《綠色短評》

 | | | 轉寄

台灣、中國，亙不隸屬，馬英九講是違憲！

作者 李南衡, ChoânTâijī/全台字 by Chng Hūiphêng 2022.10.23

Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》　　　 Lí Lâmhêng

　　　　　 Tâioân, Tiongkok, hō͘ put lēsio̍k, Má Engkiú kóng sī ûihiàn!

　　 Chêng chóngthóng Má Engkiú nā bô kóngōe, kiaⁿ hông kóng i sī ékáu, só͘í kúkúá tio̍h ē kóng chi̍tê chhiòōe. Má Engkiú ê chhiòōe sī kóng, kūnî kok khèng tiánlé siōng, Chhòa Engbûn chóngthóng thêchhut "Tionghôa Bînkok kah Tionghôa Jînbîn Kiōnghôkok" hō͘ put lēsio̍k, sībô pitiàu ê thiauhùn khíkhang, kohkhah sī ûihoán Tionghôa Bînkok hiànhoat. Káugoe̍h jīpeh, Má Engkiú chhutse̍k "nn̄g hōaⁿ kau liû 35 nî hôekò͘ kah tiánbōng chōtâmhōe" ê sî, i ánne kóng·ê. Má Engkiú chitgî, Chhòa Engbûn bô khòaⁿkòe Tionghôa Bînkok hiànhoat chengsiu tiâubûn, kóng·ê sī khangōe, nāsī hō͘siong put lēsio̍k chinchiàⁿ si̍thiān, tio̍h ē piànsêng nn̄gê Tiongkok.

Káugoe̍h jīkáu, Lio̍kúihōe hôeèng kóng, Tionghôa Bînkok sī chúkoân to̍kli̍p kokka, chènghú kunkù《 Tionghôa Bînkok hiànhoat 》 tīlí kokka, kah Tionghôa Jînbîn Kiōnghôkok hō͘ put lēsio̍k, 《 Tionghôa Bînkok hiànhoat 》kah《chengsiu tiâubûn 》 só͘ū tiâubûn hian thàuthàu, chhōe bô Tionghôa Bînkok lēsio̍k sèkài siōng jīmhô chi̍tê kokka.

　　 Cha̍pgoe̍h chhejī, Tiongkok Kokbîntóng Tâipakchhītiúⁿ chhamsoánjîn Chiúⁿ Bānan kípān Bûnsankhu āuoānhōe sêngli̍p tāihōe, chêng Tâipakchhītiúⁿ Hok Liôngpin, Má Engkiú téng chi̍ttīn lâng lóng ū kàu tiûⁿ khiā tâi. Má Engkiú kohchài chitgî Chhòa Engbûn thêchhut nn̄g hōaⁿ hō͘siong put lēsio̍k, kinpún sībô khòaⁿkòe Tionghôa Bînkok hiànhoat chengsiu tiâubûn, chengsiu tiâubûn kóng Tâioân kah Tiongkok lóng sī Tionghôa Bînkok, Tāilio̍k tēkhu sī Tâi, Phêⁿ, Kim,Bé ígōa ê Tionghôa Bînkok léngthó͘, chiahê léngthó͘ tī hiànhoat siōng iûgoân sī lán ê léngthó͘, tānsī tī Tiongkok hiànhoat tiong, Tâioân sī Tiongkok ê. Má Engkiú kóng kui po͘, káⁿ ū kóng tàuté tó chi̍t kok lēsio̍k tó chi̍t kok, bô. I chiah sī teh kóng khangōe.

　　2015 nî cha̍pitgoe̍h chhechhit, Má Engkiú í Tionghôa Bînkok chóngthóng sinhūn, 習近平 í Tionghôa Jînbîn Kiōnghôkok chúse̍k sin hūn, lâng chhengho͘ choh "nn̄g hōaⁿ léngtōjîn hōebiān" tī Sinkapho kíhêng hōetâm. Bôkoán sī kongkhai á·sī sutéhā, tongsî ê Má Engkiú chóngthóng káⁿ ū kā 習近平 chúse̍k kóng chhengchhó, kinkì goán Tionghôa Bînkok ê hiànhoat chengsiu tiâubûn, lín Tiongkok Tāilio̍k tēkhu sī Tâi, Phêⁿ, Kim,Bé ígōa ê Tionghôa Bînkok léngthó͘? nāsī chiàu sinbûn pòtō lâi khòaⁿ, bôlūn kongkhai á·sī sutéhā, Má Engkiú sī lóng bô kóng. Ánne, chi̍tê tāipiáu Tionghôa Bînkok, chi̍tê tāipiáu Tionghôa Jînbîn Kiōnghôkok, in nn̄gê thâulâng kongkhai piáuián nn̄gê hō͘ put lēsio̍k ê kokka, káⁿ m̄ sī chinchiàⁿ si̍thiān tio̍h nn̄gê Tiongkok leh?

Bôkoán Tiongkok í tōa kuibô͘ kunián khiónghat Tâioân, phòhoāi Tâi hái hôpêng ê sî, mā bôkoán koklāi hoántùi siaⁿlōng, pehgoe̍h tiong, Tiongkok Kokbîntóng hùchúse̍k Hā Li̍pgiân iûgoân chhōa thoân khì Tiongkok, kah Tiongkok Koktâipān hùchújīm Tân Kho͘hong, Háihia̍phōetiúⁿ Tiuⁿ Chìkun kìⁿbīn. Goe̍h gōa ji̍tāu ê cha̍pgoe̍h chhesaⁿ, Hā Li̍pgiân kongkhai piáusī, i sī ûṳt chi̍tê káⁿ kongkhai tī Tiongkok koaⁿoân bīnchêng piáuta̍t Tiongkok tùi Tâi kunián putboán ê lâng. Hā Li̍pgiân kóng, i kā tùihōaⁿ koaⁿoân kóng "90% Tâioân lâng putboán Tiongkok tùi tâi kunián, tùi kunián kámkak bē sóng, kámkak hoânló". Chin sitlé, kóng choh lí kóng, Tiongkok oânchoân bô teh kā i sìntáu. Chiàusiông kunián. Hā Li̍pgiân tio̍h sī siūⁿ kóng Tâioân, Tiongkok hō͘ put lēsio̍k, m̄chiah ē ánne tata kiò.

　　 Tâioân, Tiongkok, hō͘ put lēsio̍k, Má Engkiú kóng sī ûihiàn! chhiò phòa lâng ê chhùi. 　 (221007)

Chù, 習近平 　　　　 chhiáⁿ liām Hôagí


Pe̍h-ōe-jī-pán/白話字版

《 Le̍k-sek toán-phêng 》　　　 Lí Lâm-hêng

　　　　　 Tâi-oân, Tiong-kok, hō͘ put lē-sio̍k, Má Eng-kiú kóng sī ûi-hiàn!

　　 Chêng chóng-thóng Má Eng-kiú nā bô kóng-ōe, kiaⁿ hông kóng i sī é-káu, só͘-í kú-kú-á tio̍h ē kóng chi̍t-ê chhiò-ōe. Má Eng-kiú ê chhiò-ōe sī kóng, kū-nî kok khèng tián-lé siōng, Chhòa Eng-bûn chóng-thóng thê-chhut "Tiong-hôa Bîn-kok kah Tiong-hôa Jîn-bîn Kiōng-hô-kok" hō͘ put lē-sio̍k, sī-bô pit-iàu ê thiau-hùn khí-khang, koh-khah sī ûi-hoán Tiong-hôa Bîn-kok hiàn-hoat. Káu-goe̍h jī-peh, Má Eng-kiú chhut-se̍k "nn̄g hōaⁿ kau liû 35 nî hôe-kò͘ kah tián-bōng chō-tâm-hōe" ê sî, i án-ne kóng-·ê. Má Eng-kiú chit-gî, Chhòa Eng-bûn bô khòaⁿ-kòe Tiong-hôa Bîn-kok hiàn-hoat cheng-siu tiâu-bûn, kóng-·ê sī khang-ōe, nā-sī hō͘-siong put lē-sio̍k chin-chiàⁿ si̍t-hiān, tio̍h ē piàn-sêng nn̄g-ê Tiong-kok.

Káu-goe̍h jī-káu, Lio̍k-úi-hōe hôe-èng kóng, Tiong-hôa Bîn-kok sī chú-koân to̍k-li̍p kok-ka, chèng-hú kun-kù《 Tiong-hôa Bîn-kok hiàn-hoat 》 tī-lí kok-ka, kah Tiong-hôa Jîn-bîn Kiōng-hô-kok hō͘ put lē-sio̍k, 《 Tiong-hôa Bîn-kok hiàn-hoat 》kah《cheng-siu tiâu-bûn 》 só͘-ū tiâu-bûn hian thàu-thàu, chhōe bô Tiong-hôa Bîn-kok lē-sio̍k sè-kài siōng jīm-hô chi̍t-ê kok-ka.

　　 Cha̍p-goe̍h chhe-jī, Tiong-kok Kok-bîn-tóng Tâi-pak-chhī-tiúⁿ chham-soán-jîn Chiúⁿ Bān-an kí-pān Bûn-san-khu āu-oān-hōe sêng-li̍p tāi-hōe, chêng Tâi-pak-chhī-tiúⁿ Hok Liông-pin, Má Eng-kiú téng chi̍t-tīn lâng lóng ū kàu tiûⁿ khiā tâi. Má Eng-kiú koh-chài chit-gî Chhòa Eng-bûn thê-chhut nn̄g hōaⁿ hō͘-siong put lē-sio̍k, kin-pún sī-bô khòaⁿ-kòe Tiong-hôa Bîn-kok hiàn-hoat cheng-siu tiâu-bûn, cheng-siu tiâu-bûn kóng Tâi-oân kah Tiong-kok lóng sī Tiong-hôa Bîn-kok, Tāi-lio̍k tē-khu sī Tâi, Phêⁿ, Kim,Bé í-gōa ê Tiong-hôa Bîn-kok léng-thó͘, chiah-ê léng-thó͘ tī hiàn-hoat siōng iû-goân sī lán ê léng-thó͘, tān-sī tī Tiong-kok hiàn-hoat tiong, Tâi-oân sī Tiong-kok ê. Má Eng-kiú kóng kui po͘, káⁿ ū kóng tàu-té tó chi̍t kok lē-sio̍k tó chi̍t kok, bô. I chiah sī teh kóng khang-ōe.

　　2015 nî cha̍p-it-goe̍h chhe-chhit, Má Eng-kiú í Tiong-hôa Bîn-kok chóng-thóng sin-hūn, 習近平 í Tiong-hôa Jîn-bîn Kiōng-hô-kok chú-se̍k sin hūn, lâng chheng-ho͘ choh "nn̄g hōaⁿ léng-tō-jîn hōe-biān" tī Sin-ka-pho kí-hêng hōe-tâm. Bô-koán sī kong-khai á-·sī su-té-hā, tong-sî ê Má Eng-kiú chóng-thóng káⁿ ū kā 習近平 chú-se̍k kóng chheng-chhó, kin-kì goán Tiong-hôa Bîn-kok ê hiàn-hoat cheng-siu tiâu-bûn, lín Tiong-kok Tāi-lio̍k tē-khu sī Tâi, Phêⁿ, Kim,Bé í-gōa ê Tiong-hôa Bîn-kok léng-thó͘? nā-sī chiàu sin-bûn pò-tō lâi khòaⁿ, bô-lūn kong-khai á-·sī su-té-hā, Má Eng-kiú sī lóng bô kóng. Án-ne, chi̍t-ê tāi-piáu Tiong-hôa Bîn-kok, chi̍t-ê tāi-piáu Tiong-hôa Jîn-bîn Kiōng-hô-kok, in nn̄g-ê thâu-lâng kong-khai piáu-ián nn̄g-ê hō͘ put lē-sio̍k ê kok-ka, káⁿ m̄ sī chin-chiàⁿ si̍t-hiān tio̍h nn̄g-ê Tiong-kok leh?

Bô-koán Tiong-kok í tōa kui-bô͘ kun-ián khióng-hat Tâi-oân, phò-hoāi Tâi hái hô-pêng ê sî, mā bô-koán kok-lāi hoán-tùi siaⁿ-lōng, peh-goe̍h tiong, Tiong-kok Kok-bîn-tóng hù-chú-se̍k Hā Li̍p-giân iû-goân chhōa thoân khì Tiong-kok, kah Tiong-kok Kok-tâi-pān hù-chú-jīm Tân Kho͘-hong, Hái-hia̍p-hōe-tiúⁿ Tiuⁿ Chì-kun kìⁿ-bīn. Goe̍h gōa ji̍t-āu ê cha̍p-goe̍h chhe-saⁿ, Hā Li̍p-giân kong-khai piáu-sī, i sī ûi-it chi̍t-ê káⁿ kong-khai tī Tiong-kok koaⁿ-oân bīn-chêng piáu-ta̍t Tiong-kok tùi Tâi kun-ián put-boán ê lâng. Hā Li̍p-giân kóng, i kā tùi-hōaⁿ koaⁿ-oân kóng "90% Tâi-oân lâng put-boán Tiong-kok tùi tâi kun-ián, tùi kun-ián kám-kak bē sóng, kám-kak hoân-ló". Chin sit-lé, kóng choh lí kóng, Tiong-kok oân-choân bô teh kā i sìn-táu. Chiàu-siông kun-ián. Hā Li̍p-giân tio̍h sī siūⁿ kóng Tâi-oân, Tiong-kok hō͘ put lē-sio̍k, m̄-chiah ē án-ne ta-ta kiò.

　　 Tâi-oân, Tiong-kok, hō͘ put lē-sio̍k, Má Eng-kiú kóng sī ûi-hiàn! chhiò phòa lâng ê chhùi. 　 (221007)

Chù, 習近平 　　　　 chhiáⁿ liām Hôa-gí



　　前總統馬英九若無講話，驚hông講伊是啞口，所以久久á tio̍hē講一個笑話。馬英九ê笑話是講：舊年國慶典禮上，蔡英文總統提出「中華民國kah中華人民共和國」互不隸屬，是無必要ê挑釁（hùn）起空，koh-khah是違反中華民國憲法。九月二八，馬英九出席「兩岸交流35年回顧kah展望座談會」ê時，伊án-ne講-·ê。馬英九質疑，蔡英文無看過中華民國憲法增修條文、講-·ê是空話，若是互相不隸屬真正實現，tio̍hē變成兩個中國。

九月二九，陸委會回應講，中華民國是主權獨立國家，政府依據《中華民國憲法》治理國家，kah中華人民共和國互不隸屬，《中華民國憲法》kah《增修條文》所有條文hian透透，chhōe無中華民國隸屬世界上任何一個國家。

　　十月初二，中國國民黨台北市長參選人蔣萬安舉辦文山區後援會成立大會，前台北市長郝龍斌、馬英九等一陣人lóng有到場khiā台。馬英九koh再質疑蔡英文提出兩岸互相不隸屬，根本是無看過中華民國憲法增修條文，增修條文講台灣kah中國lóng是中華民國，大陸地區是台、澎、金馬以外ê中華民國領土，chiah-ê領土tī憲法上猶原是咱ê領土，但是tī中國憲法中，台灣是中國ê。馬英九講歸晡，敢有講到底tó一國隷屬tó一國，無。伊chiah是teh講空話。

　　2015年十一月初七，馬英九以中華民國總統身份、習近平以中華人民共和國主席身份，人稱呼作「兩岸領導人會面」tī新加坡舉行會談。無管是公開抑是私底下，當時ê馬英九總統敢有kā習近平主席講清楚：根據阮中華民國ê憲法增修條文，lín中國大陸地區是台、澎、金馬以外ê中華民國領土？若是照新聞報導來看，無論公開抑是私底下，馬英九是lóng無講。án-ne，一個代表中華民國，一個代表中華人民共和國，in兩個頭人公開表演兩個亙不隸屬ê國家，敢m̄是真正實現tio̍h兩個中國咧？

無管中國以大規模軍演恫嚇台灣、破壞台海和平ê時，mā無管國內反對聲浪，八月中，中國國民黨副主席夏立言猶原chhōa團去中國，kah中國國台辦副主任陳元豐、海協會長張志軍見面。月外日後ê十月初三，夏立言公開表示，伊是唯一一個敢公開tī中國官員面前表達中國對台軍演不滿ê人。夏立言講，伊kā對岸官員講「90%台灣人不滿中國對台軍演，對軍演感覺bē爽，感覺煩惱」。真失禮，講作你講，中國完全無teh kā伊sìn-táu。照常軍演。夏立言tio̍h是想講台灣、中國亙不隸屬，m̄chiahēán-ne ta-ta叫。

　　台灣、中國，亙不隸屬，馬英九講是違憲！笑破人ê嘴。　 (221007)

註：習近平　　　　請唸華語