngó͘ hông-ūi ê koat-sim, khak-pó bô lâng ē-tàng pek lán kiâⁿ hiòng Tiong-kok só͘ siat-tēng ê lō͘-kèng. In-ūi Tiong-kok só͘ siat-tēng ê lō͘-kèng lāi-bīn, bē ū Tâi-oân bîn-chú chū-iû ê seng-oa̍h hong-sek, koh khah bē ū nn̄g chheng saⁿ-pah bān lâng ê chú-koân.

　　 Tiong-kok kám ē phah Tâi-oân? Tang-sî ē phah? M̄ sī lán Tâi-oân lâng ē-tàng koat-tēng-·ê. (221111)

Chù, 習近平 　蘇起　liām Hôa-gí



　　十月十六至二二ê中共二十大，中共總書記習近平koh一遍強調講，「祖國完全統一一定tio̍h實現」，而且「絕對無承諾放棄使用武力」。雖然嘴硬講beh拍台灣，但是ē拍bē拍tio̍h看客觀ê條件。《日本產經新聞》台灣支店長Ya-ita aki-o san（矢板明夫）講，幾年前伊訪問過中共軍方高層，hit位官員講中共出兵拍台灣有三個條件：第一，軍力上中國對台灣有拍死死ê差距，ē-tàng tī短時間內kā台灣拍落來；第二，以美國作頭ê陣營無介入台海關係，像講美國出現一個親中ê總統，抑是出現內亂，抑是hông捲入去中東、歐洲ê戰爭；第三，台灣出現嚴重ê內亂，一個類似「無政府」ê狀態。而且中共判斷一定拍ē贏才ē動手。另外一個變數是，若是習近平頭殼無清醒。

　　中國tang時ē拍台灣？美國中央情報局副局長可亨（David Cohen）講，習近平已經下令共軍tī 2027年進前具備武統台灣ê能力。所以伊認為2027年進前中國ē拍台灣。《美國之音》報導，十月十八，美國共和黨眾議員Ka-lú-ka（Mike Gallagher）表示，習近平展開第三任期了後，ētī台灣問題頂面變作koh-khah氣勢逼人，2024年台灣大選後可能是「上危險」。

　　十月二六，發明「九二共識」、中國國民黨ê國安會前秘書長蘇起講到台灣tī美中關係中ê角色，伊khau洗蔡英文總統是一個chiâⁿ好ê棋手，kā台灣操作變成「三張陰陽面」，包括兩岸關係、民主自由kah戰鬥意志，tī蔡總統操作之下，美國kan-ta看tio̍h陽ê一面，誤判台灣tī兩岸是維持現狀，tī民主是白雪公主，tī戰鬥意志上是勇敢ê，但是事實上台灣內部卻抵抵是倒péng。Kā台灣帶到戰略ê「絕境」。蘇起預言，中共二十大了後、習近平第三任ê 5年內，歷史ê審判可能真緊tio̍hē到ah。全世界ê人lóng知影中國習近平一定beh拍台灣，kan-ta蘇起kā中國拍台灣講作是歷史對蔡英文總統ê審判，實在真可惡！

今年「雙十節」，蔡英文總統致詞ê時講：台灣願意為區域ê和平發展貢獻一己之力。tī兩岸關係ê立場上，咱ê善意無變、承諾無變，維持現狀tio̍h是咱ê主張，咱ē全力阻止現狀hông片面改變。伊強調，解決兩岸bē ha̍hê意見，一定tio̍h透過平等ê對話。咱bē去做冒險ê代誌，但是絕對m̄-thang想講台灣人民ētī壓力下面屈服。咱ē繼續充實國防，展現自我防衛ê決心，確保無人ē-tàng逼咱行向中國所設定ê路徑。因為中國所設定ê路徑內面，bē有台灣民主自由ê生活方式，koh khah bē有兩千三百萬人ê主權。

　　中國kám ē拍台灣？Tang時ē拍？M̄是咱台灣人ē-tàng決定ê。 (221111)

註：習近平　　蘇起　　唸華語